HITZ ETZANAK

Txakurrak

Andoni Egaña -

2019ko azaroak 12
Eguraldi zakurra. Eguraldi tigrea eta eguraldi krokodiloa. Denak batera egiten zituen. Arratseko zortziak eta hogei...» idatzi zuen Hasier Etxeberriak Eulien bazka-n. Ez zen hauteskunde egunaz ari, baina balioko zukeen esaldiak joan zen igandekorako. Eguraldi eta ordu-modu parera zetozen. Hurrengo baterako utziko dut zakurra hori txar- txarrerako bakarrik edo txar-txarrerako nahiz on-onerako, bietarako, erabili izan den gure usadioan.

Txakurrenak atentzioa eman zidan, ordea, igandean. Eman nuen botoa, hasi nintzen hauteslekutik ateratzen eta zerbait sumatu nuen traban atean. Hiru txakur ziren, botoa ematera zihoazenei laguntzera joanak, nagusien ondora epelera sartu nahian, muturra kristalean. Ireki nuen atea, izterrarekin bultzatuz goxo galarazi nien sarrera, eta horretan bukatu zen pasadizoa. Ez noa baloraziorik egitera. Orain urte batzuk esan izan banu hauteslekutik irteeran hiru txakurrekin egin nuela topo, jendeak besterik pentsatuko zukeen. Aldatuz doa mundua...

Txakurren hauteskundeak izan dira hauek. Eguraldi zakurra, txakurrak atean eta Albert Riveraren bideoa Lucas txakurrarekin. Inkestek oso behera zihoala aditzera eman zioten eta azken ahalegina egitea erabaki zuen nonbait. Burutazio ñañoagorik!

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna