Albistea entzun

Koronabirusa

Alarma egoeraren ostekoa kudeatzeko erak nahasmena eragin du Hegoaldean

Nafarroako mugak igandean irekiko dituzte, baina epaileen esku dago etxeratze aginduari eustea. EAEko fiskaltza joan-etorriak mugatzearen kontra agertu da
Ertzaintzaren kontrol bat, iragan apirilean, Gasteizko irteeran.
Ertzaintzaren kontrol bat, iragan apirilean, Gasteizko irteeran. ENDIKA PORTILLO / FOKU Tamaina handiagoan ikusi

Ion Orzaiz - Uxue Rey Gorraiz - Mikel P. Ansa -

2021eko maiatzak 6

Espainiako Gobernuak igandean indargabetuko du alarma egoera eta, hiru egun falta direla, ez dago argi nola kudeatu beharko duten errealitate berria Hego Euskal Herriko administrazioek. Bide orri propioa diseinatzen ari dira Eusko Jaurlaritza eta Nafarroako Gobernua, nor bere aldetik, baina badakite epaileen oniritzia beharko dutela zenbait neurri murriztaileri eusteko.

Oraingoz, Nafarroako Gobernua da kartak mahai gainean jarri dituen bakarra: Javier Remirez lehendakariordeak atzo azaldu zuenez, itxiera perimetrala indargabetu eginen da igandetik aitzinera, eta, beraz, baimendua izanen da mugak zeharkatzea, ateratzeko zein sartzeko. Dena dela, litekeena da zenbait oztopo izatea Euskal Herriko beste herrialdeetara mugitzeko. Adibidez, oraindik ere ez da garbi Nafarroatik Gipuzkoara eta Arabara sartzea baimendua izanen den, Jaurlaritzak dekretu bidez eutsi nahi baitio itxiera perimetralari. Gainera, Nafarroatik Ipar Euskal Herriko lurraldeetara joan ahal izateko, ezinbestekoa da PCR negatiboa —muga ondoko herrietako biztanleek salbu—. Kontrako noranzkoan, Iparraldetik Nafarroa Garaira joateko, funtsezko arrazoiengatik baizik ezin da muga zeharkatu.

Mugimendu askatasunari dagozkion aldaketez gainera, behin alarma egoera bukatuta, posible izanen da eremu pribatuetan etxe berekoak ez diren sei lagun biltzea orain arte, bizikideak soilik bil zitezkeen; bi bizikidetza unitate elkartzen ahalko dira, gehienez. Ostalaritzari eragiten dioten neurriak ere arinduko dituzte: terrazak 22:00ak arte izanen dira zabalik, eta hilaren 20an aztertuko dute barnealdeak ireki edo ez.

Etxeratze aginduari dagokionez, berriz, Nafarroako Gobernuaren asmoa da orain arte bezala mantentzea 23:00etatik 06:00ak arte, baina Nafarroako Justizia Auzitegi Nagusiaren oniritzia beharko du hori eta beste neurri batzuk ezartzeko.

Jaurlaritzaren plana, auzitan

Eusko Jaurlaritzak ere prest du alarma egoeraren ostekoa kudeatzeko dekretu baten zirriborroa, eta asteartean igorri zion EAEko Auzitegi Nagusiari, maiatzaren 10ean indarrean jartzeko xedez. Fiskaltzak, ordea, ez du bat egin Jaurlaritzaren ikuspuntuarekin. Iruditzen zaio ezinezkoa dela Euskal Autonomia Erkidegoan, probintzietan eta herrietan ere sartu-irtenak mugatzeko asmoa eta etxeratze agindua arautzea behin alarma egoera bukatuta. «Oinarrizko eskubideak mugatuko dituzten neurriak salbuespenezkoak dira, eta ezin dira ezarri jende multzo zehaztugabeentzat, indarrean dauden osasun legeetan oinarrituta», irakur daiteke fiskalaren txostenean. Jende bilerak mugatzeko bai, aukera ikusten du fiskalak, biltzeko eskubidea urratzen ez delakoan. Epaileak gaur aztertuko du dekretuaren zirriborroa, eta bihar ezagutarazi.

Polemika ere sortu da horren harira, Miguel Angel Revillak esan baitu Urkulluk itxiera perimetralari eusteko asmoa jakinarazi ziola; lehendakariak, ordea, atzo ukatu egin zuen Revillari halakorik esan izana. Bihar fiskaltzaren jarrera nagusitzen bada, Hegoaldeko lurraldeen artean zirkulatzeko aukera izango da urritik aurreneko aldiz, igandetik aurrera.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Hizkuntza gutxituen esparruko ehundik gora eragilek sinatu zuten Hizkuntza Eskubideak Bermatzeko Protokoloa, 2016an, Kursaalen. ©ARITZ LOIOLA / FOKU

Sare berriak, eragiteko

Ion Orzaiz

Kontseiluak hizkuntza politikak eraldatzeko bide orria aurkeztuko du bihar. Ehun bat eragilek eta entitatek bat egin dute agirian jasotako helburuekin

Eskoriatzako Arizmendi-Almen ikastolaren eremua ur azpian, 'Goiena.eus'-ek zabalduriko bideo bateko irudian. ©Goiena

Kalte handiak eragin dituzte ekaitzek Euskal Herriko hainbat lekutan

Berria

Debagoienan, Iruñerrian eta Gasteizen hainbat kale eta lokal hartu ditu urak.

Kalean maskararik gabe ibil zitezkeen atzo Ipar Euskal Herrian. ©BOB EDME

Arintze neurriak zabaltzen hasi dira Euskal Herrian, iragarpen berrien atarian

Juanma Gallego

Iparraldean maskara jada ez da nahitaezkoa aire zabalean. Nafarroan martxan dira neurri berriak. Jaurlaritzak gaur iragarri behar ditu bereak

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna