HITZ ETZANAK

Kopa

Andoni Egaña -

2018ko irailak 15
Batxiler garaian, ez genuen axaletik baino ikasi. Definizioa eta bi hiru adibide. «Kopa bat Jerez» zen adibide klasikoa. Zatia osotasunaren partez edo osotasuna zatiaren lekuan. Hots, Jerez esatea aski zen Jerezen egiten den ardo oro aipatzeko. Metonimia zuen izena artefaktuak, eta ez ziguten kontatu zertarako balio zuen. Ondorioz, ez genion jaramonik egin eta azterketa egunean esku-ahurra izaten genuen jakintza bide.

Gerora jabetu ginen sorkuntzarako ezinbesteko elementua zela «metonimia» zelako hura. Ezaugarri bakar batekin osotasuna adierazi ahal izatearena gaitasun bat zen mundu modernoan gero eta garrantzitsuagoa. Marrazkilaririk txarrenak ere badaki Getaria ongi marrazten herria arratoiaren siluetara murrizten badu; Gasteiz panpina bat da aterki batetik zintzilik; zapi gorria Sanferminak... Logoek, markek, emotikonoek horixe dute sorburu: osotasuna zatitxo baten bidez adierazi ahal izatea.

Donostia Zinemaldiak sari gisan ematen dituen urrezko eta zilarrezko maskorrek —Donostia maskorra baita metonimikoki— diseinu aldaketa izango dute aurten. Lehengoak errealistegiak ziren, maskorregiak. Estilizatuagoak eta modernoagoak dira orain. Izango da berriaren aurka egingo duenik, hori ez dela maskor bat eta horrelakoak esanez...

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna