HITZ ETZANAK

Isunak

Andoni Egaña -

2019ko irailak 12
Scrupulus hitzak hartxintxarra adierazten du. Oin-zolaren eta oinetakoaren artean ustekabean sartzen zaigun hartxintxar hori, askotan kentzeko alferrez bertan uzten duguna baina kendu arteko onik ematen ez diguna gehienetan. Berea lortzeko txikikerietan erreparatzen ez duenarengatik esaten dugu eskrupulurik ez duela, kontzientziako zimikorik ere sentitzen ez duen bihotz gabearengatik.

Berripaper honek Everestek bisitariz gainezka egin duela eta Nepalgo Gobernuak iragarritako neurrien inguruko erreportajea argitaratu zuen atzo. Paraje haietan pilatzen den zaborraren arazoari aurre egiteko lehen ere isunak jartzen hasiak zeuden. Edurne Pasabanek hala zioen, ordea: «Kontua da horrenbeste diru mugitzen den espedizioetan isun horiek prezioaren barruan sartzen dituztela».

Zenbaitek ez du inoiz hankapean hartxintxarrik sentitzen. Negozioaren errentagarritasunari soilik begiratuta, legea bete baino isunak ordaindu nahiago duenik bada. Eta ez mendian bakarrik. Handiak izaten dira horrelakoak, oso handiak, sakelan zulo txiki bat izatea axola ez zaien horietakoak. Legea omen da lurrak baino lehen berdin gaitzakeena. Ba nik lege bereziak egingo nituzke legea bete baino isuna ordaindu nahiago duten horientzat...

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna