HITZ ETZANAK

Gaia

Andoni Egaña -

2019ko ekainak 4
Gaiari buruz ia tesina bat egiteko adina ezagutza biltzen genuela mahai hartan pentsatu nuen. Bergaran ginen duela hilabete pasatxo. Bertso jaialdiaren osteko tragoxka hartzera taberna izkinako mahai batera apartatu ginen lau bertsolari eta gai jartzailea. Hogeitaka urteko bi lagun, hogeita hamarrak atzean utzitako beste bi eta neu. Eta ez dakit gaia nondik nora irten zen...

Ordu erdi luzez aritu ginen. Aitortzen dut neu nintzela gutxien nekiena, baina nik ere ematen nuen daturen bat edo iritziren bat edo beste. Gainerakoak berriz, elkarri txanda modu egokian hartuz, oso benetan jardun zutela iruditu zitzaidan. Gainera, zortea izan genuen eta, bertsolarietan bi Lapurdin hazi eta heziak izanik, mugaz alde batekoaren eta bestekoaren konparazioa egin ahal izan genuen. Xehatzera heldu ginen Iparraldean zer daukaten Hegoaldean ez duguna eta Hegoaldean zer daukagun han eskas dutena.

Bestelako gairik aski erabiltzen dugu bidaiatan eta saio ondorengo tarteetan, baina Bergaran berriketaldiaren muina gominolak izan ziren. Pottokiak, ostadar kolorekoak, masusta gorri-beltzak... Eta jabetu nintzen urte gutxian eta natural pasatu garela okela zaharrarena edo gaztearena zen hitz egitetik litxarreriez aritzera. Mundua aldatuz doa.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna