Albistea entzun

Jakinarazi dute eutanasia bat egin dela lehen aldiz Euskal Herrian

Osakidetzak egindako eutanasia bat dela esan dute. DHE elkarteak eman du albistea; 86 urteko emakumezko bati egin diotela adierazi du
DHEren protesta bat, eutanasia legeztatzearen aldekoa, Bilbon.
DHEren protesta bat, eutanasia legeztatzearen aldekoa, Bilbon. MARISOL RAMIREZ / FOKU Tamaina handiagoan ikusi

Maria Ortega Zubiate -

2021eko abuztuak 3

Osakidetzak egindako lehen eutanasia kasuaren berri eman du DHE Duintasunez Hiltzeko Eskubidearen Elkarteak, eta esan du Euskal Herrian egindako lehena izan dela; areago, zehaztu du Espainiako Kongresuak eutanasia legea onetsi zuenetik izandako lehenbiziko kasua dela. Elkarteak emandako informazioaren arabera, 86 urteko emakume bat izan da osasun profesionalen laguntzaz hil den pazientea. Gehitu du beste bi lagunek ere abiatu dituztela eutanasia eskeak Osakidetzan. Dena den, Eusko Jaurlaritzako Osasun Sailak ez du deus ere esan: zehaztu du ez duela prozesuei buruzko informaziorik emango.

Ekainaren 25ean sartu zen indarrean eutanasia herritarren esku dagoen osasun zerbitzu bat bihurtu duen legea Hego Euskal Herrian, eta hilabete pasatxoren buruan heldu da lehen kasua. Eutanasiarako eskubidea Hego Euskal Herrian baino ez dago aitortuta, Ipar Euskal Herrian legez kanpokoa baita oraindik ere.

Hegoaldean indarrean dagoen legeak, Espainiako Kongresuak onartutakoak, atariko testuan jasotzen duenez, «era informatuan, argian, eta denboran errepikatuan egindako» eskaerak baino ezingo dira prozesatu. Horrez gain, «pairamendu» egoeran egotea ezinbestekoa izango da prozesua abiatu ahal izateko: eutanasia egin ahalko zaio «pertsona horrek ezin onartuzkotzat duen eritasun edo pairamendu sendaezin bat nozitzen duelako, ezin izan dena baretu beste bide batzuen bidez».

Legeak berak eskatzen dituen baldintzak direla eta, eutanasia gauzatu ahal izateko, 40 egun inguruko prozesu bat pasatu beharko du pazienteak; zeinetan bere nahia argi azaltzen duen eta eta osasun profesionalek berresten duten pairamendu egoeran dagoela. Horregatik, eskubidea egikaritzeko pasatu beharreko galbaheak ugariak dira: pazienteak bere medikuari eskaera egin beharko dio, eta hamabost egunean eskaera berretsi. Baina mediku horrez gain, beste mediku batek eta berme eta ebaluazio batzorde batek ere aztertu beharko dute haren kasua, «baldintzak betetzen direla ziurtatzeko».

Legeak berak eskatzen dituen baldintza guztiengatik «berme juridiko nahikoa» eskaintzen duela iritzi diote zuzenbideko zenbait adituk. Baina kritikarik izan du, legea onartu zenetik indarrean sartu arte hiru hilabete besterik ez zirelako pasatu. Tarte hori laburregia den iritzia azaldu dute hainbat eragilek, ez baita astirik egon eskariei erantzuteko protokoloak ondo txertatzeko, eta osasun profesionalei behar adinako trebakuntza emateko.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Julen Portillo, eskuinean, Joseba Argiñano sukaldaria ondoan duela, ETB1eko Sukalerria saioan. ©Julen Portillo

Euskara, sormenerako harribitxia eta aukera

June Romatet Ibarguren - Gipuzkoako Hitza

Sortzaile gazteak dira Julen Portillo zarauztarra, Andrea Gonzalez bergararra eta Maddi Etxeberria andoaindarra. Internet bihurtu dute euren gotorleku, eta han biluzten dute barrua, eguneroko kontuak bideo labur bihurtuta. Hasieratik argi eduki zuten hirurek: euskaraz sortuko zituzten edukiak. Bidea egiten ari dira.

Alberto Corral eta Iñigo Brull. ©Oskar Matxin Edesa / FOKU

«Azpikontratazio modua aldatu nahi dugu: salerosketa da hau»

Mikel Garcia Martikorena - Bizkaiko Hitza

Ekainetik protestan dabiltza Apnabi Bizkaiko autisten familien elkarteko langileek dituzten baldintzengatik. Aldundiarekin itundutako "salerosketa" eredua bukatzeko eskatzen dute, Alberto Corral eta Iñigo Brull langile batzordeko kideek diotenez.

 

Elantxobeko portua, artxiboko irudi batean. ©Marisol Ramirez / Foku

Urpekari bat hilda atera dute uretatik Elantxoben

Berria

10:00ak aldera atera dute gorpua, herritar batek abisua eman ostean. Ikerketa zabaldu du Ertzaintzak.

Suhiltzaile bat lanean, artxiboko irudi batean. ©Juan Carlos Ruiz / Foku

95 urteko gizon bat hil da Bilbon, bere etxeak su hartu eta gero

Berria

02:00ak aldera gertatu da ezbeharra. Gizona bizirik atera dute suhiltzaileek, baina ospitalean hil da.

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Maria Ortega Zubiate

Informazio osagarria

Iruzkinak kargatzen...