Albistea entzun

Aragones: «Negoziatzera behartzea da estrategia irabazle bakarra»

Generalitateko buruaren esanetan, Espainiako Gobernuak «errepresioa amaitzen lagundu» behar du hitz egitea «askoz ere zailagoa» izan ez dadin. Juntsek eta CUPek gaur erantzungo diote
Pere Aragones Kataluniako presidentea eta Jordi Puignero presidenteordea (atzean), atzo, Kataluniako Parlamentuan..
Pere Aragones Kataluniako presidentea eta Jordi Puignero presidenteordea (atzean), atzo, Kataluniako Parlamentuan.. ANDREU DALMAU / EFE Tamaina handiagoan ikusi

Gorka Berasategi Otamendi -

2021eko irailak 29

Espainiako Gobernuarekin negoziazio mahaian esertzearen kontrako ahotsak harrotu ditu Carles Puigdemont Kataluniako presidente ohiaren atxiloketak. Hura Sardiniako Algheron atxikita eduki eta lau egunera, baina, negoziazioaren aldeko apustua berretsi du Pere Aragones Kataluniako presidenteak. Kataluniako Parlamentuan atzo hasi eta gaur amaituko den politika orokorreko eztabaidan, argi utzi du ez duela mahaitik altxatzeko asmorik. «Egun daukagun indar harremanarekin, estrategia irabazle bakarra dago independentzia lortzeko: Espainiako Estatua negoziatzera behartzea, eta [independentistak] gehiago eta indartsuago izateko lan egitea», adierazi zuen atzo, eztabaidaren lehen hitzaldian. Taldeek gaur erantzungo diote. Juntsek eta CUPek Espainiarekiko jarrera gogortzeko eskatzea espero da.

Bi alderdi horiek negoziazio mahaiarekiko mesfidantza agertu dute jendaurrean hura eratu zenetik, eta konfiantza eskasia hori are handiagoa da joan den ostiraletik, Italiako Poliziak Espainiako justiziaren eskariz Puigdemont atxilotu zuenetik. Juntsen eta CUPen iritziz, Espainiako Gobernuak «ez du gatazka politikoa gainditzeko borondaterik», eta hala frogatzen du Puigdemonten kontrako «jazarpen judizialak».

Hori dela eta, CUPek autodeterminazioa gauzatzeko B plan bat zehaztea eskatu dio Generalitateari. Antikapitalistek beren proposamena aurkeztuko dute politika orokorreko eztabaidan: Legealdi honetan autodeterminazio erreferendum bat antolatzea.

Aragonesen esanetan, baina, independentismoak ezin ditu elkarrizketarako espazioak baztertu. Espainiarekin martxan den negoziazio mahaia «aukera historikoa» da, eta hura «aprobetxatu» behar dute. Generalitateko buruari «normala» iruditzen zaio politikari independentistak Madrilekiko «eszeptiko» agertzea. Are gehiago, independentismoa «eszeptiko izatera behartuta» dago, baina, baita negoziaziorako saiakeran «ahalegin guztia» egitera ere.

Estatu independente bilakatzeko, Kataluniak ezinbestean beharko du nazioarteko komunitatearen aitortza, eta Aragonesek ulertzera eman du nazioartean badela nolabaiteko eragin bat Kataluniako eta Espainiako gobernuen arteko negoziazioen alde. «Hain justu, nazioarteko komunitateak ere bultzatu gaitu negoziazio prozesu honetara».

Independentismoak egiazko ahalegina egin arren, mahaian akordio bat lortuko ez balitz independentismoa indartuta atera daitekeela uste du gobernuburuak. «Estatuak negoziaziorako aukera baliatuko ez balu, agerian utz dezake, prozesuari kanpotik eta barrutik begira ari direnen begietara, ez duela irtenbide politiko baterako proposamen bat egiteko egiazko borondaterik». Oraindik ere Espainiako Gobernuak Kataluniako gatazka gainditzeko proposamenik ez duela aurkeztu nabarmendu du.

Bidean zailtasun handiak izango dira, horretaz ziur dago Aragones. Negoziazioa «izugarri konplexua» izango dela ohartarazi du. «Badakigu zein izango den estatuko gobernuaren tentazioa. Prozesu independentista lozorrora eramatea, zatiketa lortu nahi izatea eta ahalik eta kontzesiorik txikienak egitea». Horri aurre egiteko, mugimendu independentistaren «erabakimena» eta «batasuna» galdegin ditu, «helburu ahalik eta handienak lortzeko».

Gobernu bat, bi ahots

Ez zen batasunik izan mahaiaren azken bileran. Negoziaziorako gunea irailaren 15ean berreskuratu zuten bi gobernuek, baina Generalitatearen aldetik ERCko ordezkariek soilik hartu zuten parte, agintean haren koaliziokide den Juntseko kiderik gabe. Aragonesek ez zuen Juntsen ordezkaritza proposamena onartu, Jordi Puignero presidenteordea salbu, izendatutakoak ez zirelako gobernuko kide. Erabakiak berriro ere gaiztotu zituen ERCren eta Juntsen arteko harremanak.

Handik egun gutxira, Puigdemonten atxiloketak are gehiago urrundu zituen bi indarren diskurtsoak. Elsa Artadi Juntseko bozeramaileak azalpenak eskatu zizkion Madrili, eta Pedro Sanchez Espainiako presidentea jo zuen Puigdemonten atxiloketaren «arduraduntzat».

Aragonesek atxiloketaren arduratik salbuetsi du Espainiako Gobernua, baina neurriak hartzera deitu du. Presidentearen hitzetan, halako gertaerek «ez diote batere laguntzen konponbide prozesuari». Gaineratu duenez, «Espainiako Gobernuak errepresioa amaitzen laguntzen ez badu, askoz ere zailagoa izango da hitz egitea».

Asteburuan hainbat mobilizazio izango dira Katalunian 2017ko urriaren 1eko erreferendumaren urteurrenarengatik, eta Generalitateak ekitaldi instituzionala egingo du. Astelehenean, Puigdemontek Sardinian deklaratuko du, Espainiak igorritako euroaginduaren harira.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©BERRIA

«Israeli ez zaio axola erosleak zertarako darabilen Pegasus»

Joan Cabases Vega

Macken ustetan, programa erabiltzearen harira sortutako eskandaluek estatu judua «indartu» dute: «Diktadoreek atsegin dute Pegasus, eta demokrazietan ere badute jada, edo eskuratu nahi dute».
Zelenski Ukrainako presidentea —eskuinean— Costa Portugalgo lehen ministroarekin batzartu zen atzo, Kieven. ©EFE

Zelenskirentzat, Ukrainako gerraren amaiera «diplomatikoa» izango da

Ander Perez Zala

Erresuma Batuak Moldaviarentzako laguntza militarra biltzeko aukera ekarri die hizpidera aliatuei. Finlandiak esan du elkarrizketa «ireki eta zuzenekoak» hasi dituela Turkiarekin NATOn sartzeaz
Filipinetako zenbait gazte saskibaloian jokatzen, artxiboko irudi batean. ©FRANCIS.R / EFE

Filipinetako bi milioi nerabe sexu abusuen biktima dira sarean

Zuriñe Iglesias Sarasola

Filipinetako haurrek tentu handiz ibili behar dute amaraunera konektatzen diren bakoitzean. OCSEA erakundeak apirilean argitaratutako txostenaren arabera, 12-17 urteko bost nerabetik batek Internet bidezko sexu abusuak jasan zituen 2020an.

Laboristek irabazi dituzte Australiako hauteskundeak

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...