Albistea entzun

HITZ ETZANAK

Giltzari

Andoni Egaña -

2021eko azaroak 27

Duela ia bost urte Itxaro Bordak Argia aldizkarian idatzia: «Aditzen duenari bizitzeko poza oparitzen dio kantak, baita ahoak eman ahala hitzak hitzen ondotik bihikatzen dabilenari. Amek haurrei xuxurlatzen diete, maiteek elkarri, behartuek beraien buruei, etsipena uxatuz».

«Txiki txikitik», «Salamankara» edo «Aita Jainkoak» esanda ulertzen dugun kantuaz ari zen Itxaro Borda. Hogeigarren mendean zehar gehien kantatu izan ditugun abestietakoa izango da Salamankara estudiatzera bidali zuten gaztearen ibilerak kontatzen dituena. Eta bertso guztietan ezagunena izango da «Aita Jainkoak egin banindu, zeruetako giltzari, azken orduan jakingo nuke atea nori ireki. Lehenengo aitari, gero amari, gero anai-arreberi ta azken orduan isil-isilik nere maite politari» dioena.

Giltzak dira gako, nonbait. Baita Bilboko Abusu auzoan ere. Indarkeria matxistaren biktima izandako emakume bat etxegabetu dute, eta pisua tratu txarrak emateagatik kondenaturiko gizonaren esku utzi. Horretarako, batzorde judizialak sarrailagileari dei egin zionean, honek uko egin zion sarraila aldatzeari. Ez dakit sarrailagilea den gizonezko ala emakumezkoa; gaztea ala zaharra; diruz justu dabilen edo oso justu. Baina zerurik balitz, sarrailagile horixe nahi nuke bertako giltzari.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.