Albistea entzun

Gerra Ukrainan

Xik adierazi dio Putini «antzeko helburuak» dituztela

Kremlineko buruak adierazi du Txinak «ikuspegi orekatua» duela «nazioarteko arazoen aurrean». Kieven arabera, Pekinen egitasmoa aurrera eramateko, Moskuk tropak erretiratu behar ditu Ukrainatik
Xi Jinping Txinako presidentea eta Vladimir Putin Errusiakoa, atzo, Moskun.
Xi Jinping Txinako presidentea eta Vladimir Putin Errusiakoa, atzo, Moskun. SERGEI KARPUHIN / EFE Tamaina handiagoan ikusi

Igor Susaeta - Arantxa Elizegi Egilegor -

2023ko martxoak 21

Txinako estatuburu Xi Jinping Moskura heldu zen atzo, eta Vladimir Putin Errusiako bere homologoarekin bildu zen. Baikor agertu zen Xi aireportura iritsi berritan: «Uste dut bisita hau emankorra izango dela, eta bultzada bat emango diela gaur egun egonkorrak eta osasuntsuak diren Txinaren eta Errusiaren arteko harremanei». Eta areago joan zen: Kremlineko buruarekin bilera informal bat egin zuen, eta adierazi zion Txinak eta Errusiak «helburu berak edo antzekoak» dituztela. Bihar arte egongo da Xi Errusian, eta, besteak beste, Ukrainako gatazkaz eta harreman ekonomikoez mintzatuko da hango agintariekin, Kremlinek zehaztu duenez. Gaur agerraldi bateratua egitekoak dira bi estatuburuak. Aliatu estrategikoak dira bi herrialdeak.

Bisita horretako bien arteko lehen bilera hasi aurretik, Putinek esan zuen Kremlinek «tentuz» aztertu duela Ukrainako auzia konponbidean jartzeko Txinak planteatutako egitasmoa. «Txinak beti ikuspegi orekatua eta justua edukitzen du premiazkoak diren nazioarteko arazoen inguruan». Ukrainako gatazka konponbidean jartzeko egitasmo bat plazaratu zuen Pekinek otsail amaieran, eta, auziari irtenbide bat emateko, «bake elkarrizketak» sustatu nahi ditu eta «rol eraikitzaile bat» jokatzeko asmoa du. Hori jaso zuen hamabi puntuko dokumentu batean; eta, hasteko, su eten bat eskatu zien bi aldeei.

Hain zuzen, Errusiako egunkari batean atzo argitaratutako artikulu batean, Xik zehaztu zuen Ukrainako gerrari irtenbide bat aurkitzeko aurkeztutako egitasmoan jasotzen dela Txinaren munduko ikuspegia, eta proposamen horrek berak balio beharko lukeela krisitik irten ahal izateko, nahiz eta aitortu duen ez dela erraza izango. «Arazo konplexuek ez dute irtenbide errazik», nabarmendu zuen estatuburuak. Xiren arabera, «jarrera inpartziala eta objektiboa du» Txinak. Iazko otsailetik, Errusiak inbasioa hasi zuenetik, Pekinek adierazi izan du herrialde guztien subiranotasuna bezala aintzat hartu behar direla estatu guztien «segurtasun kezka zilegiak». NBE Nazio Batuen Erakundearen batzarretan Errusiaren jokabidea gaitzesteko testuak onartzeko bozketetan abstenitu egin izan da Txina, eta, gainera, ez dio zigor ekonomikorik jarri Moskuri.

Ukrainako Gobernuak espero du Txinak Errusiarengan duen «eragina» baliatzea, gerra amaitzeko. Hala mintzatu zen Oleg Nikolenko Atzerri Ministerioko bozeramailea, ohar batean. Halere, Olekssi Danilov Defentsa eta Segurtasun Nazionalerako Kontseiluko idazkariak idatzi zuen, Twitterren, Txinaren egitasmoa aurrera eraman ahal izateko, Errusiak aurrena tropak erretiratu beharko lituzkeela Ukrainatik.

Putin, Donbassen

EB Europako Batasunak ez du Xiren eta Putinen arteko bileratik «askorik» espero. Hori adierazi zien atzo hedabideei talde komunitarioko funtzionario batek. Azpimarratu zuen, dena dela, Txinaren lidergoarentzat «garrantzitsua» litzatekeela Xik Volodimir Zelenski Ukrainako presidenteari «laguntzea». Txinako estatuburua Ukrainako presidentearekin telefonoz mintzatzekoa da datozen egunetan, aurreko astean haien gertuko iturriak aipatuz zenbait hedabidek kaleratu zutenez.

Bestalde, 2014an Donbassko gatazka hasi zenetik aurreneko aldiz, Putin hara joan zen herenegun; hain zuzen, Errusiako indarrek iazko udaberrian okupatutako Mariupol hiria bisitatu zuen Kremlineko buruak. Gerra frontetik hurbil dauden lekuetara joatea saihestu du azkeneko urtean.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Ione Belarra, Yolanda Diaz eta Irene Montero, duela urtebete Madrilen egindako ekitaldi batean. ©FERNANDO ALVARADO / EFE

Podemos ere batu da Sumarrera, listan Montero egongo den bermatu gabe

Igor Susaeta - Mikel P. Ansa

Ione Belarrak adierazi du Montero «sakrifikatzeko» eskatu diela Yolanda Diazek, eta «bidezko itun bat» galdegin du. Sumarren arabera, zerrendetan «bermatuta» egongo da Podemosen «presentzia»
Gerhard Kraner Austriako Barne ministroa eta Gerald Darmanin Frantziakoa, atzoko bilkuran, Luxenburgon ©JULIEN WARNAND / EFE

EBko estatu kideek 30.000 asilo eskatzaile banatzea adostu dute

Ander Perez Zala

Barne ministroek migrazio eta asilo legeak erreformatzea lortu dute. Zigorrak gogorragoak dira: ukaturiko iheslari bakoitzeko 20.000 euro ordaindu beharko dituzte.

Donald Trump, duela hiru asteko argazki batean ©EFE

Trump inputatu dute, Mar-a-Lagoko sekretupeko dokumentuengatik

Igor Susaeta

AEBetako presidente ohiaren defentsaren arabera, zazpi delitu federal egozten dizkiote; besteak beste, justiziari traba egitea, konspirazioa, eta segurtasun nazionalerako dokumentuak atxikitzea

Gustavo Petro Kolonbiako presidentea, Miguel Diaz-Canel Kubakoa eta Antonio Garcia ELNren lehen komandantea, gaur, Habanako agerraldian ©Kolonbiako Presidentetza

ELNk eta Kolonbiako Gobernuak aldebiko su etena adostu dute

Ander Perez Zala - Arantxa Elizegi Egilegor

Menia abuztuaren 3an sartuko da indarrean, eta urte erdi iraun beharko luke. Akordioak gizarte zibilaren parte hartzea jasotzen du negoziaturikoak arrakasta izateko.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.