HITZ ETZANAK

Erasoa

Andoni Egaña -

2019ko urriak 11
Haserre dabil Euxebio, eskopeta sorbaldan zintzilik zuela azaltzen zen Ander Lipusen pertsonaia hura. Pinudien banda marroiarena lehen, eta orain ehizarako baimena ere falta! Telefonoz jardutea alferrik dela eta kontuak ahalik eta azkarren argitzera hiriburura jo du. Hartara aurrez aurre aritzeko aukera izango du, berari gustatzen zaion bezala. Eta zapatutik aurrera ehizarako baimena lortzen badu, hiriburuan bertan ospatuko du, Martinprakazarrenera joan eta otordu ederra eginez.

Idazkariak bekozkoa jarri dio Elkarteko atean azaldu denean. Presaka eman dizkio azalpenak. Itxoin egin beharko dutela, eskuz ari direla garai batean bezala, baimenak banan-banan egiten. Hamar milatik gora. «Jendeari ahaztu egin zaiok eskulana zer den!». Zibereraso bat izan dela. «Ezin hasiko haiz galdezka hori zer den, berak natural-natural bota dik eta!». Hackerrak hiru Udali, Jaurlaritzari eta enpresaren bati ere eraso diela. «Akerrak! Esaten nian bai nik errezildarrak ez zirela urruti ibiliko!». Datuak itzultzeko erreskatea eskatzen dutela, baina ez diru xehean, bitcoinetan baizik. «Oraintxe hasi ninduan eurora ohitzen eta!».

Baimenik gabe eta txapelari hazka atera da. Gehiegi aldatzen ari da mundua. Etxera joko du zuzenean. Gosea ere joan egin zaio.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna