Noiz sortua: 2020-02-25 00:30:00

Herriko bozak Ipar Euskal Herrian. Hazparne

Hiru hautagai Hazparnen

Beñat Intxauspe oraingo auzapezak hirugarren agintaldia lortu nahi du. Bi hautagai izanen ditu parean: Isabelle Pargade lehen axuanta ohia eta Kristian Etxeto abertzalea
Hazparneko herriko etxearen artxiboko argazkia. Hiru hautagai lehiatuko dira bertan auzapez kargua lortzeko.
Hazparneko herriko etxearen artxiboko argazkia. Hiru hautagai lehiatuko dira bertan auzapez kargua lortzeko. GUILLAUME FAUVEAU Tamaina handiagoan ikusi

Julen Oillarburu -

2020ko otsailak 25
Heldu den martxoaren 15ean, hazpandarrek hiru zerrendaren artean erabaki beharko dute: Beñat Intxauspe oraingo auzapezaren parean, Isabelle Pargade departamenduko kontseilaria eta Kristian Etxeto abertzalea aurkeztuko dira. Hiru zerrendek oraingoz programarik plazaratu ez badute ere, Etxetok eta Pargadek beren ardatz nagusiak azaldu dituzte. Intxauspek aldiz, ez die «elkarrizketarik eskaini nahi hedabideei», eta, beraz, ez ditu BERRIAren galderak erantzun nahi izan.

 

Beñat Intxauspe Hazparnerentzat batuHazparne azkar eta erne zerrendarekin aurkeztuko da herriko bozetara, bederatzi kide berrirekin, «pluralismoa eta gaztetasuna» bermatzeko xedez. 2014an abertzaleek soilik egin zioten lehia, eta, bozen %23 eskuratuta, hiru hautetsi lortu zituzten herriko kontseiluan. Aurten, Kristian Etxetok eramanen du Herritarrekin ezker abertzaleko zerrenda, Intxausperen kudeaketaren «notabilismoa eta bertikaltasuna» kritikatuz.

Isabelle Pargaden hautagaitzak ekar lezake berritasun nagusia Hazparnen. 2008tik 2014ra, Intxausperen lehen axuanta izan zen, baina «hainbat desadostasunengatik» postu horretan ez segitzea erabaki zuen. 2015ean, Vincent Bru Errepublika Martxaneko diputatuarekin departamenduko kontseilari gisa hautatua izan zen; Intxauspe ere aurkeztu zen boz horietan. Joan den otsailaren 8an, Hazparne bihotzean lelopean «etiketarik gabeko» zerrenda aurkeztu zuen, «adin eta esperientzia anitzetako pertsonaz» osatua. Azken urteetan, Euskal Herriko gatazkaren konponbide prozesuan parte hartu izan du Pargadek, Bake Bideko kide gisa -gaur egun ez da gehiago kide-.

29 hautetsi hautatu behar dituzte Hazparneko herriko kontseilurako, eta, aurten, lehen aldikotz Euskal Hirigune Elkargoan Hazparneko ordezkari izanen direnak ere izendatu beharko dituzte. Hain zuzen, 2017an finkatua izan zen lehen gobernantza paktuaren arabera, hiru ordezkari ukanen ditu Lapurdiko herriak. Ondoko hilabeteetan, Elkargoaren osaketa eta kontseilu bakoitzaren izendatze sistema berriz definitzekotan dira.

Alde horretatik, deszentralizazio gehiagoren alde jo du Pargadek, erabakigunea «lurralde poloetara jaustea» proposatuz, «hautetsien lan zama areagotzeko arriskua» ikusten badu ere. Alta, konbentzitua da Elkargoak lurralde mailako politika publikoak ahalbidetuko dituela, batez ere, garraio sistema eta jarduera ekonomikoa garatzeko. Etxetok Elkargoari dion «atxikimendua» azaldu du, abertzaleen «aspaldiko aldarrikapena» zela oroitaraziz.

7.000 biztanle

Horrez gain, Hazparneko biztanleriaren emendatzeari egokitzeko, erronka nagusietariko bat hiriaren lurralde antolaketa izanen da: hiri erdigunearen berrantolaketa eta etxebizitzaren gaiak mahai gainera itzuliko dira. Izan ere, azken hamar urteetan Hazparneko biztanleria %10 igo da, eta, gaur egun, 7.000 biztanletik gora ere badira. Intxausperen kargualdiari dagokionez, oposizioko bi hautetsiek erronka honi erantzuteko gabeziak agerrarazi dituzte. Pargaden arabera, politika horrek Hazparne «lo-hiri» bilakarazi du. «Azpiegituren emendatzearen eta bizi kalitatearen arteko oreka bat» atzeman daiteke Pargaden ustez, etxebizitzarako sarbidea gazteei lehenetsiz. Abertzaleen zerrendaburuak, aldiz, hiri barnea «autoz sobera betea» dela ohartarazi du. Egoera hori ikusirik, garraiobide berriak garatzea proposatzen du: lotura-autobusak auzo urrunenetatik zentro aldera eta bizikleta bideak, besteak beste. Etxebizitzaren arloan, «eraikin zahar eta hutsen berritzea» defendatzen du. Alternatiba horrek, «batetik, dinamika berri bat ekarriko lioke hiriari eta, bestetik, saihestuko luke laborantza lurretan etxebizitza gehiago eraikitzea», esan du.

Klima eta euskara

Trantsizio ekologikoaren desafioa herri hauteskundeetako agenda politikoaren erdigunean jarriko da, itxura guztien arabera. Joan den otsailaren 1ean, Klima plana aurkeztu zuen Euskal Hirigune Elkargoak, eta lurraldearen ingurune politikaren ardatz nagusiak definitu. Energia berriztagarrien ekoizpena emendatzea, etxebizitzen energia gastuak murriztea, berotegi efektuko gasak gutxitzea eta klima aldaketaren eraginak aurreikustea izanen dituzte erronkak.

Etxetorentzat, «ekologia ez da hautabide bat» eta Hazparnen birziklapena eta energia berriztagarrien aldeko sentsibilizazioaren beharra azpimarratu du. Zehaztasunik eman gabe, Pargadek trantsizio ekologikoa bere programaren «zeharkako gaia» izanen dela azaldu du, euskararen gaiarekin batera. Abertzaleek, berriz, euskararen garapenari garrantzi handia eman nahi diote. Kontseiluak diseinatutako hizkuntza gutxituen aldeko bide orrian oinarrituz, «herriko etxeko harrera %100 euskaraz» egiteko asmoa du Etxetok, besteak beste. Azkenik, bi hautagaiek gaztetxe berri baten atzemateko nahikeria adierazi dute, Etxetorentzat ezinbestekoa baita gazteek «elkartzeko eta ekinbideen antolatzeko» gune bat ukan dezaten.

Albiste gehiago

Apirilaren 2an eguneratua, 13:00etan. ©BERRIA

Koronabirusaren azken datuak

Berria

Euskal Herrian 10.022 gaixok eman dute positibo koronabirusaren proba eginda. 555 hil dira. COVID-19 gaitza izandako 2.459 pertsonari eman diete alta. Grafikoak, albiste barruan.

Urkullu lehendakaria. ©Irekia

Lehen kasutik «ahalegin handia» egin zutela esan du Urkulluk

Berria

Urtarrilaren 22tik otsailaren 28ra –lehen kasua agertu zen eguna– «ahalegin handia» egin zutela esan du Urkulluk, «prestatzeko eta koordinatzeko». Batez beste %9tik gora handitu da langabezia Hego Euskal Herrian. Nafarroako datua nabarmentzeka da: %9,96 handitu da herrialdean, eta, ondorioz, 3.600 langabe gehiago daude.

Langilerik gabeko obra bat, asteartean, Elgoibarren. ©Jagoba Manterola / Foku

Martxoan, 14.364 langabe gehiago Hegoaldean

Iker Aranburu

Aldi baterako kontratua zutenak izan dira krisiaren lehen kaltetuak.

Markel Olano, ere gobernukide batzuekin batzuekin, alkateekin izandako bilra telematikoan ©GFA

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Informazio osagarria

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna