Albistea entzun

Aurreikuspen beldurgarria

Osasunaren Mundu Erakundearen kalkuluen arabera, COVID-19ak oraingo joera kutsakorrari eusten badio, 2022ko martxoa bitartean beste 700.000 hilko ditu Europan eta Asia erdialdean
Berlin erdiguneko kale bat hutsik, herenegun. Berlin landerreko senatuak murrizketa gehiago ezarri dizkie txertatuta ez daudenei.
Berlin erdiguneko kale bat hutsik, herenegun. Berlin landerreko senatuak murrizketa gehiago ezarri dizkie txertatuta ez daudenei. FILIP SINGER / EFE Tamaina handiagoan ikusi

Igor Susaeta -

2021eko azaroak 24

OME Osasunaren Mundu Erakundeak egindako aurreikuspena beldurgarria da: hurrengo aste eta hilabeteetan COVID-19ak oraingo joera kutsakorrari eusten baldin badio, 2022ko martxoa bitartean 700.000 bat lagun gehiago hilko dira Europan eta Asia erdialdean —53 estatutan guztira— gaitzak jota. OMEren Europako zuzendari Hans Klugek ohar batean nabarmendu duenez, pandemiaren «kontrol sendoaren pean» daude Europa eta Asia erdialdea. Erakundeak plazaratutako datuen arabera, Europako herrialdeetan eta Asia erdialdekoetan 4.200 pertsona hiltzen ari dira batez beste egunero birusaren ondorioz; hau da, irailaren bukaerako kopurua halako bi. Pandemia hasi zenetik 1,5 milioi lagun inguru zendu dira 53 estatu horietan gaitzarengatik.

«Birus honekin bizitzeko eta gure eguneroko bizimoduarekin jarraitzeko, txertaketatik haragoko ikuspegi bat behar dugu. Horrek esan nahi du dosi estandarra jartzea, gehigarria ere bai eskainia baldin bada; baita prebentziozko neurriak hartzea ere gure egunerokoan», azpimarratu du Klugek. Birusa erakusten ari den joerari erreparatuta, beste aurreikuspen bat ere egin du erakundeak. 53 herrialde horietako 25etan, ospitaleetan pazienteak artatzeko oheen faltan egongo dira martxora bitartean, eta 49tan estres handia edo muturrekoa izango dute ZIU zainketa intentsiboetako unitateetan.

COVID-19aren transmisioa handia da Europan, eta, OMEren ustez, hori gertatzen ari da delta aldaeraren transmisio gaitasuna besteena baino handiagoa delako, gaitza pasatu dutenen edo txertatutakoen immunitatea apaltzen ari delako, baita zenbait gobernuk murrizketak arindu dituztelako ere, eta modu horretan herritarrei adierazi dietelako, OMEren esanetan, pandemia jada ez dela «mehatxu arriskutsu bat».

Europan eta Asia erdialdean 1.000 milioi txerto dosi jarri dituzte, eta herritarren %53,5ek jarrita dituzte txertoaren bi dosiak. Nolanahi ere, horri dagokionez alde handiak daude estatuen artean: batzuetan %10era ere ez dira iristen, eta beste batzuetan %80tik gora dabiltza.

Herbehereetan, esate baterako, herritarren %72k hartu dituzte txertoaren bi dosiak, eta azkeneko egunetan txertatutako 20.000 positibo inguru detektatu dituzte. Horiek horrela, izurriak aurrez eragindako beste olatu batzuetan gertatu bezala, hasi dira gaitzarekin kutsatutako pazienteak Herbehereetako ospitaleetatik Alemaniakoetara eramaten —mugakideak dira—. «Tokia egiteko, eta COVID-19a dutenek eta beste pazienteek ZIUetako oheak eduki ditzaten» hartu da erabakia, iturri ofizialek jakinarazi dutenez. Lehen pazientea atzo aldatu zuten lekuz: Rotterdametik (Herbehereak) Bochumera (Alemania). 235 bat kilometro daude bi hirien artean. Kasuen gorakadarengatik, gobernuak murrizketak ezarri zituen atzera azaroaren 12an, eta etzi dira horiek berrikustekoak.

Suitzan bidea ireki diote txertaketarekin loturiko neurri bati: herrialdeko sektore farmazeutikoa arautzen duen erakundeak jakinarazi du 16 urtetik gorako herritar guztiek txertoaren hirugarren dosia hartzeko modua edukiko dutela. Horretarako, baldintza bakar bat bete behar dute: bigarrena hartuz geroztik sei hilabeteko epea igarota egotea.

Berlingo neurriak

Alemanian neurri zorrotzak ezartzea aztertzen ari dira kasuen gorakadari erantzuteko, eta Berlin landerreko senatuak murrizketa gehiago ezarri dizkie txertatuta ez daudenei. Horrela, txertatuta ez daudenek ezin izango dute sartu denda txikietara, premiazko produktuak saltzen dituztenetara salbu. Gainera, immunizatuta daudenek test negatibo bat aurkeztu beharko dute maskara erabiltzea ezinezkoa den aisialdi guneetan: esaterako, jatetxeetan. Kontzertuetan eta kirol ekitaldi handietan edukiera murriztuko dute.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Melillako hesiak marraztak izan ohi ditu goialdean, Marokok kontrolatzen duen aldean. ©MARIA TRASPADERNE / EFE

Itsasoak ere baditu mugak

Jone Arruabarrena

Burdinazko hesi batek inguratzen du Melilla; mendietatik hasi eta itsasoraino hedatzen da. Herritar batzuek ihesi datozen migranteei laguntzen diete.

AEBetako jatorrizko herrien protesta bat, artxiboko irudi batean. ©E. GARCIA / EFE

Ezin eska indigenei besteek ezin dutena

Urtzi Urrutikoetxea

Erreserbak lurralde subiranoak izanik, abortatzeko debekutik kanpo daudela iradoki dute, baina asko uzkur daude. Begiradak oraintxe bideratu dira jatorrizko herrietara, baina gogoratu ere ez dira egin haietaz hamarkadotan utzikeria sufritu dutenean.

Serko Kaniwar da Zarok TV telebista kateko aurkezleetako bat. ©BERRIA

Haurrentzako telebista kate batek bizirik eusten dio kurduerari

Lara Villalon

Zarok TV kateak emititzen jarraitzen du, Ankarak aginduta itxi zuten arren. Kurdueraren dialekto guztietan ematen ditu saioak, eta helduek ere ikusten dute, hizkuntza ikasteko.
Polizia operazioaren kontrako manifestazio bat. ©BERRIA

Erdoganek prentsa librea isilarazi du

Orsola Casagrande

Iragan ekainaren 8an polizia operazio bat egin zuten zenbait kazetariren eta hedabideren kontra, Diyarbakirko fiskalak aginduta: hogei kazetari hartu zituzten atxilo. Turkiako Gobernuak prentsa askea mugatu nahi du.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...