Albistea entzun

Bidaiatzea, errazago

Arrakasta handia izan dute Renfen doan bidaiatzeko abonuek Donostian. Abonuek ez ezik, billlabesako deskontuek ere harrera ona izan dute
Ohi bezala zeuden billabesak atzo Iruñerrian; bidaiariak kontent ziren deskontuengatik.
Ohi bezala zeuden billabesak atzo Iruñerrian; bidaiariak kontent ziren deskontuengatik. IÑIGO URIZ / FOKU Tamaina handiagoan ikusi

Olaia L. Garaialde - Jone Arruabarrena -

2022ko irailak 2 - Iruñea - Donostia

Atzo hasi zen iraila, eta, oporrak igarota, ohiko errutinara bueltatu ziren asko. Hala ere, ohi baino jende gehiago zebilen hara eta hona. Geltokia beteago, langile gehiago, eta normalean erdi hutsik egon ohi diren leihatilen aurrean ilara luzeak. Han-hemenka ikus zitezkeen kolore biziko kartelek ematen zioten azalpena egoera berriari: Renfe abonuak zioten letra handiz.

Izan ere, atzo sartu ziren indarrean Espainiako Gobernuak iragarri zituen garraiorako deskontu bereziak, eta abenduaren 31 arte iraungo dute. Pedro Sanchezen gobernuak zuzenean kudeatzen dituen garraio zerbitzuetan, Renfen kasurako, doan bidaiatu ahal izango da aldiriko trenetan eta distantzia ertainekoetan.

Abonua ateratzen zebilen geltokiko makinetan atzo Karmele Martinez, geltokiko langile baten laguntzarekin: «Noizbehinka erabili izan dugu orain arte, baina hemendik aurrera gehiago erabiltzeko asmoa dugu. Deskontuak animatzen du gehiago erabiltzera».

Lanpetuta zebiltzan geltokiko langileak ere. Horietako bat makinetan abonuak atera nahian zebiltzan erabiltzaileei laguntzeaz arduratzen zen. Izan ere, horretarako kontratatu dituzte langile asko, bazekitelako abonuak martxan jartzearekin batera erabiltzaile kopurua nabarmen hasiko zela. «Hemen egon behar dugu jendeari laguntzen, baina langile guztiok denetarik egiten dugu, bestela ez gara iristen horrenbeste jenderekin. Abonua gaurtik aurrera martxan jarri denez, atzo ikaragarria izan zen. Jendetza zegoen txartela lortzeko zain», zioen Renfeko langileak.

Trenaren errailen ondoan, bi emakume eta gizon batek harro erakusten zuten abonua esku artean, kameraren aurrean irribarre eginez. Guillermo Etxenike da erdian dagoen gizona, Espainiako Gobernuko ordezkaria Gipuzkoan. «Irunen bilera bat daukagu orain, eta, abonuak erabil daitezkeen lehen eguna denez, aprobetxatu dugu haraino autoan joan beharrean trenez joateko», dio Etxenikek. Abendutik aurrera abonuak luzatzeko aukeraz galdetuta, zalantza egin du: «Oraingoz, lehen eguna da, eta gero gerokoak. Ea elektrizitatearen prezioa jaitsi eta Ukrainako Gerra konpontzen den, eta horrela ez litzateke beharrezkoa izango horrelako laguntzak ematea».

Beste garraio mota batzuetan, autobusetan kasurako, bidaia ez da guztiz doakoa, baina badaude deskontuak. Izan ere, Gipuzkoako Lurraldebus zerbitzuetan, erdi prezioan bidaiatu ahalko da Mugi txartelarekin, eta, zenbat eta bidaia gehiago egin, orduan eta handiagoa izango da deskontua. Donostiako autobus geltoki nagusian ohikoa da mugimendua, eta atzo ere jendez lepo zegoen. Hala ere, zerbitzu horretan deskontuak lortzeko abonurik atera behar ez denez, ez zegoen ezohiko ilararik. Bertan zegoen Pablo Martinez, autobusaren zain. Unibertsitateko ikaslea da Martinez, eta egunero erabili ohi du garraio publikoa: «Bidaia luzeagoak batez ere asteburuetan egiten ditut, autobusean itzultzen bainaiz gurasoen etxera. Deskontua oso ondo datorkit». Minutu batzuk barru iritsi da bere autobusa, eta bertara igo da.

Aurrezteko aukera

Hego Euskal Herri osoan izan dute eragina neurriek, eta Iruñean ere sumatu dituzte deskontuak. Iruñeko tren geltokian alde batetik bestera zihoan jendea, gehienak maletarekin. Leihatiletan jende gutxi zegoen, ia ez zegoen ilararik eta agudo zihoan jendea. Renfeko langileen arabera, abonu asko saldu dituzte, batez ere, Gasteizetik Zaragozara joateko.

Trenbide sarearen ondoan, trenaren esperoan Iñigo Saez zegoen eserita. Iruñetik Gasteizera joateko maiztasunez hartzen duenez trena, abonua eskuratu du: «Oso ongi dago, nik uste 40 euro inguru aurreztuko ditudala hilabetean». Saezek eskuratu duen abonua lortzeko 20 euroko bermea ordaindu behar da. Bidaia minimora iritsiz gero, dirua itzultzen dute.

Hortik gertu, maleta eskutan Iruñeko tren geltokian eserita zegoen Lierni Urdiroz. Gutxitan hartzen du trena: «Ez nekien deskonturik zegoenik, baina pozten naiz». Billabesa, Iruñerriko garraio publikoa, maizago hartzen du, bidaia mugagabeak dituen bonua dauka. 30 urtetik beherako gazteentzako da, eta deskontuarekin 25 eurotik 17,50 eurora jaitsi da.

Tren geltokiaren atarian billabesa hartzeko aukera dago; bertan Angel Labairu autobus gidaria zegoen ateratzeko prest. Bost pertsona sartu ziren, eta billabesa nahiko hutsik zegoen. Bus gidariaren arabera, jende aldetik ez du aldaketa handirik sumatu: «Hiru gauza elkartu dira: unibertsitatearen hasiera, neguko ordutegira pasatu garela eta deskontuak egin dituztela». Gaineratu zuen uste duela jendeak orokorrean ez duela deskontuen berri. Txartel arrunten eta aldi baterako txartelen gainean egiten da deskontua. Horrez gain, ordaintzean arazoak egon zirela esan zuen: «Makinak blokeatu dira».

Arazo teknikoak Iruñerrian

Iruñeko mankomunitateak iragarri zuenez, zenbait billabesetako arazo teknikoengatik ez zuten bidaia guztietan deskonturik egin. Hala ere, eguerdian arazoa konpondu zuten. «Gehiago kobratu zaien erabiltzaileei automatikoki kendutako dirua itzuliko zaie», esan zuen Iruñeko Mankomunitateak.

Billabesa ohi bezala zegoela esan zuten bidaiariek. Denek aipatu zuten, egunero hartzen dutenez busa, kontent daudela. Horren adibidea, Laura Perez da. Egunero hartzen du billabesa ama zaintzeko: «Uste dut asko igarriko dudala, eta dirua aurreztuko dudala; azkenean, egunean bitan hartzen dut billabesa». Ondoan, semearekin, Rafaela Sanchez zegoen: «Alokairua oso garesti dago, apur bat lagunduko dit». Geldialdia eskatzeko botoia sakatu, eta autobusetik jaitsi zen.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Donostia ospitalea, artxiboko irudi batean. ©Andoni Canellada / Foku

Osakidetzaren «politika suizida» salatu dute Donostiako ESIko 30 bat zerbitzuburuk

Ion Orzaiz- Paulo Ostolaza

Gutun batean, osasun zerbitzu publikoaren zuzendaritzaren dimisioa eskatu dute, zentzugabeko kudeaketarengatik, eta «sektarismoa eta trakeskeria» leporatu diote.

 ©Guillaume Fauveau

Antton Kurutxarri. «Aski indarrik ez dugu egin beharrekoa egiteko»

Olatz Silva Rodrigo

Euskararen Erakunde Publikoak irakaskuntzara bideratzen du indarraren zati handi bat. Lehendakariaren ustez, beste arlo batzuk jorratu beharko lituzkete.

 ©ARITZ LOIOLA / FOKU

ERAGILE, EGILE ETA ORDEZKARI

Julen Aperrribai

Duela 25 urte sortu zuten Euskararen Gizarte Erakundeen Kontseilua, euskararen normalizazio prozesua bizkortzeko eta euskalgintzako erakundeak bateratzeko. Hizkuntza politiketara begirako akordio sozial zabalak, plangintzak eta proposamen zehatzak eragiteko gaitasuna izan du hasieratik. Adostasunok galgatu egin dira sarritan pauso berean: maila sozialetik maila politikora eramateko unean.

 ©ARITZ LOIOLA / FOKU

«Adostasun politikoek edukia behar dute; ez gaude argazkien garaian»

Maite Asensio Lozano

Lema uztera doala, azken urteetan egindako aurrerapausoak gogoratu ditu, baina aitortu du arazo batzuk «kronifikatzen» ari direla. Hartara, hizkuntza politika «sendoak» eskatu ditu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Hitzen, ekintzen eta errimen eztanda. Herri bat BERRIAren kulturaren plazan. Baliatu udazkenean BERRIAlagun egiteko eskaintza.