HITZ ETZANAK

Hamar urte

Andoni Egaña -

2019ko uztailak 26
Gaur hamar urte, Italiako Calabrian ginen lau bertsolari. Hotel batean eman ziguten ostatu hiru gizonezkooi, eta beste aparteko batean kuadrillako emakumeari. Ez zen, ordea, hori okerrena. Gaizki-ulerturen bat izan zen, eta, inprobisatzaileen jardunaldietara gindoazelakoan, gor-mutuen biltzar batera joan ginen. Bertsoak euskaraz botatzen genituen; gutariko norbaitek gaztelerara itzuli; hark italierara, eta horrek keinu hizkuntzara. Hanka-sartzeek ere alde ona beti dutenez, eramandakoa baino sentiberatasun handiagoa ekarri genuen gor-mutuen hizkuntzarekiko.

Orain hamar urte, Italiara abiatu ginen eguneko Frantziako Tourreko etapa Mikel Astarlozak irabazi zuen; Patxi Lopezek pare bat hilabete zeramatzan Lehendakaritzan; Reala denboraldi-aurrea prestatzen ari zen… bigarren mailan jokatzeko; pintxo-poterik ez zen artean gure herrietan; Twist-ik ez zegoen Harkaitz Canoren buruan ez bazen…

Hamar urte asko dira, eta ez da ezer. Egunotako beroak eraginda, zutabe hau idazteko buruan nerabilen esamolde bat zenbateraino zabaldua dagoen miatzera sartu naiz Interneten. Toki bakarrean aurkitu dut. Ez dago nonbait oso hedatua «Ama, nik bero!». Anjel Lertxundik erabili zuen zutabeburu, noiz eta 2009eko uztailaren 26an. Hamar urte gaur.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna