Memoria historikoa. Francoren gorpuzkiak

Badu ateratzeko ordua

Espainiako Gobernuak etzi aterako du Francisco Franco diktadorearen gorpua Erorien Haranetik. Pardon hobiratuko dute, hedabideen presentziarik gabe
Francoren hilobia, Madrilgo Erorien Haraneko santutegian.
Francoren hilobia, Madrilgo Erorien Haraneko santutegian. JAVIER LIZON / EFE

Ion Orzaiz -

2019ko urriak 22
Etzi izanen da, urriaren 24an, ostegunarekin. Egun horretan aterako dituzte Francisco Franco diktadorearen gorpuzkiak Madrilgo Erorien Haranetik. Momia hobitik ateratzeko ordua ere zehaztu du Espainiako Gobernuak: 10:30ean hasiko dituzte lanak. Hiru bat orduko prozesua izanen da. Sartu, hobia ireki, atera. «Bizkor» egin nahi dute lekualdatzea, ez dadin ikuskizun bihurtu. Lekukoak ere, ahalik eta gutxienak: diktadorearen senideak, auzitegi medikua eta Dolores Delgado Justizia ministroa, notario gisa. Horiez gain, langileak besterik ez.

Hilotza zulotik ateratzeko prozesua bi fasetan eginen dute: lehenik eta behin, 1,5 tonako hilarria altxatuko dute, garabi baten eta arrabolen laguntzaz, eta gero hilkutxa aterako dute, kablez lotuta —1,26 metro sakon da diktadorearen hobia—. Bigarren fasean, berriz, hilobia adreiluz eta porlanez beteko dute, eta gainean harlauza bat jarriko.

Beste hilkutxa bat eramango dute, litekeena baita lurpean dagoena ustelduta egotea, eta, gorpuzkiak batetik bestera aldatu ondoren, helikopteroz eramango dute handik Pardo-Mingorrubioko kanposanturaino. Efe berri agentziak azaldu duenez, armadaren helikoptero bat ere prest dauka Espainiako Gobernuak, Erorien Haraneko aparkalekuan.

Komunikabideak ezin izango dira sartu Erorien Haraneko santutegian eta Mingorrubioko mausoleoan; beraz, ezingo dute eman haren gorpua hobitik ateratzen duteneko irudi gertukorik, ez eta berriro hobiratzen dutenekorik ere. Espainiako Gobernua dena prestatzen aritu da asteburuan, eta Erorien Haraneko bisita guztiak bertan behera utzi zituen. Espainiako Poliziaren eta Guardia Zibilaren kontrolak ezarri dituzte, bai Erorien Haranean, bai Pardoko hilerrian.

Debekuari entzungor eginez, baina, Francisco Franco fundazioak elkarretaratze bat antolatu du etziko, Pardo-Mingorrubioko kanposantuan. «Omenaldia eginen diogu Espainiaren handitasunaren alde hainbeste egin zuen hari. Lorez eta otoitzez beteko dugu panteoia», esan dute elkarretaratzera deitzeko oharrean.



Prozesu gorabeheratsua

Espainiako Gobernuak iazko abuztuaren 24an hasi zuen Francoren hilotza Erorien Haranetik ateratzeko bidea. Asmo hori iragarri zuenetik, baina, diktadorearen zazpi bilobek hamaika helegite eta alegazio aurkeztu dituzte.

Iragan abuztuan, prozesua behin-behinean eteteko agindua eman zuen Espainiako Auzitegi Goreneko Jose Yusti epaileak, «lanen tamaina handia» argudio gisa hartuta. Irailean, ordea, Gorenak arrazoia eman zion Espainiako Gobernuari, Franco hobitik ateratzea «obra txikia» eta «legearen araberakoa» delako.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna
Ion Orzaiz

Informazio osagarria