BIRA
Lan handia
Pozik nago. Baina ez erabat. Poztu egiten naiz Armaniz jantzi arren manifestaziotik zetozen haiek hauteskundeetan lortu dituzten emaitzengatik. Lan handia dago egiteko, hala ere. Batzuek botoak zenbatzen eta atzotik aurrera zein paktu posible zeuden aztertzen ari ziren bitartean, gizon batek bikotekide ohia hil zuen Gasteizen. Hil eta ordu batzuetara aurkitu zuten, 3 urteko umea ondoan zeukala. Komunikabideek esan zuten onik aurkitu zutela umea, baina ez da espresiorik egokiena egoera deskribatzeko. Eta euskaldun gehienek gaztelaniaz ikusi zuten hauteskunde gauaren kronika. Eta hautagai guztiek ez daukate elkarrizketetan euskaraz egiteko mailarik. Bai, lan handia daukagu aurretik. LGTBI+ siglek esan nahi dutena ere ikasi egin behar dugu aurrerantzean galdetzen digutenerako. Eta hori gutxi balitz bezala, lehen sektoreari benetan erantzun behar zaizkio galderak eta konpondu aferak, eta pentsioak duinago behar dira, eta kulturak biziraun ez ezik sortu egin behar du, eta hezkuntzan dauden arrakalak ixteak mesede egingo digu, eta etxebizitza eskubidea bermatu egin behar da... eta hainbat gauza gehiago. Hauteskundeak hauteskunde, nahi adina motibo daude oraindik ere manifestazioetara joateko. Berdin du kaikua daramagun edo trajez goazen, baina lan handia dago egiteko.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
