Sare Herritarrak «ziklo berri bat» hasiko du, bost urteren ostean

Desagertzeko helburuarekin sortu zuten Sare Herritarra duela bost urte, eta asmo bera dute oraindik ere, atzo Gasteizen egindako agerraldian azaldu zutenez. Izan ere, haien ustez, plataforma desagertzeak esan nahiko luke amaitu direla urteetako sufrimenduak eta giza eskubideen urraketak, eta hasiak liratekeela elkarbizitzan eta bakean oinarritutako gizarte bat eraikitzen. Bost urteotan bide horretan aritu dira lanean, eta atzera begirako baikorra egin dute, nahiz eta aitortu urratsak «nahi baino motelago» datozela eta oztopo asko daudela oraindik gainditzeko.

Dena den, egindako urratsak garrantzitsuak izan direla esan dute; besteak beste, ETA desegin izana edota euskal presoak espetxe legeriaz baliatzen hasi izana. «Garai berri baterako atea zabaldu dute politikarien eta sindikatuen gehiengoak egindako adierazpen bateratuek eta Espainiako egungo gobernuaren jarrera aldaketak, nahiz eta azken hori ez izan guk nahi adinakoa». Azken hauteskundeei begiratuta, berriz, Sarek uste du badagoela «gehiengo bat» espetxe politikak aldatu ahal izateko. «Barkamen eskeek ez dute gehiago balio. Gehiengo horiek baliatzea borondate kontua da. Sufrimendua amai dadila eskatzen jarraituko du Sarek».

Orain, bost urte igaro eta gero, plataformak uste du «jauzi kualitatibo bat» emateko garaia dela; besteak beste, «sarea handituz» eta eurekiko mesfidantzaz jokatzen duten horiei ulertaraziz giza eskubideen aldekoa dela euren borroka, eta «alderdien eta ideologien gainetik» dagoela.

Hala, orain arteko bideari buruzko gogoeta plazaratzeko eta datozen urteetarako helburuak zehazteko ekitaldi bat egingo dute ekainaren 16an, Miramongo teknologia parkean, Donostian. Sareko kideez gain, han izango dira alderdietako, sindikatuetako eta kultur munduko ordezkariak ere.