Albistea entzun

EPPK-ko kideak ari dira kartzelako legediaz baliatzeko eskaerak egiten

Kolektiboko mintzaide Olarrarekin bilera eduki du Foro Sozialak, Granadako espetxean. Kartzelan lan egitea eta bigarren gradura pasatzea galdegin dute presoek. Gradu aldaketa ukatu egin diete
Etxerat elkarteko kide batzuk, atzo, Hernanin emandako prentsaurrekoan.
Etxerat elkarteko kide batzuk, atzo, Hernanin emandako prentsaurrekoan. BERRIA Tamaina handiagoan ikusi

Enekoitz Esnaola -

2018ko urtarrilak 9

EPPK-k joan den uztailean barne eztabaidako ondorioen txostenean iragarri zuen espetxe legedia baliatzen hasi aurretik kolektiboko preso bakoitzak nahi duenak bere egoera juridikoa aztertuko zuela abokatuarekin, legedian zer aukera egon daitekeen jakiteko, ondotik txostena EPPK-ko zuzendaritzari ezagutaraziko ziola, eta, azkenean, «askatasuna eskuratzeko», preso bakoitzaren esku egongo zela zer urrats egin erabakitzea. Agus Hernan Foro Sozial Iraunkorreko koordinatzaileak Jon Olarra Guridi EPPK-ko mintzaidearekin izandako bisita-bileraren ondoren jakinarazi duenez, kolektiboko kideak ari dira jadanik legediaz baliatzeko eskaerak egiten, banan-banan.

Hernanek lehengo larunbatean izan zuen bilera Olarrarekin, Granadan (Espainia), Alboloteko espetxean. 40 minutuko solasa izan zen, tartean beira bat zutela. Olarrak Hernani esandakoaren arabera, EPPK-ko kideek espetxean lan egiteko eskatu dute hogei bat kartzelatan egin dute eskaera, eta kasu gehienetan tokiko espetxe zuzendaritzak onartu egin ditu eskaerak. Zigorraren iraupena zerbait murrizteko balio dute horrelako lanek, eta orain arte ez da ohikoa izan EPPK-koek bide hori urratzea.

Presoen beste eskaera lehen gradutik bigarrengora pasatzekoa izan da. EPPK-ko mintzaideak esan du kolektiboko kideen %96 lehen graduan dauzkatela eta dagoeneko gehienek bigarren gradura pasatzea galdegin dutela. Aurrenik, tokiko kartzelako Tratamendu Batzordeak aztertu behar du eskaera bakoitza batzordeak hiru edo sei hilabetean behin biltzen dira. Oraindik ez dituzte erantzun guztiak eman, baina, EPPK-ko iturria aipatuz Foro Sozialak dioenez, orain arte aztertutako eskaera gehienak baztertu egin dituzte. Preso batzuek helegitea aurkeztu dute tokiko Tratamendu Batzordean, eta, berriro baztertutako kasuetan, Espetxe Zaintzako Epaitegira jo dute.

Foro Sozialak dio gradu aldaketaren eskaerak ez onartzeko erabilitako argudioa «desegin gabeko erakunde terrorista baten kide izatea» izan dela, eta hori deitoratu du. «Espetxeetako Zuzendaritzaren irizpide politikoa da, salbuespeneko araudi baten pean ematen dena, gainditze bidean dagoen garai batekoa». Kartzelan egin beharreko bide juridikoa hasteko lehen gradutik bigarrengora pasatzea ez onartzea «oztopoa» dela adierazi du foroak.

EPPK-k bere kideak Zaballako (Araba) eta Mont-de- Marsango (Okzitania) espetxeetan batzeko eskatzen du, baina, azkeneko eztabaidaren ondoren, legediko urratsak egiten hasteko baldintza ez da presoak lehendabizi bi kartzela horietan batzea. EPPK-k dio jabetuta dela ez dagoela Espainiako Estatuarekin alde biko negoziazioaren aukerarik, eta kaleratze prozesurik bada onartuko dituela tarteko pausoak.

«Borrokaldiak» eta bide juridikoak EPPK-ko kidegoaren «adostasuna» eta herritarren «babesa» izango ditu baldintza, Euskal Preso Politikoen Kolektiboak uztailean zioenez, eta presoek uko egingo diete damuari eta euren kideak zigortzeko kolaborazioari. Kolektiboak jendaurrean iragarria du estatuen «trabengatik» beharrezkoa izango zaiela «malgutasun handiz jokatzea».

Jarrera «eraikitzailea»

Eragindako minaz ere aritu ziren bi ordezkariak joan den larunbateko bisita-bileran, eta IV. Foro Sozialak horretaz dituen ondorioen berri ere eman zion Hernanek Olarrari. Foroak esan duenez, EPPK prest azaldu da bere ardura bere gain hartzeko eta biktimek pairatu duten sufrimendua aitortzeko. Halaber, «biktimekin elkarrizketa eraikitzailea» egiteko prestasuna dauka kolektiboak.

Foroa Hegoaldeko alderdiekin eta sindikatuekin egiten ari den lana ere azaldu zion Hernanek.

Asko balio du irakurri duzun albiste/artikulu honek. Talde baten lanaren emaitza da.

Albiste hau zuri helarazteko eta talde honek bere lana baldintza egokietan egin dezan, BERRIAk ezinbestekoa du zure sostengua.

Zure babes ekonomikoarekin, aldi hau kontatzeko funtzioa betetzen jarraitu nahi dugu: kazetaritza konprometitu, kalitatezko eta independentea egiten.

Albiste gehiago

 ©ENDIKA PORTILLO / FOKU

«Sanchezek lortuko du inbestidura aurrera ateratzea»

Gurutze Izagirre Intxauspe

Erronka nagusiak gizarte gaietan daudela uste du Anduezak, eta horretarako politikak garatzea da Alderdi Sozialistaren lehentasuna. Nazio auzia ez dago gizartearen kezken artean, haren aburuz.
Josu Urrutikoetxea —bizkarra emanda— eta Jordi Evole, <em>No me llame Ternera</em> dokumentaleaan. ©BERRIA

Auzi bat, ikuspegi desberdinak

Enekoitz Esnaola

Josu Urrutikoetxeak gehienbat ETAren hilketei buruzko galderak erantzun behar izan ditu 'No me llame Ternera' dokumentalean; maiz aipatu du «sentitzen» duela. Gainetik jorratu dute «gatazka».
 ©BERRIA

Torturak blaitutako irail hura

Gotzon Hermosilla

Egunotan 30 urte beteko dira Gurutze Iantzi eta Xabier Kalparsoro Espainiako polizia indarren eskuetan zeudela hil zirenetik. Haien kasuek argitu gabe jarraitzen dute.
Josu Urrutikoetxeari elkarrizketa

«Gure gatazka politikoan tresna izan beharko luke komunikazioak»

Enekoitz Esnaola

Josu Urrutikoetxeak dio Euskal Herrikoa auzi «politikoa» dela azaldu nahi izan diola Espainiako gizarteari 'No me llame Ternera' filmean. Ikusi du dokumentala, eta uste du «hari» hori falta zaiola. Gaur estreinatuko dute, Donostiako Zinemaldian.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...