Albistea entzun

HITZ ETZANAK

Tximinotik

Andoni Egaña -

2021eko abenduak 9

Banuen adiskide bat, adinean oso aurrera zihoana, kristautasuna barne-muinetaraino sartua zuena. Eta behin, hala esan zigun, pertsonaren sorreraz ari ginela: «Jainkoak egin zuen pertsona. Jainkoak! Ze burutan kabitzen da pertsonak tximinotik gatozela? Nik urte mordoa dauzkat, eta urte hauetan ez dut inon sumatu tximinotik pertsonarik sortzen!».

Ederra zen argudioak argudioekin, usteak argudioekin, usteak usteekin edo argudioak usteekin desegin zitezkeen garai hura. Kalean, tabernan, plazan, autobus geltokian edo zinemako sarreran eztabaidatzen genuen. Orain, eztabaida ororen fokua aldatu egin da. Hedabideetan edo sare sozialetan baino ez da eztabaidatzen. Joan den urte eta erdian, ez dut aurrez aurreko eztabaida bakar bat bizi izan negazionista bat eta ez denaren artekoa; txertoa hartzearen aldeko eta aurkako biren artekorik ere ez.

Izan daiteke gizarte heldutasunera iritsi, eta besteen iritziak hobeto eramaten ikasi dugulako. Baina ez naiz hain baikorra. Segur aski pereza da. Gabon-otorduetako paktu ez idatzia hedatu da jendartera. Ez gara elkarri xipoka hasiko, bestela honek bukaerarik ez du eta. Total! Hemen gaude. Eta zer axola du inork ezagutzen ez dugun tipo batek buztinez egin gintuen ala tximinotik gatozen!

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.