Eskuz Binakako Txapelketa

Bertan behera geratu da finala

EAEko Auzitegi Nagusiak onartu egin ditu Baikoko hamabost pilotari grebalarien izenean ELAk eskatutako kautela neurriak, eta atzeratu egin du bihar Bilbon jokatzekoa zen binakakoaren finala
Miribilla pilotalekua, hutsik, herenegun, finaleko pilotak aukeratu aurretik.
Miribilla pilotalekua, hutsik, herenegun, finaleko pilotak aukeratu aurretik. SMARISOL RAMIREZ / FOKU Tamaina handiagoan ikusi

Julen Etxeberria -

2020ko urriak 17

Ez da finalik jokatuko bihar. Ez dira ariko Olaizola II.a-Urrutikoetxea eta Ezkurdia-Martija Bilbon, Miribilla pilotalekuan, binakakoaren txapela irabazi nahian. EAEko Auzitegi Nagusiak onartu egin zituen atzo ELA sindikatuak Baiko enpresako hamabost pilotari grebalarien izenean eskatutako kautela neurriak, eta bertan behera utzi zuen Binakako Txapelketaren finala.

ELAk salaketa jarria zuen Eskuz Pilotako Enpresen Ligako (EPEL) epaile bakarrak hartutako erabakiaren aurka: Baikoko hamabost pilotarik deitutako greba egiteagatik, Asier Agirreri eta Jon Ander Albisuri galdutzat eman zien Joseba Ezkurdiaren eta Iñigo Bikuñaren aurkako finalerdietako ligaxkako partida erabakigarria: 22-0. Sindikatuaren arabera, erabaki hori hartuta, Enpresen Ligak greba eskubidea «urratu» zuen. Baina EAEko Auzitegi Nagusiak salaketa horretaz epaia eman arte asteak igaro zitezkeenez, kautela neurriak hartzeko eskatu zuen sindikatuak, epaia iritsi artean finala ez zedin jokatu, eta kalteak ez zitezen handiagoak izan.

Eta EAEko Auzitegi Nagusiak onartu egin zizkion atzo kautela neurri horiek, eta, joan den larunbateko neurketaren inguruko salaketa argitu arte, finala ez jokatzea erabaki zuen. Hiru epailek aztertu dute auzia: bi alde azaldu dira, eta bat kontra. Epaile horrek boto partikularra eman du erabakiaren aurka, horretarako «urgentziarik» ez dagoela argudiatuta. Hala ere, beste bi epaileen moduan, hark ere dio greba eskubidea «urratu den zantzuak» daudela. Autoak dioenez, irmoa da epaia, eta ezin da helegiterik aurkeztu.

Sindikatuak eta pilotariek «pozez» hartu zuten erabakia, baina berriro utzi nahi izan zuten argi gatazkaren konponbidea ez dagoela epaitegietan, «negoziazio-mahaian baizik». «Egoera hau ez da erosoa inorentzat, eta argi utzi nahi dugu gure ateak beti daudela irekita, betiere, fede onez negoziatu nahi bada. Baikori eskatzen diogu utz ditzala grebaren eta langileen aurkako jarrerak, eta eser dadila negoziatzera, akordio bat lortu arte», zioten ohar batean.

Enpresen Ligak, berriz, zera salatu zuen: EAEko Auzitegi Nagusiak erabakia hartu duela «euren interesak defendatzeko alegazioak eta frogak aurkezteko inolako aukerarik eman gabe». Epaile batek urgentziarik ez zegoela esan izana ere nabarmendu zuen, eta iragarri zuen ezen EAEko Auzitegi Nagusian «beharrezkoak diren ekinbideak» hartuko dituela. «Pena handiz» hartu du finala bertan behera geratu delako, eta hurrengo egunetan argituko du zer egingo duen bertan behera geratutako jaialdiekin eta nola itzuliko duen sarreren dirua.

Aldaketak jaialdietan

Izan ere, greba dela-eta, hainbat jaialdi geratuko dira bertan behera. Atzo, adibidez, ez zen jokatu Bilbokoa, nahiz eta Baikok hori egiteko asmoa zuen. Hiru neurketako jaialdia antolatu zuen, eta greban dauden zortzi pilotari aukeratu zituen, jaialdiko guztiak: Asier Agirre, Aitor Aranguren, Oinatz Bengoetxea, Ibai Zabala, Joanes Bakaikoa, Jon Ander Albisu, Beñat Urretabizkaia eta Ruben Salaverri. Grebarekin bat eginez, bat bera ere ez zen aurkeztu.

ELAk salatu zuenez, «sekula» ez da horrelakorik ikusi. «Guztiz ezohikoa da bai Baikok jaialdi bakar batean hiru partida programatzea, bai ostiralean egitea, bai enpresa bereko zortzi pilotarirekin betetzea. Eta are harrigarriagoa da kontuan izanda programatutako pilotari guztiak grebalariak direla». Sindikatuaren arabera, «deigarria» da enpresak greba egoera aprobetxatzea jaialdi bakar batean hainbeste partida programatzeko. «Jarrera horrek ez du inondik inora gatazkari irtenbide bat ematea ahalbidetuko, eta langileek mobilizazioak egiteko benetako arrazoiak zituztela berretsi baino ez du egiten».

Horregatik, aztertu egingo du zein bide juridiko hartu ekintza horren aurka. «Uste dugu beste behin ere enpresa grebarako eskubidea urratzen ari dela. Hala ere, azken egunetan esandakoa errepikatzen dugu: enpresak ez luke gatazka hau are gehiago korapilatu behar, konponbidea ez baitago epaitegietan. Fede ona negoziazio-mahaian erakusten da, ez komunikabideetan».

Atzo Bilbon jazotakoa berriro ere gertatuko da gaur, Etxebarrin (Bizkaia), Baikok bi partidako jaialdia antolatu baitu, eta aukeratu dituen sei pilotarietatik bost baitira grebalariak: Jon Erasun, Bengoetxea VI.a, Andoni Aretxabaleta, Agirre eta Mikel Larunbe. Iraitz Zubizarreta da salbuespena. Ez da jokatuko jaialdia. ETB1k emango zuen. Baina telebistak izango du zer eskaini, Aspek atzo iragarri baitzuen jaialdia antolatu duela gaur Tolosan (Gipuzkoa), 17:30ean. Aspeko zortzi pilotari ariko dira: Elordi-Garmendia, Zabala-Ruizen aurka; eta Egiguren V.a-Zabaleta, Salaberria-Rezustaren kontra. Bihar, berriz, Baikok jaialdia antolatu du finalaren ordez, Miribillan. Urrutikoetxea eta Zubizarreta III.a ariko dira lehenbizi, eta Olaizola II.a-Uriondo eta Larrazabal-Imaz ondoren. Larrazabal amurrioarrak debuta egingo du. Grebarekin bat ez duten pilotariak dira guztiak.

Egoera gero eta korapilatsuagoa da, eta ikusteko dago noiz has daiteke bideratzen. Astebete pasatxoan Baiko ez da jarri harremanetan pilotarien ordezkariekin, baina atzo hots egin zien, eta beste bilera baterako deitu. Datorren asteartean dute egitekoa, Bilbon. Hain zuzen, egun horretan dira aurkeztekoa Banakako Txapelketa, baita Bilbon ere. Baina ikusteko dago Enpresen Ligak asmo horri eutsiko dion.

Pilotariak «gogoz» joango dira bilerara. Hala azpimarratu zuen atzo Ibai Zabalak, baina zehaztu zuen lehen bilerara baino «ilusio txikiagoarekin eta zuhurtzia handiagoarekin» joango direla. «Epaiak dio ondo ari garela. Ziur gaude auzitegiak haien alde egin izan balu, ez zigutela deituko. Horrek agerian uzten du zein den haien borondatea. Hala ere, guk beti esan dugu ez dugula epaitegietan ibili nahi, eta hitz egin nahi dugula. Baina zintzo, eta egoak eta joko zikina bazter batean utzita. Zentzugabekeria asko ari da egiten enpresa: hainbat pilotari debutarazi, adibidez. Eta gero esango du tokirik ez dagoela». Aspek gaur jaialdia antolatzeaz, berriz, esan zuen ez zaiola ondo iruditzen. «Baikok antolatu behar zuen jaialdi bat ordezkatuko du».

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Baionako ostatu bat, uztailean. ©Bob Edme

Ostatuak 22:00etan itxi beharko dituzte Ipar Euskal Herrian

Maddi Ane Txoperena Iribarren

Eric Spitz Pirinio Atlantikoetako prefetak neurri berriak iragarri ditu. Ostatuek ezinen dute eramateko alkoholik saldu 22:00etatik aitzina, eta karrikan ezinen da alkoholik edan 22:00etatik 08:00etara. Bezeroen erregistro bat egin beharko dute ostalariek. Ortzegunean jarriko dituzte neurriak indarrean, hamabortz egunerako, gutienez.

Bilboko taberna bat, edukiera murriztuta. ©Jaizki Fontaneda / Foku

Ostalarientzako diru laguntzak eskatu ditu EH Bilduk

Erredakzioa

Sektorea erreskatatzeko plan bat aurkeztu du koalizioak: Eusko Legebiltzarreko osoko bilkurara eramango du.

Ostalariek protesta egin dute gaur Nafarroako Gobernuaren aurrean. ©IÑIGO URIZ / FOKU

Nafarroako ostalariak, itxieraren kontra: «Sektorea kriminalizatzen ari dira»

Ion Orzaiz

Tabernak eta jatetxeak «seguruak» direla adierazi du Nafarroako Ostalaritza eta Turismo Elkarteak. Elkarretaratzeak eginen dituzte ostegunetik aurrera

Udal langileak Azkoienen, kalea garbitzen. / ©Idoia Zabaleta, Foku

Gipuzkoak 100.000 biztanleko 500 positiboren langa gainditu du

Arantxa Iraola-Irati Urdalleta Lete

Hego Euskal Herrian egin dituzten testen %9,2k eman zuten atzo positibo. Eusko Jaurlaritzak ez du «ezer» baztertzen, baina, oraingoz, konfinamenduak eta etxeratze agindua ez daude mahai gainean.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna
Julen Etxeberria

Informazio osagarria

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna