Zirrikitua

Demagun laurogei urtera hurbiltzen ari dela. Demagun duela berrogei bat urte egin zuela euskaraz alfabetatzeko ahalegina. Demagun euskaltzale fina dela eta ez duela inoiz bere burua «euskara hori ez dut ulertzen»-en hegalpean ezkutatu. Demagun egunero irakurtzen dituela, euskaraz, berriak eta gainerakoak. Gaur, Eusko Jaurlaritzaren iragarki batekin egin du topo.

«Dena gal dezakezu» irakurri du letrarik larrienetan. Atentzioa eman dio. Berari ari zaizkio. Edo berari ere bai. Hizki txikiagoak irakurtzera jo du gero. «Online jokoarekin, kirol apustuekin eta slotekin». Ikasi zuen zer den online. Beharko ikasi! Banketxearekin harremanetan jartzeko modu bakarra bihurtu da ia! Kirol apustuak zer diren badaki gaztetatik. Baina xelebrea iruditu zaio telebista publikoan kirol apustuak eskaini zaharra ez den erakunde batek haien arriskua azpimarratu izana. Slot ulertu ezinda geratu da. Bilobari galdetuko balio, hark ingelesez badaki, eta zirrikitu esan nahi duela erantzungo lioke, eta behin horrez gero, ez da bera hain kamutsa, eta lotuko luke ditxosozko hitza joko-makinekin...

«Garaiz erretiratzea garaipen bat da» irakurri du iragarkiaren behealdean. Bekainak harrotu ditu lehen irakurraldian. Urteak dira berak erretira txarrik egin ez duela...