Albistea entzun

«Separatismoaren kontrako» lege bat aurkeztuko du Castexen gobernuak

Frantziako gobernu berrituak 100.000 milioi euroko diru funts bat sortuko du COVID-19aren krisiari erantzuteko. Lehen ministroak enplegua ezarri du lehentasun gisa
Jean Castex Frantziako lehen ministroa, atzo, Asanblea Nazionalean, politika orokorreko eztabaidan.
Jean Castex Frantziako lehen ministroa, atzo, Asanblea Nazionalean, politika orokorreko eztabaidan. IAN LANGSDON / EFE Tamaina handiagoan ikusi

Gorka Berasategi Otamendi -

2020ko uztailak 16

Ekonomia suspertzea izango da Frantziako gobernu berriaren lehentasuna, Jean Castex lehen ministroak iragarri duenez. Frantziako Asanblea Nazionalean, politika orokorreko eztabaidan aurkeztu ditu Castexek hurrengo urte eta erdian gobernuaren ildo nagusiak izango direnak. Koronabirusak eragin duen krisiari erantzuteko 100.000 milioi euroko diru funts bat eratuko duela jakinarazi du. «Enplegua izango da nire gobernuaren erabateko lehentasuna», ziurtatu du. Baina aurreratu du bestelako neurririk; horien artean, «separatismoaren kontrako» lege proposamen bat.

Lehen ministroak estatuaren «etsai» gisa aurkeztu du «separatismoa», eta udazkenean haren kontrako lege proiektu bat proposatuko duela aurreratu du, neurriaren edukiari buruzko informazio gehiago eman gabe. «Errepublika Frantzia da. Eta haren oinarriak ere kolokan daude, bere etsaien arteko koalizioaren ondorioz: terroristak, estremistak, konspiratzaileak, separatistak, komunitaristak».

Lehen ministroaren arabera, lege proiektu horren helburua litzateke «hainbat talde, beren ezaugarri etnikoetan edo erlijiosoetan oinarrituta, jarrera intransigentez ixteko aukera eragoztea». Hala, lege horrek izaera etniko, erlijioso edo kulturala duten aldarrikapenen «sabaia» zein den zehaztu beharko luke, eta Frantziako Errepublikaren identitatea indartu. «Errepublikaren balore nagusia sekularitatea da. Inolako erlijiok, pentsamendu korrontek edota talde antolatuk ezin du espazio publikoa bere egin, eta ezin die Errepublikaren legeei eraso».

Joan den ekainean, «komunitarismoa eta separatismoa» Frantziarentzako mehatxu zirela ohartarazi zuen Emmanuel Macron Frantziako presidenteak.

Krisiarentzako erantzuna

Castexen hitzaldiaren zatirik handiena, baina, gai ekonomikoek hartu dute. Koronabirusak eragin duen krisiari erantzuteko neurriei eman die arretarik handiena. Lehen ministroaren esanetan, pandemiak agerian utzi du Frantziako ekonomiak «gehiegizko menpekotasuna» duela beste herrialde batzuekin. «Hori aldatzeko, 40.000 milioi [euro] bideratuko ditugu».

Lehen ministroa Frantzia barruko ekoizpen jarduera indartzen lagunduko duten neurriak hartzearen alde agertu da. Besteak beste, «ekoizpena zamatzen duten zergak arindu» behar direla babestu du, bertan egindako produktuak merkatuan lehiakorragoak izan daitezen. Beharrezkotzat jo du EB Europako Batasunak lehiaren gaineko araudia aldatzea ere, «txapeldun industrialak» izango diren enpresak sortzeko.

Industriaren geroa trantsizio ekologikoarekin lotuta dagoela ohartarazi du gobernuburuak. «Industria nazio handi bat izan gaitezke berriro ekologiari esker». Argitu du «hazkunde ekologian» sinesten duela, eta ez «deshazkunde berdean».

Iragarri duenez, bere gobernuak 20.000 milioi euro bideratuko ditu ingurugiroaren babesarekin lotutako proiektuetara. Besteak beste, eraikinen eraginkortasun termikoa hobetzera eta garraio sistema jasangarriago bat garatzera.

Castexen iritziz, 100.000 milioi euroko diru funtsaren inbertsioa «hil ala biziko» ahalegina da. Jakina da estatuaren zor publikoa areagotuko duela, baina ziurtatu du koronabirusak eragin duen krisiari ezin zaiola «aurrekontu zorroztasunarekin» erantzun. Zorpetze publiko horrek EBren babesa duela gaineratu du, eta Frantziak babes hori «negoziatzen jakin» duela.

Hain justu, ostiralean elkartuko dira EBko estatu kideak goi bileran, pandemiak sortutako krisiarentzako erantzun bateratu bat adosten saiatzeko.

Ekonomia gaien artean, gizartean protesta gehien eragin duten auzietako bat izan da pentsio sistemaren erroforma. Hura ere aipatu zuen Castexek. Lehen ministroak jakinarazi zuen gobernuak elkarrizketa sorta bat abiatuko duela berriz erreformaren gaineko akordio bat lortzeko, «sistema bakar eta unibertsal bat» eratzeko helburuarekin. Gobernuburuak adierazi du sistema horrek 1.000 euroko gutxieneko pentsioa ezarriko duela.

Macronek uztailaren 3an izendatu zuen Castex lehen ministro, eta gobernua berritu zuen handik hiru egunera. Macronen Errepublika Martxan alderdiak udal hauteskundeetan jaso zituen emaitza kaxkarrek behartuta egin zituen aldaketak. Udal bozetan nabarmena izan zen EELV alderdi ekologistaren gorakada, eta, ordutik, Macronek ingurugiroa babestearen aldeko hainbar adierazpen egin ditu. Castexek Asanblea Nazionalean egin duen lehen hitzaldia izan zen atzokoa.

Asko balio du irakurri duzun albiste/artikulu honek. Talde baten lanaren emaitza da.

Albiste hau zuri helarazteko eta talde honek bere lana baldintza egokietan egin dezan, BERRIAk ezinbestekoa du zure sostengua.

Zure babes ekonomikoarekin, aldi hau kontatzeko funtzioa betetzen jarraitu nahi dugu: kazetaritza konprometitu, kalitatezko eta independentea egiten.

Albiste gehiago

Emakume bat, Ukrainako soldadu bat irudikatzen duen mural baten aurretik pasatzen, Kieven, lehengo astean. ©EFE

Ukrainak segitzen du frontearen hegoaldean presioa handitu nahian

Igor Susaeta

Kievek jakinarazi du bederatzi pertsona hil zituela duela bi egun Krimean egindako bonbardaketan; aldarrikatu du, gainera, Zaporizhian «aurrerapauso handiak» ematen ari dela kontraerasoan
Pertsona batzuk Europako Batasunaren bandera baten aurretik pasatzen, Berlinen. ©OMER MESSINGER / EFE
Ukrainako armadako soldadu bat, tanke bat ondoan duela, aurreko uztailean Donetsk eskualdean (Ukraina). ©OLEG PETRASIUK / EFE

Fronteko lerroa ia ez da mugitu

Igor Susaeta

Hiru hilabete igaro dira Ukrainak kontraerasoa hasi zuenetik, baina ezin izan du eman aurreikusitako aurrerapausorik. Horrek eragina izan dezake Mendebaldearen jarreran.
Brasilgo indigena bat, atzo, herrialdeko Auzitegi Gorenaren aurrean, negarrez, indigenen lur jabetza eskubideari buruzko epaiaren berri izan ostean. ©Andre Borges, EFE

Indigenen jabetza eskubidea mugatzearen kontra ebatzi du Brasilgo Gorenak

Gorka Berasategi Otamendi

Nekazaritza eta abeltzaintza industrialaren lobbyak eta ultraeskuinak aurkeztutako argudioen kontra egin du epaileen gehiengoak. Horiek eskatzen zuten indigenen lurren aitortza mugatzea 1988an okupatuta zituztenetara.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoari esker, gure funtzioa betetzen jarraituko dugu egunero:
jendearen galdera eta kezkekin bat egingo duen kazetaritza bat egiten.