Antzerkia

Felix Maria de Samaniego Araban jaio zen, Guardian. Ama zuen tolosarra. Eta bera, urtebetez, 1775ean, Tolosako alkate izatera iritsi zen. Fabulagiletzat daukagu nagusiki, nahiz bestelako literatur eremuetan ere murgildu izan zen.

Antonio Maria Labaien Tolosan jaio zen, 1898an. Eta bera ere iritsi zen, Bigarren Errepublikaren garaian, Tolosako alkate izatera. Gero, gerra zibila heltzean, iheslari joan behar izan zuen. Antonio Maria Labaieni aho batez onartzen zaio euskal antzerkigintzaren hastapenetan izan zuen garrantzia.

Bi aurrekari horiek aintzathartuta, zalantzan nabil. Eusko Jaurlaritzako Hezkuntza Sailean sortu den saltsan, bi protagonista nagusiak Tolosarekin lotzen baititut, nahiz eta akaso, Joanes Labaienek donostiartzat daukan bere burua. Idatz dezaket fabula bat, eskola-garraioa, ebazpenak, bateraezintasunak eta gainerakoak ukituz. Baina fabulek amaierako irakasgaia eskatzen dute, eta ez nago inori lezioak ematen hasteko moduan. Antzerki-lan bat errazago idatziko nuke. Izenburua ere deigarria litzateke: Jokin eta Joanes. Eta bi pertsonaia gutxitxo balira, Tolosa jiratik irten gabe erantsiko nizkioke obrari askotariko aginte postuetara ohituriko nire adinkide tolosarrak: Manu, Jonan, Garbiñe, Martxelo, Jaime, Kike...