Jaurlaritzak hilean 300 euro emango die 25 eta 29 urte artekoei

Eusko Jaurlaritzak abenduan iragarri zuen emantzipatzeko zuzeneko laguntzak emango dizkietela Arabako, Bizkaiko eta Gipuzkoako 25 eta 29 urte bitarteko gazteei, eta, atzo, diru laguntza horien zenbatekoa zehaztu zuen Iñigo Urkullu lehendakariak: hilean 300 euroko laguntza emango die 25 eta 29 urte arteko gazteei gurasoen etxetik irten eta emantzipa daitezen; gehienez, bi urtez jaso ahalko dute. Datorren urtetik aurrera sartuko da indarrean, seguruenera 2024ko lehen seihilekoan.

Emantzipatzeko laguntza jasotzeko, baldintza hauek bete beharko dituzte eskatzaileek: urtean 28.000 euroz azpiko diru sarrerak izatea; Euskal Autonomia Erkidegoan erroldatuta egotea eta azken hamar urteetan gutxienez hiru urteko errolda agiria izatea; eta alokairu kontratua edo etxebizitza libre baten erosketa kontratua izatea. Kontrara, babes ofizialeko etxebizitza bat dutenek, izan alokairuan edo izan jabetzan, ezingo dute laguntza eskatu. Jaurlaritzak argitu du laguntza horiek bateragarriak izango direla Gaztelagun programaren alokairurako laguntzekin. DSBE diru sarrerak bermatzeko errenta eta bizitzeko gutxieneko diru sarrerak, berriz, diru sarrera gisa aintzat hartuko dira.

Gaur egun, 28.000 gazte inguru egon daitezke emantzipatzeko urrats hori egiteko moduan, Jaurlaritzaren arabera, baina ezinezkoa zaie gurasoen etxetik joatea 30 edo 35 urte izan arte. Jaurlaritzaren xedea da 2030erako gazteen emantzipazio adina 28 urtera aurreratzea —batez beste 30 urtekoa da orain—. «Emantzipazioa hasteko edo sendotzeko bultzada beharrezkoagoa denean» emango dituzte laguntzak, Urkulluren esanetan.

Krisi demografikoa

Eusko Jaurlaritzak datorren asteartean onartuko du 3 urte arteko seme-alabak dituzten familiei hilero 200 euro arteko laguntza ematea. Diru laguntza unibertsala izango da, eta, beraz, familia guztiek jasoko dute, errentari erreparatu gabe. Gainera, 100 euro gehiago emango zaie hiru seme-alaba edo gehiago dituzten familiei, 3 eta 7 urte arteko haur bakoitzarengatik.