Albistea entzun

Ekonomia blokeatu nahi dute grebalariek

CFDT sindikatua pentsioen erreformaren aurkako laugarren protesta egunera batu da, lehen aldiz. Mobilizazioa eraginkorra izateko, saltoki handiak eta garraioak oztopatuko dituzte egunotan
Pentsio erreformaren aurkako manifestazioa, atzo, Baionan.
Pentsio erreformaren aurkako manifestazioa, atzo, Baionan. GUILLAUME FAUVEAU Tamaina handiagoan ikusi

Oihana Teyseyre Koskarat -

2019ko abenduak 18 - Baiona

Hamahiru egun igaro dira Frantziako Gobernuak bultzatutako pentsioen erreformaren aurkako protestak hasi zirenetik. Ez dira azkenak izango, Parisko agintariek ez baitute keinurik egin erreforma bertan behera uzteko edo sakonki aldatzeko. Horregatik, «mobilizazioa eraginkorra» izan dadin, ekonomia blokeatzeko deia egin dute Ipar Euskal Herriko sindikatuek. Ekintza zehatzen artean aipatu dituzte garraioak oztopatzea eta Eguberrien bezperan saltoki handiak trabatzea.

Baionako karriketan milaka pertsona elkartu ziren erreforma salatzeko. Abenduaren 5az gero —lehen mobilizazio eguna— izan den manifestaziorik jendetsuena izan zen. Lan burtsatik abiatu ziren manifestariak, eta ospitalearen eta Cassin lizeoaren arteko biribilgunean bukatu zuten ibilbidea, langileen bateratzearen sinbolo gisa. Mobilizazioan, lehen aldiz eta atzealdean, CFDT sindikatuaren bandera laranjak ageri ziren. Puntukako erretretaren aldekoa denez, orain arte mobilizaziotik at izan da sindikatu erreformista hori, baina biziki gaizki hartu ditu erretretaren adina gibelatzeko neurriak. Michel Larralde Baionako CFDTko idazkaria da: «Gobernuarekin izan dugun negoziazioa berriz hastea nahi dugu, urrunegi joan baitira erreformaren neurri batzuekin, hala nola adinaren kontuarekin». Larraldek ez daki zenbat denboraz segituko duen CFDT sindikatuak mobilizazioetan parte hartzen, «goizegi» baita, haren ustez. «Guk gobernuari ulertarazi nahi diogu karrikara ateraz gero indar harreman bat eraikitzen ahal dugula. CFDT sindikatuak badaki negoziatzen, baina gobernua ez dugu utziko geure burua zapaltzera».

CFDTren parte hartzea «bihurgune bat da estrategia sindikalean», Samathan Hourquescos CGTko bozeramailearen iritziz. «CFDT sindikatua ere batu da; horrek erran nahi du sindikatu guztiak erretreten erreformaren kontra direla. Gobernuarekiko dugun indar harremana handitzen ari da, eta horrek gure mugimendua sustatzen du».

Urrunago joan nahi

Batasun sindikala lortuta, protestan urrunago joateko garaia dela uste du Hourquescosek, eta horien artean «ekonomia blokeatzearen aldeko pausoak» eman behar direla esan zuen.

Alde horretatik, atzo goizean goiz Aitzina gazte antolakundeko eta LAB, CGT eta Solidaires sindikatuetako kideek piketea osatu zuten Baionako autobus geltokian, eta Chronoplus autobus zerbitzua geldiaraztea lortu zuten. Zerbitzu horrek Angelu, Baiona eta Miarritze lotzen ditu.

Enedis gas eta elektrizitate enpresako langileek ere ekintza egin zuten atzo goizean, manifestazio denboran. Baionako zerga etxeko elektrizitatea moztu zuten. Jean Christophe Laforie bere sektoreko CGTko idazkari nagusia da, eta honela azaldu zuen: «Frantziako Estatua ordezkatzen duten egiturak hunkitu nahi ditugu. Gure helburua argi da: erreforma hori desagerrarazi nahi dugu. Ez gara soilik gure erregimen bereziarentzat ari borrokan, baizik eta denentzat; sustut ondoko belaunaldientzat».

Arratsaldean, langile grebalariek batzar bat egin zuten protestekin nola jarraitu erabakitzeko. Sektore anitz ordezkatuak ziren: trenbideetako langileak, portukoak, aireportuetakoak, Orange telefono konpainiakoak, lurralde agenteak, irakasleak, pentsiodunak eta Jaka Horiak ere bai. Denek asmo bera erakutsi zuten: mugimendu sozialaren bidez gobernua makurraraztea.

Peio Dufau trenbideetako CGTko ordezkariaren hitzek laburtzen dute batzarrean esandakoa: «Gure helburua ez da amaigabeko mugimendu baten egitea. Guk nahi dugu erreforma hori desagertzea, fite. Horretarako, eraginkorrak izan behar dugu, eta, ekonomia blokeatzen badugu, indar harremana gure alde izanen da».

Eguberriko bakantzen hurbiltzearekin kezkati mintzatu ziren, «iritzi publikoa» buruan zutela. Frantziako Gobernuak «komunikazio operazioen bidez greba mendratu nahi» duela esan zuten. Hala ere, Eguberri arte mobilizatzeko prest agertu ziren sektore gehienak, «inpaktu handiagoa ukaiteko parada baita». Saltoki handien eta garraioaren bidez, ekonomia blokeatzeko ekintzak ugaritzeko deia egin zuten.

Ostegunean bosgarren aldiz greba eta mobilizazio eguna izanen dela iragarri zuten batzarrean bildutako sindikatuek. Anartean, ekintza batzuetara batzeko dei egin zuten. Atzo arratsean bertan, Emmanuel Macronen LREM Errepublika Martxan alderdiaren ekitaldia trabatzen saiatu ziren bi tona ongarri botata, Angelun (Lapurdi).

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

EAJko buru Andoni Ortuzar eta CEOEko buru Antonio Garamendi. ©LUIS TEJIDO / EFE

EAJk berretsi du ez duela abstentziora joko ez bada lan itunen lehentasuna aldatzen

Xabier Martin

EAJko presidente Andoni Ortuzarrek esan du ez dela egongo «abstentzio taktikorik» eta ez duela «pasatzen utziko»,  «sinplea eta erraza» delako erkidegoetako lan hitzarmenen nagusitasuna jasotzea erreforman. CCOOko buru Unai Sordok dio bi urte gelditzen direla legegintzaldian «aldaketak egiteko».

Ontzi bat Bilboko portuan sartzen ©Luis Jauregialtzo (Foku)

Esportazioak pandemia aurreko kopuruetara itzuli dira

Jokin Sagarzazu

Petrolio olio finduak, ontzigintza eta siderurgia nabarmentzen dira. Autogintzak ere gora egin du, Araban bereziki; Nafarroan, aldiz, behera.

Sidenorreko behargin bat, lanean, Basauriko fabrikan. ©MARISOL RAMIREZ / FOKU

Basauriko Sidenorren lan ituna adostu dute, eta KPItik behera igoko dituzte soldatak

Xabier Martin

LSB-USO, Senda de Ugarte, UGT eta CCOO sindikatuek 2026. urte arteko lan hitzarmena egin dute zuzendaritzarekin, eta soldatak %2,5 igoko dira aurten.

Guggenheimeko garbitzaileek Bilbon egin duten manifestazioa. ©Monika Del Valle / FOKU

Guggenheimeko garbitzaileek babesa eskatu diete hura diruz hornitzen duten erakunde publikoei

Imanol Magro Eizmendi

223 egun daramatzate greban, eta Jaurlaritzak esku hartzea erabaki du, baina, oraingoz, artekari moduan bakarrik

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.