Bizi guztiko zigorrak ere jaso ditu Hong Kongeko segurtasun legeak

Txinako hiri autonomoan gaur sartu da indarrean Segurtasun Nazionalerako Legea. Sedizioari, altxamenduari, terrorismoari eta atzerriko estatuekin batera egindako konspirazioei jazarriko zaizkie
Polizia Hong Kongeko Segurtasun Nazionalerako Legearen kontrako protesta bat desegiten, joan den igandean.
Polizia Hong Kongeko Segurtasun Nazionalerako Legearen kontrako protesta bat desegiten, joan den igandean. JEROME FAVRE / EFE Tamaina handiagoan ikusi

Gorka Berasategi Otamendi -

2020ko uztailak 1

Txinako Gobernuak Hong Kongeko protestei aurre egiteko baliabide boteretsu bat dauka eskura gaurtik. Txinako Herri Batzar Nazionalak —herrialdeko parlamentuak— Hong Kongerako Segurtasun Nazionalerako Legea onartu zuen atzo, eta Txinan gauerdia zenean sartu zen indarrean, Hong Kongeko buletin ofizialean argitaratu ostean. Legeak «sezesio, altxamendu eta terrorismo» delituak zigortzea du helburu, baita atzerriko esku hartzearekin prestatutako «konspirazioak» ere. Azken puntu horrek bereziki kezkatu du Pekin. Hain justu, behin baino gehiagotan, atzerriko herrialdeen azpijokoen tresna izatea leporatu die Hong Kongeko protestak sustatu dituzten taldeei. Lege berria eskuan, bizi guztiko espetxearekin zigortu ahalko ditu delitu horiek.

Horrez gain, legeak jasotzen duenez, Hong Kongeko bozetan parte hartzea debekatuko zaio segurtasun delitu bat egiteagatik zigortua den orori; legea urratzen duten talde edo enpresei isunak jartzeko edo haien jarduera debekatzeko aukera izango dute agintariek, eta Poliziak susmagarri oro zelatatzeko eta haren telefono jarduera ikertzeko aukera izango du.

Legeak kritika ugari eragin ditu Mendebaldeko herrialdeen artean. Pekinek Hong Kongen autonomian esku hartu duela salatu dute AEBek, EB Europako Batasunak eta Erresuma Batuak. AEBek hiriari aitortzen zioten estatus berezia indargabetu zuten herenegun. Legea argi kritikatu dute Japoniak eta Taiwanek ere.

Hong Kongen bertan, «demokraziaren aldeko» mugimenduko taldeek salatu dute neurri horrek eskubideak murrizten dituela. «Munduak orain arte ezagutu duen Hong Kongen amaiera» ekarriko duela esan zuen Joshua Wong ekintzaile eta atzo arte Demosisto taldeko aurpegi ezagunenetako bat zenak. Beste ordezkari batzuek bezala, Wongek taldea uztea erabaki zuen atzo, Herri Batzar Nazionalak legea onartu zuela jakin zenean. «[Norberaren] Bizitzaren eta segurtasunaren gaineko kezka jada ez dira txantxetako kontua», adierazi zuen. Handik gutxira, desegitea erabaki zuen Demosisto taldeak eta oihartzun txikiagoa duten gobernuaren kontrako beste eragile batzuek —Hong Kongeko Fronte Nazionalak eta Studentlocalism taldeek, esaterako—.

Legearen onarpenak eragina izan du enpresetan ere. «Demokraziaren aldeko» mugimendua babesten duen Zirkulu Ekonomiko Horia taldetik irtetea erabaki dute zenbait enpresak.

Pekinek behin baino gehiagotan ziurtatu du legeak ez duela mugatuko Hong Kongeko eskubide eta askatasun sistema; soilik «aztoratzaile» gutxi batzuei eragingo diela.

Carrie Lam Hong Kongeko gobernuburuak «ekintza terroristen mehatxuei» aurre egiteko beharra nabarmendu zuen atzo, NBE Nazio Batuen Erakundeko Giza Eskubideen Kontseiluan egin zuen agerraldian. Txinak «segurtasun nazionala babesteko eskubidea» duela adierazi zuen, eta hura errespetatzera deitu zuen nazioarteko komunitatea.

Autonomia mugatua

Hong Kongeko agintari politikoak legeak aurreikusten dituen mugak aipatu zituen NBEren bilkuran. Ez du atzera eraginik izango «ekintza kriminal jarraituen» kasuan izan ezik, eta Hong Kongek epaituko ditu legeak aurreikusten dituen delituak, «egoera jakin eta ezohikoetan izan ezik».

Lamen esanetan, legeak hiriaren autonomia errespetatzen du. Nolanahi, legeak Pekinen menpe jarriko du Hong Kongek eratuko duen Segurtasun Nazionalerako Batzordea. Erakunde horrek sail bereziak sortuko ditu hiriko justizia sisteman eta Polizian, segurtasun nazionalaren kontrako delituak pertsegitu eta epaitzeko.

Txinako Gobernuaren kontrako eta parlamentuak onartu berri duen legea salatzeko protestak izango dira gaur Hong Kongen, hiri autonomoak kolonia britainiarra izateari utzi ziola 23 urte betetzen dituen egunean. «Demokraziaren aldeko» mugimenduko ekintzaile eta talde politikoek manifestaziora deitu dute gaurko, nahiz eta koronabirusari aurre egiteko neurriengatik mobilizazioa debekatuta dagoen.

Iaz, gobernuaren kontrako protesta giro betean iritsi zen urteurrena, eta manifestazio jendetsuak eta istiluak izan ziren Hong Kongen. Ez dago argi agintariek gaurko mobilizazioa segurtasunaren kontrako delitutzat jo ahalko duten ala ez.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Covid-19 daukaten gaixoak zaintzen duten bi erizain besarkatzen 55 egun gaixo zeraman gizon bat sendatzean. ©Andoni Lubaki / Foku

Koronabirusaren azken datuak

Berria

Euskal Herrian 31.166 gaixok eman dute positibo guztira, koronabirusa atzemateko probaren bat eginda. Horietatik 2.150 hil dira. Grafikoak, albiste barruan.

 ©BERRIA

«Transmisio komunitario bat daukazunean, ezin da telefono bidez kudeatu»

Jon Ordoñez Garmendia

Epidemia betean harrapatu dute hauteskundeek Ordizia, eta kezkatuta dago Ezenarro. Arriskuaz ohartarazi arren, neurri bereziak hartuta egingo dituzte bihar. Erakundeen babesa eta mahai tekniko bat sumatu ditu faltan.

Probak egiteko Ordizian jarritako postuak. ©Jon Urbe / FOKU

«Osasun publikoaren kontrako delitu bat» izango da gaixorik bozkatzea

Iosu Alberdi

Ordiziako agerraldiarekin lotutako lau kasu berri atzeman dituzte. Denera, 31 dira Araba, Bizkai eta Gipuzkoan baieztatutako positibo berriak, eta herritar bat hil da koronabirusaren eraginez. 160 herritar inguru dira bihar bozkatzea debekatuta izango dutenak.

Bi lagun, terraza batean eserita, Orion. ©JON URBE / FOKU

Nork agindu tabernetan

Aloña Beraza Peña Irati Urdalleta Lete

Ordiziako taberna batetik zabaldutako fokuak piztu ditu alarmak aste honetan. Su gehiago ere ari dira pizten, Tuteran, Gasteizen... Tabernariak eta kudeaketan dabiltzanak kezkatuta daude.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna