JIRA

Armada merkea

Angel Erro -

2019ko urtarrilak 2
Alemania aztertzen ari omen da, egunotan plazaratu dutenez, bere armadan atzerritarrak (ez edozein atzerritar, oraingoz behintzat, atzerritar on, Europar Batasunekoak) onartzen hasi ala ez. Aberriaren defentsa bihurtu da, kanpotarren eskulan merkea behar duen beste edozein lan eremuaren moduan, tokikoek egin nahi ez duten beste lanpostu (gaizki ordaindu) bat: komunak garbitu ala mahatsa biltzea bezalakoa. Baina tokikoek egin nahi ez omen duten lan horien gainean erori ohi da atzerritarrak lana kentzera datorkigulako salaketa populista. Horregatik ari dira aztertzen nola egin sentimendu nazionalista (hauteskundeetan hain errentagarria, azkenaldian hain harroa) ez harrotzeko. Horregatik, beharbada, hiritar europarrei bakarrik emanen zitzaien aukera. Ongi badakite bizitzan aurrera atera nahiak edonongo nazionalizatzen zaituela. Horregatik, iragarri dutenez, hasiera batean, behintzat, mediku edo informatikari postuak betetzeko baino ez litzateke. Gaikuntza baxuko profiletan hutsune eta behar gehiago egonen dela pentsatzekoa den arren. Beharrak zaharra merkatura eta gaztea atzerrira edo gerrara, besteenetara. Beharraren araberako hierarkia ankerra nagusitzen da beti, armada batekoa baino zorrotzagoa.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna