Ehundik gora begirada

Iragarria zutenez, martxoaren 27tik apirilaren 1era eginen dute aurten Ikuspuntu Nafarroako Zinema Dokumentaleko Nazioarteko Jaialdia, Iruñean; hurbil da hasiera, beraz. Festibalak XVII. aldia izanen du aurten, eta jadanik asteak dira egitarauaren gaineko xehetasunak plazaratzen ari direla, apurka. Azkenik, atzo argitu zituzten guztiak: 65 jarduera baino gehiago antolatu dituzte, ehun film inguru emanen dituzte guztira, eta hamalau herrialdetako hemezortzi film lehiatuko dira Sail Ofizialean —hamar film luze eta zortzi film labur—. Sharon Lockharten Eventide eta Comes Chanbazianen Notre village lanek zabalduko dute programazioa, astelehen goizean.

Iruñeko sei aretotan eginen dituzte egitarauan bildutako jarduerak eta emanaldiak: Baluarten, Golem zinema aretoetan, Planetarioan, Nafarroako Filmotekan, Kondestablearen Civivoxean eta Civicanen; baina egitaraua Oteiza museoraino ere (Altzuza, Nafarroa) helduko da.

Jaialdiak iazko egiturari eutsiko dio, hau da, zazpi atal nagusi izanen ditu: Sail Ofiziala, Atzera Begiradak, Fokuak, X Films, Hezkuntza Programa, Lan eta Kontaktuak. Azken biak iaz abiatu zituzten, eta, orduan erdietsitako «arrakasta» ikusirik, mantentzea erabaki dute antolatzaileek. Lehenak zinema dokumentaleko lan eta ekoizpen prozesuak ditu ardatz; eta bigarrenak, berriz, helburu du zinema hurbiltzea sorkuntzaren eta ezagutzaren beste diziplina batzuetara.

Edonola ere, festibaleko arduradunek nabarmendu dute Hezkuntza Programa indartzea dela aurtengo lehentasun nagusietako bat, «haurrengana eta gazteengana gehiago hurbiltzeko». Horretarako, Programatzaile gazteak tailerra eta Criaturas de la naturaleza haurrentzako filmaren emanaldia antolatu dituzte, besteak beste.

Hemezortzi film lehiatuko dira jaialdiaren Sail Ofizialean. Hamalau herrialdetan eginak dira; bi, Euskal Herrian: Peru Galbeteren Bide bazterrean hi eta ni kantari, eta Maria Elorzaren eta Iñigo Salaberriaren Al borde del agua. Behin baino gehiagotan emanen dute bi film horietako bakoitza. Dena dela, hauek izanen dituzte estreinaldiak: Galbeterenak hilaren 28an, 10:00etan, Baluarten; Elorza eta Salaberriarenak, hilaren 29an, 10:00etan, leku berean.

Bestalde, bi proiektuk osatzen dute aurtengo aldiaren Atzera Begirakoak atala. Batetik, Peter Nestler zinemagile alemaniarraren lanari eskainitakoak: Bestelako garaiak datoz. Hilaren 31n, ostiralean, zinemagilearen azken bi filmak proiektatuko dituzte Baluarten: Unrecht und Widerstand eta Der offene Blick. Komunitate sintien eta errumaniarren jazarpenaren eta historiaren gainekoak dira bi lan horiek. Dokumentalgilea bertan izanen da, Baluarten, eta, emanaldien ondotik, solasean arituko da Gaz Kalo Nafarroako Ijito Elkarteen Federazioako koordinatzailearekin.

Festibaleko beste atzera begirakoa funtsezko ondasunen ekoizpenari buruzkoa da. Zuhaitzetatik urrun du izena, eta Miriam Martin zinemagile eta programatzaileak ondu du. Funtsezko osagaiak ekoizteko modua nola aldatu den erakusten duten filmak emanen dituzte, sei saiotan, Golem Yamaguchi zinemetan; Harun Farocki, Manoel de Oliveira eta Chick Strand zuzendarienak izanen dira ikusgai, besteak beste. Halaber, solasaldiak izanen dira emanaldi guzien ondotik.

Musikaz ere bai

Zinemarekin loturiko jarduerak ez ezik, musika kontzertuak ere antolatu ditu Ikuspuntu jaialdiak aurten, Ikuspuntu gauak izenburupean. Antolatzaileek jakinarazi dutenez, Navarra Music Commissionekin abiatutako lankidetzari esker osatu dute egitaraua.

Astelehenetik ostiralera, Nafarroako zenbait DJ arituko dira Nicolette tabernan: Dayanna, DJ Txino eta Nikka, adibidez. Bestelako artistak ere arituko dira programazioaren barruan: Joseba Irazoki Txintxarri tabernan izanen da hilaren 30ean, eta DJ Goo arituko da haren ondotik.