Albistea entzun

Amatasun unitateen segurtasuna zorroztuko du Eusko Jaurlaritzak

Identifikazio txartel elektronikoen bidezko sistema bat ezarriko du unitate horietara sartzeko. Basurtuko bahiketaren ondotik, protokoloa egokitzea erabaki du Osasun Sailak
Bilboko Basurtu erietxea.
Bilboko Basurtu erietxea. JAVIER ZORRILLA / EFE Tamaina handiagoan ikusi

Edurne Begiristain -

2022ko azaroak 16

Joan den urrian emakume batek Basurtuko ospitalean (Bilbo) haur jaioberri bat bahitu zuenean, haurren segurtasunerako protokoloak huts egin ote zuen ikertuko zuela jakinarazi zuen Eusko Jaurlaritzako Osasun Sailak. Pazienteen Segurtasunerako Taldeak gertatutakoa aztertu du, eta indarrean den protokoloa aldatzeko gomendio sorta bat eman dio Gotzone Sagarduiren departamentuari. Aholku horiek aintzat harturik, Arabako, Bizkaiko eta Gipuzkoako erietxeetako amatasun unitateetan segurtasun neurriak zorroztea erabaki du Eusko Jaurlaritzak. Hala, amatasun unitateetako langileen identifikazioari eta zaintzaileen eta bisitarien sarbideari lotutako kontrolak indartuko ditu, eta jaioberrien protokoloari lotutako informazioa zabalduko du, besteak beste.

Aurrerantzean, ospitaleetako amatasun unitateetara sartzeko, ezinbestekoa izango da identifikazio txartel elektronikoa erabiltzea; langileek eta senideek erabili beharko dute identifikazio hori. Sistema berezi bat jarriko dute sarreretako ateetan, eta ate hori soilik norberak eramango duen txartel elektroniko baten bidez ireki ahalko da. Zeintzuek eraman beharko dute txartel hori? Bada, printzipioz, osasun profesionalek, eta erietxean daudenek ondoan nahi dituzten pertsonek.

Horrez gain, ospitaleetako sarbideetan hobekuntzak egingo dituzte, eta eraikinen kanpoaldean kameren bidezko zaintza sistemak indartuko dute. Basurtuko ospitalean, itxi egingo dira pabiloiaren alboetako ateak, eta alarma bat jarriko dute larrialdietarako atean.

Protokoloa, ahoz eta idatziz

Eraikinetako segurtasun neurriak zorrozteaz gain, jaioberrien protokoloa «modu eraginkorragoan» zabaltzeko neurriak hartuko dira amatasun unitateetan. Pazienteen segurtasuna lantzen duen taldeak gomendio batzuk egin ditu alde horretatik. Haur jaioberriaren gurasoei «argi» esango zaie ez dutela inoiz haurra bakarrik utzi behar, eta ahoz ez ezik, aurrerantzean paperean ere emango zaie Ez nazazue bakarrik utzi protokoloaren berri. Gainera, egiaztatuta geratuko da norberaren historia klinikoan.

Osasun langileen identifikazioari eta uniformeei dagokienez ere, aldaketak proposatu ditu aditu taldeak. Osasun profesionalei esango zaie behartuta daudela nor diren adierazten duen txartela ongi ikusten den tokian eramatera. Halaber, uniformeen zaintza berrikusi eta hobetze aldera, hobeto gordeko dira aurrerantzean langileen jantziak, gune itxietan.

Zazpi amatasun unitate daude hiru lurraldeetako ospitaleetan: bat Araban, bi Bizkaian eta lau Gipuzkoan. Guztietan indartuko dira segurtasun neurriak, Sagarduik azaldu duenez, baina ez dira denak aldi berean indarrean jarriko. Horietako batzuk abian jartzen ari dira jada, baina beste batzuk martxan jartzeko —eraikinetako segurtasunari lotutakoak— aldaketak egin beharko dira azpiegituretan, eta banan-banan aztertuko da kasu bakoitza.

Basurtuko ospitalean haur jaioberri bat bahitua izan ondoren erabaki du Osakidetzak indarrean den protokoloa egokitzea. Bahiketa hori nola gertatu zen aztertu du Erien Segurtasunerako taldeak, eta zerk egin zuen huts ondorioztatu du txosten batean. Bahiketa hura erraztu zuten puntuak aletu ditu Sagarduik. Nabarmendu du pandemia garaian utzi egin zitzaiola jaioberriak bakarrik ez uzteko gurasoei ematen zaien eskuorria banatzeari, eta gaur-gaurkoz ez dela oraindik idatzizko jarraibiderik banatzen.

Gainera, nabarmendu du osasun langileek ez dutela beti identifikazio txartela soinean eramaten. Horrekin batera, pazienteen segurtasunerako taldeak ohartarazi du Basurtuko ospitalean amatasun pabiloirako sarbide ugari daudela eta «erraza» dela osasun profesionalen uniformeak eskuratzea, bai zirkuitu garbian eta bai zikinean. Horregatik jo dute beharrezkotzat hainbat neurri hartzea orain, baina erietxeak erabat itxi gabe: «Asmoa da bateragarri egitea pazientearen segurtasuna eta ongizatea».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

MHLI taldeko ikertzaileak eta Maria Jose Telleria Gipuzkoako Foru Aldundiko Kultura diputatua, gaur, aldundian. ©JON URBE / FOKU

Euskal liburu asko zentsuratu zituzten Franco hil ostean ere

Mikel Elkoroberezibar Beloki

Torrealdairen lanari «jarraipena» emanez, MHLI taldeak 1975. eta 1983. urteen arteko zentsurari buruzko liburu bat ondu du. Zentsoreen obsesioa «separatismoa» zela nabarmendu du Ana Gandara ikertzaileak.

Idurre Eskisabel Kontseiluko idazkari nagusia eta Alex Aginagalde Pantailak Euskaraz-eko bozeramailea. ©Maialen Andres, Foku

Betetzeko dago oraindik ere Espainiako Ikus-entzunezkoen Legea

Julen Otaegi Leonet

Onartu zenetik aldaketak izan dira katalogoetan eta programazioetan, baina, Euskalgintzaren Kontseiluaren arabera, oztopoak daude hizkuntza gutxituen presentzia biderkatzeko bidean. Plataformek «urratsak» egitea galdegin du.

Urkullu, gaur goizean, Eusko Legebiltzarrean. ©Endika Portillo / Foku

Urkulluk uste du euskararen aurkako epaiek ez dutela zalantzan jartzen hizkuntz politika

Iosu Alberdi

Urteko lehen kontrol saioa egiten ari dira Eusko Legebiltzarrean. Osasun sistema publikoaren eta pribatuaren arteko harremana babestu du lehendakariak.

AHTaren tunel bat Lezetxiki barruan egin dutela salatu dute ©Lezetxikiren Lagunak

Gipuzkoako Foru Aldundiak dio AHTak ez duela «inolako kalterik eragin» Lezetxikin

Isabel Jaurena

Ekologistak Martxan taldeak erran du AHTaren obrek «haitzuloko lurpeko ekosistema hauskorrari» kalte egin diotela.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.