Albistea entzun

Gerra Ukrainan

Macronek eskatu du Errusiaren segurtasun bermeak aintzat hartzeko

Frantziako presidenteak elkarrizketa batean adierazi duenez, Putinek gerraren amaiera negoziatzea onartzen baldin badu, aintzat hartu behar da NATO «bere ateetaraino heltzeko duen beldurra»
Macron eta Putin prentsaren aurrean, joan den otsailaren 7an Moskun egindako bileraren ondoren.
Macron eta Putin prentsaren aurrean, joan den otsailaren 7an Moskun egindako bileraren ondoren. EFE Tamaina handiagoan ikusi

Igor Susaeta -

2022ko abenduak 4

Errusiak eta AEBek adierazi dute azken egunotan ez dietela muzin egiten elkarrizketei. Eta, horren harira, Emmanuel Macron Frantziako presidenteak nabarmendu du Mendebaldeak kontuan hartu beharko lituzkeela Moskuren segurtasun bermeak, Vladimir Putin Kremlineko buruzagiak Ukrainako gerraren amaiera negoziatzea onartzen baldin badu.

Aurreko egunetan, AEBetan izan da Macron, eta TF1 telebista kateak bira horretan egin dioten elkarrizketa bat eman zuen atzo. Horretan nabarmendu zuen, besteak beste, Europak duela etorkizuneko bere «segurtasun egitura» prestatzeko beharra. «Horrek esan nahi du jorratu beharreko alderdiak direla —Putin presidenteak beti esan izan duen bezala— NATO bere ateetaraino heltzeko beldurra eta Errusia mehatxatu dezaketen armen hedapena», azpimarratu du Frantziako presidenteak.

Joan den otsailaren 24an Errusia Ukraina inbaditzen hasi aurretik, Putinekin bildu zen Mendebaldeko azken-aurreko liderra izan zen Macron; Olaf Scholz Alemaniako kantzilerra izan zen azkena, otsailaren 15ean. Kremlineko burua eta Eliseokoa Moskun batzartu ziren otsailaren 7an, eta Putinek, hedabideen aurrean, hiru eskari egin zizkion Mendebaldeari, Ukrainako mugatik gertu zituen tropak erretiratzeko: NATO Ipar Atlantikoko Itunaren Erakundearen hedatzea geldiaraztea Europa ekialdean; Mendebaldeko aliantza militarraren ahal handiko erasorako armak Errusiaren mugatik urruntzea; eta aliantzaren egitura 1997ko mugetara erretiratzea. Izan ere, ordura arte Varsoviako Ituneko estatu bakar bat ere ez zegoen aliantzan; 1999an, Hungaria, Polonia eta Txekia bihurtu ziren kide, eta 2004an, Estonia, Lituania, Letonia, Eslovakia, Bulgaria eta Errumania.

«Auzi hori bake elkarrizketetan egongo da. Beraz, aztertu behar dugu zertarako prest gauden, nola babesten ditugun geure aliatuak eta estatu kideak, eta nola ematen dizkiogun bermeak Errusiari negoziazio mahaira esertzen den egunean», esplikatu du Macronek, TF1eko elkarrizketan.

Ukraina esaten ari da azkeneko hilabeteotan ez dela negoziazio mahaian eseriko Errusiak bere lurraldetik tropak ateratzen ez dituen bitartean. Nolanahi ere, Washingtonek iradoki izan dio elkarrizketarako prest egon beharko lukeela. Testuinguru horretan, Macronek, beste batzuetan bezala, agenda propioa ezartzeko ahalegina egin du, AEBen rola auzitan jarriz, nolabait. Ezin du, ordea, EB Europako Batasunaren izenean hitz egin. Horrekin guztiarekin lotuta, Sanna Marin Finlandiako lehen ministroak ohartarazpen bat egin zuen herenegun Sydneyn (Australia): «Europa ez da behar bezain indartsua. Estatu Batuak gabe arazoak edukiko genituzke».

Mehatxu gehiago

Dmitro Kuleba Ukrainako Atzerri ministroak Telegramen atzo adierazi zuenez, Ukrainak hamabi herrialdetan dituen hamazazpi misio diplomatiko mehatxatu dituzte azken egunotan, gutun piroteknikoak eta kaxa susmagarriak bidalita. Oleg Nikolenko Atzerri Ministerioko bozeramaileak zehaztu zuen Hungariako, Herbehereetako, Poloniako, Kroaziako, Italiako eta Austriako enbaxadak daudela kaxak jaso dituztenen artean. CNN telebista katean egin dioten elkarrizketa batean, Kulebak esan zuen Errusia dagoela erasoen atzean. Moskuk ukatu egin du Espainiara bidalitako gutun piroteknikoekin zerikusirik duenik, eta Espainiako Poliziak esan du Espainiatik bertatik bidali zituztela.

Gerra frontean, bestalde, Khersongo agintari ukrainarrek eskatu diete Dnieper ibaiaren ekialdean dauden herritarrei mendebaldeko aldera, Ukrainak kontrolpean duenera, joateko. The Kyiv Independent egunkariak atzo kaleratu zuenez, Jaroslav Januxevitx jeneralak esan zuen atzo bihar arte laguntzen arituko direla Ukrainako indarrak.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Ponsati Generalitateko kontseilari ohia, Puigdemont presidente ohia, Puig kontseilari ohia eta Boye abokatua, atzo, Bruselan. ©LEO RODRIGUEZ / EFE

Erbesteratu katalanak Espainiaratzea baztertzeko irizpideak, zehaztuta

Gorka Berasategi Otamendi

EBko Justizia Auzitegiak ebatzi du Belgikak Espainiako justiziaren «gabezia sistemiko bat» frogatu behar duela haren euroagindu bat baztertzeko. Ez da guztiz lerratu, ez independentistekin, ez Llarenarekin
AEBetako gerra abioi batzuk, Ozeano Atlantikoko hegazkinontzi batean. ©STEPHANIE LECOCQ / EFE

Ukrainara gerra abioiak bidaltzearen aurka agertu da, oro har, Mendebaldea

Igor Susaeta

Borrokarako hegazkinak Kievi entregatzea aztergai dute, baina aliatuek ez dute jarrera bateraturik. AEBek eta Berlinek ezetz esan dute
Carles Puigdemont (erdian) Luxenburgoko auzitegiaren epaia baloratzen, gaur, Europako Parlamentuan, inguruan Clara Ponsati, Gonzalo Boye, Lluis Puig eta Toni Comin dituela. ©Berria

Erbesteratu katalanek ezingo dituzte Belgikaren argudioak erabili Llarenaren euroaginduak baztertzeko

Gorka Berasategi Otamendi

Europako Batasuneko Justizia Auzitegiak ebatzi duenez, batasuneko estatu kide batek ezin dio uko egin beste kide baten euroagindu bati, frogatu ezean azken horrek sistematikoki urratzen dituela eskubideak.

AEBetako F-16 hegazkin batzuk ariketa militarrak egiten Hego Korean ©EFE

Ukrainara gerra abioiak bidaltzearen aurka agertu da, oro har, Mendebaldea

Igor Susaeta

Auzia mahai gainean dago, baina Mendebaldeak ez du jarrera bateraturik. Macronen arabera, hainbat aldagai hartu beharko lirateke kontuan borrokarako hegazkinak entregatzeko.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...