BIRA
Errespetua
Hauteskunde kanpaina bete-betean gaudela, derrigor idatzi behar dut Gernika-Lumoko merkatu plazaren egoeraz. Astelehen honetan ez dira etorri; beraz, litekeena da datorrenean politikariak etortzea. Hauteskundeak direnero egiten dute buelta. Sutan jartzen naiz. Batez ere, agintean daudenek ez dutelako urte askotan ganorazko nekazaritza politikarik egin. Dena egiten dute monolaborantzen eta eutsi ezinezko inbertsioen alde. Dirulaguntzen menpe bizitzera kondenatu nahi gaituzue, eta guk ekoizten dugunetik bizi nahi dugu, batez ere.
Astelehenean plastikozko botila mordo bat eta zigarrokinak bildu behar izan genituen nire erreskadan geundenok gure ortuariak zaborrez inguratuta egon ez zitezen. Aurreko astelehenean esnea erostera joan nintzen Bizkaiganekoengana eta txori-kakaz beteta zeukaten mahaia. Kantoiko mahaietara hurbiltzea ezinezkoa da euria egiten duenero; izan ere, putzu itzela egiten zaie aurrean eta horrela ez dago bezeroak lasai arrimatzeko modurik. Benetan, pentsatu bi bider goxokiak banatzera etorri baino lehen. Galdetu zuen buruei zer den behar duguna, ze supermerkatu handiei aparkalekuak egiteko eta lurrak berrizendatzeko galdera hori eta beste asko egiten dizkiezue zuen buruei eta teknikariei. Erakusten zaiguna baino errespetu gehiago merezi dugu.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
