Albistea entzun

CNIko zuzendariaren kargugabetzea «huts egin izanarekin» lotu du Sanchezek

Espainiako presidenteak kritika uholde bati erantzun behar izan dio. PP mintzatu zaio gogorren Sanchezi. Independentistek ez dute itxitzat jo espioitza kasua
Pedro Sanchez Espainiako Gobernuko presidentea, atzo, Kongresuan, CNIko burua kargutik kentzeari buruzko azalpenak ematen.
Pedro Sanchez Espainiako Gobernuko presidentea, atzo, Kongresuan, CNIko burua kargutik kentzeari buruzko azalpenak ematen. JUAN CARLOS HIDALGO / EFE Tamaina handiagoan ikusi

Mikel O. Iribar -

2022ko maiatzak 12

Pegasus softwarearekin egindako espioitza kasuek harrabotsa eragin dute Espainiako eztabaida politikoan, eta, atzo, Espainiako Kongresuan izan zituzten hizpide, gobernuak Paz Esteban CNI zerbitzu sekretuetako zuzendaria kargutik kendu eta biharamunean. Pedro Sanchez Espainiako presidenteak esan zuen gobernuko komunikazioen segurtasunean izandako «hutsegite larri batek» eragin duela CNIko zuzendaritzaren «aldaketa». Segidan, Sanchezek kritika gogorrak egin zizkion Alderdi Popularrari, eta «eskuineko zoritxarra» dela leporatu zion, oposizioaren gaitzespen uholdeari aurre egiteko.

Hain zuzen ere, Cuca Gamarra PPko Kongresuko bozeramaileak Sanchezi adierazi zion gobernuak hartu berri duen erabakiak argi uzten duela Espainian «independentistek» agintzen dutela, eta presidenteari «politikaren erabateko degradazioa» ordezkatzea egotzi zion. Biek ala biek tonu gogor eta oldarkorra erabili zuten Kongresuan.

Kritika oldeari erantzunez, Espainiako presidenteak jakinarazi zuen CNIko zuzendaritzan aldaketak egin dituztela, goi kargudunetatik hasita. Ez zuen xehetasun gehiagorik eman, eta eskertu egin zuen kargutik kendutako CNIko buruaren eta kide guztien lana.

Jarraian, Sanchezek azpimarratu zuenez, haren gobernuak ez du inoiz PPk Mariano Rajoyren agintaldian jokatu zuen modura jokatuko. Popularrei leporatu zien «funts publikoak, estatuko segurtasun indarrak eta inteligentzia zerbitzuak erabiltzea delituzko ekintzak estaltzeko eta aurkari politikoei jazartzeko». Era berean, adierazi zuen «handi-mandirik» ez dagoela gobernuan; «PPren agintaldian bai, ordea».

Gamarrak, berriz, independentisten boterearekin lotu zuen CNIko zuzendaritza kargutik kendu izana, eta gobernuari mezu hau bidali zion: «Bere betebeharra betetzen duena kargutik kenduko dute, baina gezurra esaten duena eta gobernuaren mesedetan manipulatzen duena saritu egingo dute». PPko Kongresuko bozeramaileak gogorarazi zuen CNIk gobernuko presidenteari ematen diola informazioa, eta adierazi zuen Sanchezek bazekiela Espainiako zerbitzu sekretuetako burua zertan ari zen. «Baina jakin duguna zera da, gobernabidea negoziatzen zenuela estatuak ikertu behar zituen alderdi politikoekin, eta hori ez da beste edozein herrialdetan gertatzen, politikaren erabateko degradazioa baita, eta hori da zuk ordezkatzen duzuna».

ERCko bozeramaile Gabriel Rufian, berriz, Espainiako Defentsa ministro Margarita Roblesi mintzatu zitzaion, eta leporatu zion «patriotismo toxikoa» sustatzea, berariaz dimisioa eskatu gabe. «Errealitate gordina da politikariak zelatatu direla, eta agian oraindik zelatatzen ari direla», azpimarratu zuen Rufianek.

Bestalde, Kongresuko Konstituzio Batzordea egin zuten atzo, eta Pegasus auziaz mintzatu ziren. Mertxe Aizpurua EH Bilduko eledunak nabarmendu zuen «logikoa» dela CNIko buruak kargua uztea: «Baina horrek ez ditu argituko zalantzak. Inork ez digu sinetsaraziko Esteban [Paz, CNIko buru ohia] zela espioitza kasuen berri zuen bakarra». Mikel Legarda EAJkoak salatu zuenez, jeltzaleek bultzatu duten Idazkaritza Ofizialen Legearen erreforma «baltsamatu» egin da. Ekimen handirik ez izatea leporatu zion PSOEri. Podemosek, berriz, Roblesi eskatu zion deitu ziezaiola Israelek Espainian duen enbaxadoreari, hango gobernuak «gainbegiratzen» baitu Pegasus.

Kargutik kentzea, ez aski

Pere Aragones Kataluniako Generalitateko presidenteak ez du itxitzat jo Pegasus sistemarekin independentisten aurka egin den espioitza kasua, eta, CNIko zuzendaria kargutik kentzea ez ezik, beharrezkotzat jo zuen entzuketak «agindu» zituenak «erantzukizun politikoak» bere gain hartzea ere.

Laura Borras Kataluniako Parlamentuko presidentearentzat ere, «ez da nahikoa» CNIko burua kargutik kentzea, eta ikerketa «sakona» egitea galdegin zuen. Borrasek «ke laino bat» egin nahi izatea egotzi zion Espainiako Gobernuari.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

NATOko idazkari nagusia, atzo, Suediaren eta Finlandiaren eskariak jaso berritan, Bruselan. ©JOHANNA GERON / EFE

Turkiak oztopatu egin du Finlandia eta Suedia NATOra batzeko lehen pausoa

Mikel O. Iribar

Aliantzak aho batez onetsi behar du eskaria. Mariupolen beste 694 soldadu «errenditu» dira
Australiako arbolen heriotza tasa bikoiztu egin da 1980tik

Australiako arbolen heriotza tasa bikoiztu egin da 1980tik

Uxue Rey Gorraiz

Nature aldizkariaren arabera, klima aldaketak eragin du zuhaitzen bizialdien murriztea. Ohartarazi dutenez, baso tropikalak «giltzarri» dira klima larrialdia geldiarazteko; ordea, «oso kalteberak» dira aldaketen aurrean. 2.305 hil dira 1971tik.

Bero olde bat pairatz ari dira Pakistanen. Argazkian, pertsona bat beste bati bustitako xukadera bat kopetan, jartzen, herenegu Karatxin. ©EFE

Klima larrialdiarekin lotutako lau adierazlek markak hautsi zituzten iaz

Igor Susaeta

Munduko Meteorologia Erakundearen azken txostenaren datuek «argi» erakusten dute «giza ekintzak ari direla mundu mailan aldaketak eragiten Lurrean, ozeanoan eta atmosferan, eta horiek ondorio kaltegarriak eta iraunkorrak dituztela ekosistemetan eta garapen jasangarrian».

Kenyako Gabra komunitateko artzain bai, lehorteak hildako bere ganaduari begira, joan den urtarrilean. ©Daniel Irungu, EFE

Afrikako Adarrera laguntza bideratzeko beharraz ohartarazi dute, giza hondamendia eragozteko

Gorka Berasategi Otamendi

Oxfam Intermon eta Save The Children gobernuz kanpoko erakundeen arabera, 23 milioi pertsona daude muturreko gosea pairatzeko arriskuan. Azken 40 urteetako lehorterik gogorrena dute eskualde horretan.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.