Albistea entzun

13/13 auzia. Poliziaren deklarazioak

Poliziak «zantzu» gisa lotu zituen ezizenak 13/13 auziko akusatuekin

Bi poliziak deklaratu zuten atzoko auzi saioan. Uztailaren 26an jarraituko du epaiketak
Auzipetuak eta horiek defendatzen dituzten abokatuak, Auzitegi Nazionalera iristen.
Auzipetuak eta horiek defendatzen dituzten abokatuak, Auzitegi Nazionalera iristen. MARTA JARA / FOKU Tamaina handiagoan ikusi

Jon O. Urain - Berriemaile berezia

2021eko uztailak 15 - Madril

Guardia Zibilak izen-abizen jakin batzuekin lotu zituen dokumentu batzuetan atzemandako ezizenak, «zantzuen fasean», «ikerketa abiatu» ahal izateko. Hala azaldu zuen atzo Guardia Zibilaren Z61382J zenbakidun agenteak, diligentzien idazkariak, 13/13 sumarioaren epaiketako hirugarren saioan. Poliziak susmo batzuekin egin zuen txosten bat, eta horretan oinarritu zen 2010eko apirilaren 14ko operazioa. Zantzuen ondoren iritsi ziren atxiloketak, miaketak, galdeketak eta inkulpazioak, auzian akusazioari sostengua ematen diotenak.

Bi poliziak deklaratu zuten atzoko saioan, lekuko gisa, eta lehena izan zen Z61382J. Azaldu zuenez, bera izan zen Halboka txostena idatzi zuena; Guardia Zibilaren txosten bat zen hori, 2010eko apirilaren 12an auzitegietan erregistratu zutena; sumarioaren abiapuntuan dagoen hamar lagunen atxiloketa baino bi egun lehenago. Hura izan zen egilea, poliziak berak azaldu zuenez, nahiz eta dokumentua ez duen inork sinatzen. Eta horra defentsako abokatuen lehen protesta: ea bera ote zen txostenaren egilea, kontuan hartuta perituen deklarazioetarako beste polizia batzuk deitu dituztela deklaratzera: ustez, txosten horren egileak direnak.

Horri lotutako beste gai batekin ere kexu azaldu ziren abokatuak: Z61382J lekuko gisa ari zen deklaratzen; beraz, hark ikusitakoaz. Baina Halboka txostenaren egilea izanik, txostenaren edukiez ari zen azalpenak ematen; alegia, peritu lanak egiten, nahiz eta ez zegoen horretarako deituta. Murillok behin baino gehiagotan hartu zion kargu fiskalari horregatik.

Izan ere, defentsako abokatuek auzitan jarri zuten haren lekukotasuna, kontuan izanik ezen, 2010eko atxiloketen unean, Madrildik egin zuela atestatu bat. Z61382Jk idatzi zuen atestatu hori, bera egon ez zen miaketa batean oinarrituta, miaketan egon zirenek kontatzen ziotenaren arabera. Jose Maria Elosua defentsako abokatuaren galderei erantzunez, Z61382J zenbakidunak ez zituen gogoratzen atestatuaren inguruko xehetasun asko.

Halbokaz jardun zuen Z61382Jk, eta apenas auzipetuez; esan zuen ez zela egitura berria, eta horri buruzko informazio eguneratua jaso zutela Frantziako Poliziak 2008ko maiatzaren 20an lau pertsona atxilotu eta gero —Xabier Lopez Peña, Ainhoa Ozaeta, Jon Salaberria eta Igor Suberbiola—: «Halboka egitura bat da, aspalditik ezagutzen genuena». Poliziaren esanetan, Halbokaren egitura ikertu zuen Poliziak; horren barruan, ataletako bat zen «fronte juridikoa, erakunde abertzaleetatik gertuko abokatuek osatua». Ordea, ez zuen jakin horri buruzko xehetasun batzuk ematen; esaterako, Alfonso Zenon abokatuak galdetu zion zenbat abokatuk osatzen zuten «fronte juridiko» hori: «Ideiarik ez», izan zen erantzuna.

Era berean, baieztatu zuen CNI Espainiako zerbitzu sekretuek parte hartu zutela ikerketan: «Guk eskatzen genituen datuak ematen zizkigun CNIk; hitzordu bat bazegoen, CNIri eskatzen genion ea horri buruzko zerbait ba al zuten. Ematen ziguten elkarrizketa bat, baina soilik guk eskatutakoari lotutakoa».

«Polemika» dekanoarekin

G17180V zenbakidun guardia zibilaren txanda izan zen hurrena. Arantza Zuluetaren eta Naia Zuriarrainen atxiloketan eta horien bulegoen eta etxebizitzen erregistroan parte hartu zuen, eta atxiloketen eta Bilboko Elkano kaleko bulegoaren erregistroaren xehetasunak eman zituen: bulegotik aterarazi zituztela, eta «une oro» han egon zela idazkari judiziala. Bizkaiko Abokatuen Elkargoko dekanoaren zain egon behar izan zuten, ordu erdi inguruz, eta poliziak aitortu zuen «polemika, eztabaida» izan zutela harekin, dekanoak protesta egin zuelako erregistroarengatik.

Amaitu dira aste honetakoak Espainiako Auzitegi Nazionalean, eta epaiketak uztailaren 26an jarraituko du, guardia zibil gehiagoren deklarazioekin. Saio horietara ez dute joan beharko Naia Zuriarrainek eta Saioa Agirrek, abokatuek eginiko eskaera Murillo epaileak aintzat hartu eta gero.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Ezkabako presoei omenaldia 2014ko maiatzean. ©Idoia Zabaleta / Foku

Ezkaba eta La Cumbre jauregia memoria gune bihurtzea adostu dute EH Bilduk eta Espainiako Gobernuak

Jon O. Urain

Memoria Demokratikorako Legearen aplikazioaren denbora muga 1983ko amaierara arte luzatuko dute. Orain arteko proiektuan, 1936tik 1978ra bitarteko epea hartzen zuen legegaiak.

Bingen Zupiria eta Iñaki Arriola, gaur, Turtziozen. ©Mikel Arrazola / Irekia

Jaurlaritzak «gerra guztien aurka» egin du adierazpen baten bidez

Gotzon Hermosilla

Turtziozen (Bizkaia) egin du Gobernu Kontseiluaren bilera, Agirre lehendakariaren gobernua han ezarri zenetik 85 urtera

EAren kongresua, otsailean, Gasteizen. ©Raul Bogajo / Foku

Gasteizko Auzitegiak ebatzi du EAren kongresuko erabakiak etetea

Jon O. Urain

Otsaileko kongresuan, zuzendaritzak aurrera atera zituen txosten politikoa eta estatutu berria. Boto eskubidea zuten 249 konpromisarioetatik 133k hartu zuten parte. Zuzendaritzak nabarmendu du kautelazko neurria dela eta ez dagoela «Batzar Nazionala baliogabetu duen erabaki judizialik».

Gonzalo Boye pantailan eta Oihana Goiriena eskuinean. ©JAIZKI FONTANEDA / FOKU

Pablo Gonzalez, lau hilabete inkomunikatuta

Iñaut Matauko Rada

Kazetariaren bikotekideak uste du Espainiak «lan gutxi» egin duela. Gonzalezen familiak bi eskutitz bakarrik jaso ditu espetxeratu zutenetik

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...