HITZ ETZANAK

Soberan

Andoni Egaña -

2019ko maiatzak 31
Adimentsu eta azkarrak garela esan behin eta berriz; ez bagina bezala jokatu etengabe. Horrelako zerbait egiten dute alderdi politikoek herritarrokin hauteskunde garaietan.

Gastuaren murrizketa aldarri, ingurumenaren gainbehera kezkagai edo norbanakoaren askatasuna sakratutzat dutenek ere hanka sartzen dutela jabetuko zara. Zeuk eskatu gabe, buzoia beteko dizute propagandaz. Eta hori da gutxienekoa. Tonto-tuntuntzat ere hartuko zaituzte. Zu, koittadu hori, ez zara gai, nonbait, hauteslekura joan, eta errezela erdi itxi batzuen atzealdean dauden paperak aurkitu, hautatu, gutun-azaletan sartu eta hautes-mahaiaren aurrean aurkezteko. Errezelek errezeloa sortuko dizutela antzeman diote. Laguntza behar duzu. Eta horretarako daude eurak. Zuri laguntzeko. Etxea beteko dizute erabiliko dituzun edo ez dituzun zerrenda-paperez eta gutun-azalez. Atzo jakin genuen PSEk Aretxabaletan zinegotzirik ez lortzearen arrazoia. Soraluzeko hautagaien zerrenda zeramaten Aretxabaletako buzoietan banatu zituzten paperek. Ohartu ziren akatsaz arduradunak; ahalegindu ziren konpontzen. Baina 36 lagunentzat berandu zen. Boto baliogabe horiek erantsiz gero zinegotzi bat lor zezaketeen... akaso Lurralde Antolamenduaz ardura zatekeena.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna