Albistea entzun

Koronabirusa

Jaurlaritzak osasun larrialdia atzera ezarriko du ZIUak betetzen badira

ZIUetan 50 kutsatu larriren langa gaindituz gero, Eusko Jaurlaritzak neurriak zorroztea aztertuko du. Espainiako Gobernuari eskatuko dio nahitaezkoa izatea maskara kanpoaldean jantzita eramatea
Jendea maskara jantzita Beasainen (Gipuzkoa), artxiboko irudi batean.
Jendea maskara jantzita Beasainen (Gipuzkoa), artxiboko irudi batean. JON URBE / FOKU Tamaina handiagoan ikusi

Edurne Begiristain - Uxue Rey Gorraiz - Ion Orzaiz -

2021eko azaroak 24

«Ez goaz ondo; hau geldiarazi beharra dago». Pandemiaren eboluzioa neurtzeko datuak gero eta ilunagoak direla ikusita, Eusko Jaurlaritza neurriak hartzeko prest dagoela ohartarazi zuen atzo Gotzone Sagardui Eusko Jaurlaritzako Osasun sailburuak. Erietxeei erreparatuko die horretarako: ZIUetako presioak gora eginez gero, osasun larrialdia berriz ezartzea aztertuko du. Pandemiaren aurkako legeak eskaintzen dituen tresnak baliatuta ezarriko luke osasun larrialdia Jaurlaritzak, Sagarduik azaldu zuenez. Zehazki, Osakidetzaren ardurapeko ZIU zainketa intentsiboetako unitateetan COVID-19ak jotako 50 gaixo baino gehiago baldin badira eta gainerako adierazleen joera negatiboek bere horretan jarraitzen badute emango dute pausoa: orduan aztertuko dute osasun larrialdia berriz ezartzea. Egun, 31 gaixo dira ZIUetan.

Diagnostiko zehatzagoa aurkezte aldera, izurriteari buruzko beste datu batzuk ere plazaratu zituen Sagarduik: herenegun, 785 kasu positibo atzeman ziren Araban, Bizkaian eta Gipuzkoan; igandean baino 97 gehiago, alegia. Egoera ikusirik, Sagarduik dei berezia egin zien Araban, Bizkaian eta Gipuzkoan ekitaldiak antolatzen dituzten eragile, erakunde eta pertsonei joan den astean Osasun Sailak ezarritako arauak «bete» eta «betearazi» ditzaten.

Azken asteotan, Jaurlaritzak sarritan ohartarazi du izurriaren bilakaera makurtzen ari dela; atzo, neurri murriztaileagoak hartzeko aukera lehen aldiz jarri zuen mahai gainean. Arabako, Bizkaiko eta Gipuzkoako bilakaera epidemiologikoa «okerrera» doalako, birusa hesitzeko hainbat proposamen egin zituen Sagarduik. Osasun larrialdia berrezartzea ez ezik, beste hainbat neurri ere hartzea proposatu zuen: kanpoaldean maskara jantzita eramatea derrigorrezkoa izatea, COVID ziurtagiriaren erabilera arautzea, koronabirusaren aurkako hirugarren dosia emateko prozesua «aurreratzea», eta, EMA Europako Sendagaien Agentziak onetsi ostean, «mekanismo guztiak» erabiltzea haurrei COVID-19aren aurkako txertoa ahalik eta arinena jartzen hasteko. Proposamenok Lurralde Arteko Osasun Batzordearen bilerara eramango ditu gaur, Madrilera.

Tresna juridikoen premia

EAEko Auzitegi Nagusiak COVID ziurtagiria derrigor ezartzearen aurka agertu izana deitoratu zuen Sagarduik, halaber. «Auzitegiak gutxietsi egin du birusaren hedatzeak pertsona askoren osasunarentzat dakarren arriskua. Guk proposatutako neurriak arrisku horri egokituta zeuden». Auzitegiari egindako kritiketatik harago, Sagarduik azpimarratu zuen agerian geratu dela bide juridikoak ez duela balio COVID-19aren goranzko garapena geldiarazteko. Hori dela eta, Espainiako Gobernuari galdegin zion pandemiaren gorakada geldiarazteko neurriak hartzeko modua ematen duten tresna juridikoak sortzeko. «Neurriak behar ditugu, hemen eta orain».

Alderdi politikoen artean ere harridura sortu du EAEko Auzitegi Nagusiaren erabakiak. Eneko Andueza PSE-EEko idazkari nagusiak atzo adierazi zuen errespetatzen duela helegiterik ez aurkezteko Jaurlaritzak hartutako erabakia, baina bestelako hautua egingo lukeela berak: «Bide hori irekita duen heinean, jorratuko nuke». Carlos Iturgaitz EAEko PPko presidentearen ustez, berriz, Jaurlaritzak ez du eskaria behar bezala arrazoitu eta horregatik ez du justiziak ontzat jo. «Jaurlaritzak ez du etxeko lanik egin, eta autokritika egin behar du». Itsaso Atutxak EAJko Bizkai Buru Batzarreko presidenteak, berriz, onartu zuen «etsigarria» dela EAEko Auzitegi Nagusiak Jaurlaritzari atea zazpigarrenez itxi izana.

Nafarroako Gobernuak, berriz, gaur aurkeztuko du COVID ziurtagiria arautzeko foru agindua, neurria larunbatetik aurrera indarrean jartzeko xedez. Osasun kontseilari Santos Indurainek uste du Nafarroako Justizia Auzitegi Nagusiak baimena emanen diela neurria ostalaritzan eta beste hainbat zerbitzutan derrigor ezartzeko. Ziurtagiriaren helburua «txertatze kopuruei bultzada ematea» dela azaldu zuen kontseilariak, eta zehaztu zuen gobernuak ez duela bestelako murrizketarik planteatu: «Gure B plana prebentzio neurriak dira».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Kote Cabezudo, 2018an haren kontra egin zuten epaiketa saio batetik ateratzen. ©Juan Carlos Ruiz / Foku

Kote Cabezudo argazkilariari 28 urteko zigorra jarri diote

Jon O. Urain

Gipuzkoako Probintzia Auzitegiak bortxaketa delitu bat, sexu abusuen beste bat, haur pornografiako sei eta bi iruzur delitu egitea egotzita zigortu du.

Haur bat eskolan, artxiboko irudi batean. ©Jon Urbe / Foku

Hiru herritarretik bik babesten dute ikasleen «euskalduntzea bermatzeko tresnak» jartzea

Jon O. Urain

Naziometroaren laugarren neurketaren arabera, Espainiako eta Frantziako estatuen lurralde antolaketarako formula batzuk aukeratzean lehen aukera da oraindik ere «erkidegoei erabakitzeko eskubidea aitortzen» dien estatua (%31,5).

Eraso homofobo eta matxisten aurkako protesta bat Zornotzan, artxiboko irudi batean. ©Marisol Ramirez / FOKU

Eraso matxista bat salatu dute Zornotzan

Berria

Larunbat goizaldean gertatu zen. Elkarretaratze bat egingo dute gaur eraso matxista gaitzesteko: 18:30ean izango da, plazan.

Milaka lagun elkartu dira gaurko mobilizazioan Bilbon. ©Monika del Valle / Foku

Osakidetza «desegiten» ari dela salatu dute sindikatuek Bilbon

Berria

SATSE, ELA, LAB, CCOO, UGT eta ESK sindikatuek deitu dute manifestaziora, eta milaka lagun elkartu dira. Osasun publikoaren alde egin dute, eta hura pribatizatzeko joera gaitzetsi.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...