Albistea entzun

Mediku elkargoak ohartarazi duenez, sendagileek «ezin dute gehiago»

Gipuzkoako Mediku Elkargoa «oso kezkatuta» dago egoerarekin, eta bilera bat eskatuko diote Sagarduiri. Uda sasoian egin ohi diren aldaketekin lotu du Osasun Sailak
Donostiako Antigua auzoko osasun etxerako sarrera.
Donostiako Antigua auzoko osasun etxerako sarrera. GORKA RUBIO / FOKU Tamaina handiagoan ikusi

Iosu Alberdi - Gurutze Izagirre Intxauspe -

2022ko uztailak 29

Gipuzkoako Sendagileen Elkargoak altxatu du eskua: «Sendagileek ezin dute gehiago». Carmen Solorzano elkargoko lehendakariak esan zuen hori, atzo, gobernu batzordearen bilera osteko adierazpenetan. Sendagileen Elkargoko Gobernu Batzordea «oso kezkatuta» dago gaur egungo osasun arretaren egoerarekin, eta esan zuen udako hilabeteetan arretaren kalitatea are gehiago okertu dela. Medikuen aldartearen berri ere eman zuen: «Ezin dute gehiago, oso desmotibatuta daude. Gainera, sentsazio orokorra da, ez da bakarrik lehen mailako arretan gertatzen ari, ospitaleetan ari diren sendagileek ere adierazi digute zenbait zerbitzutan egoera jasanezina dela».

Horrek guztiak ondorio garbia du: gaixoari ematen zaion arreta okertzen ari da. «Sendagileok gaixoaren osasunaren alde egiten dugu, eta, beraz, egoerarekin benetan kezkatuta gaude».

Adierazi zuenez, «hainbat eta hainbat» dira arazoak: osasun zentroetako sendagile falta, udako hilabete hauetan zenbait zentro ixtea, itxaron zerrenda luzeak kontsulta edo ebakuntza baterako, gaixoak zentro batetik bestera mugitzea... «Arazoak pilatuz doaz, eta badirudi inork ez duela konponbideak jartzeko borondaterik».

Elkargoko Gobernu Batzordeak bilera bat eskatuko dio Eusko Jaurlaritzako Osasun Sailari, arazo horiek mahai gainean jarri eta zenbait sendagileren kexei buruz hitz egiteko: «Ditugun sendagileak zaindu behar dira, eta guztiz kontrakoa gertatzen ari da», ohartarazi zuen.

«Arreta bermatuta»

Osasun langileen arlotik iristen den kexa, larria izanik ere, ez da berria, baina Osasun Sailekoek esan dute «arreta bermatuta» dagoela, eta udan egin ohi diren aldaketekin eta lehen arretako mediku faltarekin lotu dute egoera.

Osakidetzaren egoera «larriaz» ohartarazi zuen Rebeka Ubera EH Bilduko legebiltzarkideak iragan astean. Eusko Legebiltzarreko Diputazio Iraunkorra deitzeko eskatu zuen, Osakidetzaren egoerari buruzko azalpenak eskatzeko Gotzone Sagardui Osasun sailburuari eta Osakidetzako arduradunei. Eusko Legebiltzarreko Mahaiak ez zuen «premiarik» ikusi gaiari heltzeko, eta Sagarduiren erantzuna idatziz iritsi da legebiltzarrera.

Idatzizko erantzun horren arabera, Araba, Bizkai eta Gipuzkoako 150 osasun zentro murrizketak jasaten ari dira uda garaian. Horietatik 47 guztiz itxita edo erdi itxita egongo dira irailera bitartean.

Eusko Legebiltzarrarentzako erantzunean, Sagarduik azaldu du hiru lurraldeetako 335 zentroen %95 martxan daudela. Haren esanetan, hamalau zentro itxita daude uda garaian; ekainaren 22tik irailaren 22ra bitarte —gutxi batzuk lehenago irekiko dituzte—. Jaurlaritzaren hitzetan, «astean ordubetez edo bi orduz zerbitzua» eman ohi duten zentroak dira gehienak: Tolosaldeko ESI erakunde sanitario integratuko 11 zentro eta Barrualdea-Galdakao ESIko hiru. Horrez gain, beste 33 zentro «partzialki» itxiko dituzte.

Hogeitan, erizainak bakarrik

Irekita mantenduko dituztenen artean ere ordu murrizketak egin dituztela iragarri dute. Gehienetan, itxiera ordua aurreratu dute, 20:00etatik 17:00etara, edo 17:00etatik 15:00etara. Hogei zentrotan, gainera, ez da medikurik ari lanean; erizainak soilik daude.

Osasun Sailak dio aurreikuspen horiek «bajen eta lanerako itzuleren arabera» moldatzen ari direla.

Halere, EH Bilduk salatu du «murrizketa handiak» egin direla eta, orotara, zentroen %44ri eragiten dietela. «Azken batean, Gotzone Sagardui aitortzen ari da murrizketak badaudela. Egia da egoera hau ohiko bilakatu dela urtero uda sasoian, baina aurten murrizketak nabarmen areagotu dira», Uberaren arabera.

Koalizio subiranistaren ustez, «planifikazio falta eta antolaketa arazoak» daude, eta Eusko Jaurlaritzari egotzi dio «osasun sistema publikoa ahultzeko» asmoa izatea. Azken asteotan Osasun Sailak ukatu egin du behin eta berriz uda garaian osasun zentroetan murrizketak egiten ari direla, baina Uberari erantzunez Sagarduik berak legebiltzarrari igorri dion informazioak guztiz kontrakoa dio, koalizio subiranistaren arabera; alegia, murrizketak badaudela eta, hortaz, EH Bilduk arrazoi horregatik egin duen salaketak oinarri sendoa duela.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Donostialdeko ESIko zerbitzuburuek egindako agerraldia, atzo, Donostian. ©JON URBE / FOKU

«Harreman asimetrikoak» hausteko eskatu diote Jaurlaritzari

Edurne Begiristain Iosu Alberdi

Donostialdeko ESIko zerbitzuburuek kontsultarako mahai bat proposatu diote Gasteizi, bitartekari lana egiteko

Jonan Fernandez, atzo, gazteen emantzipaziorako estrategia aurkezten. ©IREKIA

Emantzipatzeko laguntzak jasoko dituzte 25 eta 29 urte artekoek

Edurne Begiristain

Jaurlaritzak gazteen emantzipazioa sustatzeko estrategia ondu du. 2030erako 29 urtera jaitsi nahi du gurasoen etxea uzteko adina

Antton Kurutxarri EEPko lehendakaria agerraldi batean ©Guillaume Fauveau

EEPko ordezkariek Parisen isiltasuna deitoratu dute

Garazi Aduriz Zuñeda

Irailean egin zuten bilkura Frantziako Hezkuntza Ministerioarekin. Azterketak euskaraz egiteko eskubidea aipatu zuten nagusiki.

Donostiako ospitalaren atarian gaur goizean egindako protesta bilkura ©Javier Etxezarreta / Efe

Donostia ospitaleko 150 langile inguru batu dira gaur ESIko zerbitzuburuen elkarretaratzera

Edurne Begiristain

Osakidetzaren eta Eusko Jaurlaritzaren kudeaketa salatzeko, protesta jendetsua egin dute goizean ospitaleko atarian.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Hitzen, ekintzen eta errimen eztanda. Herri bat BERRIAren kulturaren plazan. Baliatu udazkenean BERRIAlagun egiteko eskaintza.