Barrenetxea, doinu librean

«Joko tradizionala» saihesten saiatuko da larunbateko finalean, Urrizari ezustekoa emateko
Endika Barrenetxea pilotak aukeratzen, Javier Urrizaren begiradapean, atzo, Galarretan.
Endika Barrenetxea pilotak aukeratzen, Javier Urrizaren begiradapean, atzo, Galarretan. ANDONI CANELLADA / FOKU Tamaina handiagoan ikusi

Imanol Magro Eizmendi -

2019ko irailak 11

Javier Urriza (Iruñea, 1981) ia garaiezina da buruz buru, eta Endika Barrenetxeak badaki (Hernani, Gipuzkoa, 1990). Larunbatean elkarren aurka jokatuko dute, buruz buruko Kutxabank erremonte txapelketako finalean, eta iruindarra da faborito garbi urteko partida garrantzitsuenean. Urrizak bere ibilbideko zortzigarren finala du, eta zazpigarren txapelaren bila ariko da. Barrenetxeak, berriz, bigarren finala du, eta ez du txapelik. 2016an jokatu zuen aurrekoa, eta 30-21 galdu zuen Urrizaren aurka.

Txapel bilduma, baina, ez da Urrizaren faborito izaeraren argudio bakarra. Aurtengo txapelketan hiru partida jokatu ditu, eta hirurak alde handiz irabazi ditu: 30-18 Ansa II.ari; 30-22 Endikari; eta 30-20 Barrenetxeari. Azken partida horrek, baina, asko irakatsi zion Barrenetxeari. Hala onartu zuen berak atzo, finalerako pilota aukeraketan —ez zen arazorik egon eta biek aurkitu zituzten gustuko pilotak— «Konturatu naiz joko tradizionala eginez gero bera gehiago sartzen dela jokoan. Zabaletik sakatu, aurrean itxaron... Lau edo bost tanto jokatu bezain laster, bera eroso hasten da. Hori eragotzi behar dut nik».

Eta hori nola lortzen da? Barrenetxea pilotari «metodikoa» da, eta ondo pentsatua du Urrizari ezustekoa emateko estrategia: «Bere aurka jokatzeko gauzak aldatu behar ditut. Finalerdietan ez zidan nahi beste fruitu eman, baina bere buruan hazi bat sartzen saiatu nintzen, eta finalean loratzea nahiko nuke. Zalantza sortu nahi diot: finaleko egunean edozein tokitatik ager naitekeela. Lau sake ezberdin egiteko kapaza naizela erakutsi nion, errekurtso berriak ditudala... beldur hori sartzen saiatu nintzen».

Urrizak, baina, badaki aurkaria hori egiteko kapaza dela. «Endikak asko arriskatzen du. Sakea aldatzen eta berehala ausartzen da dejada edo horma-bikoekin. Joko deserosoa da berea; boladakako partidak izaten dira. Beraz, nire boladak bereak baino luzeagoak izan daitezen saiatu behar dut». Hori lortzeko gakoa zein den ere argi du: «Sakea. Nire sakearekin berak berearekin adina min egitea da nire helburua».

Urrizak 38 urte ditu, eta txapelketako parte hartzailerik zaharrena da. Binakako jokoan gazteak iritsi dira haren mailara, baina buruz buru oraindik antzematen da aldea. «Onena emateak itsutzen nau. Hori eman eta gero aurkariak irabazten badu, zoriondu baino ez dut izango». Buruz buruko txapel gehien irabazi duen bigarren pilotaria da, eta, larunbatean berriz janzten badu, lau faltako zaizkio Koteto Ezkurra harrapatzeko.

Urrizak eskarmentua du alde, baina, dioenez, ezinezkoa da finalak jokatzera ohitzea. «Hobeto kudeatzen ikasten duzu, baina hasieran beti zaude lotuta. Hasieran aurretik jartzen denak asko izango du irabazita larunbatean». Barrenetxeak ibilbide motzagoa du, baina, aukeraketan onartu zuenez, duela hiru urte finala jokatu zuenean baino prestatuago ikusten du bere burua: «Orduan, neure burua handien aurka ikusi eta txiki sentitzen nintzen. 'Zer egiten du nik hemen?', 'Hau nire tokia al da?', eta halakoak pentsatzen nituen. Orain ezberdina da, orain 'ni ez naiz hemendik kanpo egon behar' pentsatzen dut».

Hiru urte hauek, izan ere, asko zaildu dute Barrenetxea. Zintzo mintzatu zen bere bilakaera pertsonalaz. «Asko aldatu naiz, bai kantxan, eta baita kantxatik kanpo ere. Gaixotasun baten erruz [Crohn hesteetako gaitza izan zuen] hamalau kilo galdu nituen, eta lan handia egin behar izan dut berriz ere hemen egoteko. Arazo handiak izan ditut bidean, eta prozesu horretan neure burua landu dut».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Realeko Alexander Isak buruz erremate bat egiten, Rijekaren aurkako lehen itzuliko partidan. ©ANTONIO BAT / EFE

Lehenik, nork bere lanak

Jon Ander De la Hoz

Reala Europa ligako hurrengo faserako sailka daiteke gaur, Rijekari irabazi eta Napolik AZ Alkmaar azpiratzen badu. Silva deialdian da; Elustondo, berriz, ez
Lysa Tchapchet, jaurtitzeko prest, Elxekin jokatutako partida batean. ©BERRIA

Harribitxi bat pibotean

Julen Etxeberria

Hiru euskal jokalari ariko dira gaurtik Danimarkan, Europako Eskubaloi Txapelketan: Nerea Pena, Ainhoa Hernandez eta Lysa Tchaptchet. Azkenak debuta du lehia handi batean; Kamerunen jaio eta Atarrabian hamahiru urtez bizi ostean, Elxen ari da orain.
Albisu, Agirre, Ezkurdia eta Martija, atzoko pilota aukeraketan. ©ARITZ LOIOLA / FOKU

Lau pilotariek merezi zuten norgehiagoka

Amaia Igartua Aristondo

Bihar jokatuko dute Baikoko pilotarien greba zela-eta jokatu ez zen binakako finalerdia: Ezkurdia-Martija, Agirre-Albisuren aurka
Lau eta erdikoan ariko diren pilotariak, Jokin Altuna izan ezik. Amezketakoa ez zen izan atzo Miribillako frontoian egindako aurkezpenean. ©ARITZ LOIOLA / FOKU

Egoerara egokitutakoa

Julen Etxeberria

Larunbatean hasiko da lau eta erdikoa, eta banakakoaren lehiaketa sistema izango du: lau asteburutan jokatuko da, kale edo bale egiteko partidetan. Finala, 27an

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.