TXAPELA BURUAN. Alazne Varona. Fijin dagoen bilbotarra

«Nik lana aurkituz bidaiatzen dut»

Ingelesa ikastera joan zen Varona Zeelanda Berrira. Bederatzi hilabete eman zituen han, ostatuaren eta janaren truke lan egiten. Etxerako bidean zegoela, Fijin harrapatuta geratu zen, osasun krisiaren ondorioz.
BERRIA Tamaina handiagoan ikusi

Peru Azpillaga Diez -

2020ko maiatzak 7

«Fijin bi aste pasatzeko asmoa nuen, baina hilabete eta erdi daramat jada hemen», hasi da kontatzen Alazne Varona (Bilbo, 1996). Zeelanda Berri osoa bikotekidearekin zeharkatu ostean, etxerako bidea hartu zuen bere kabuz. Plana: Vanuatu, Fiji, Australia, Vietnam... «Gutxinaka» bueltatu nahi zuen Varonak, eta abuzturako Bilbon egotea zeukan buruan. Oraingoz, ez du ideia hori alboratzen. Hala ere, ez da berak aurreikusitako eran izango; izan ere, koronabirusak eragindako krisiaren ondorioz, Fijin harrapatuta geratu da.

Oraingoz ezin zaitezke Fijitik atera. Hala ere, ez da leku makala konfinatuta egoteko, ezta?

Egia esan, Interneten Fiji bilatuko bazenu, sekulako hondartza zoragarrien argazkiak topatuko zenituzke. Hori, ordea, turistentzako Fiji da. Hemen turismoaz bizi ez dena nekazaritzaz bizi da, azukre produkzioaz batez ere. Oso pertsona umilak dira, jatorrak, beti hitz egiteko prest dauden horietakoak; alde horretatik oso gustura nago hemen. Gainera, oso koronabirus kasu gutxi egon dira, eta, beraz, mugak itxi dituzten arren, ohiko bizimoduari eutsi diote. Arazoa da ezin zarela atera, eta alde turistikoa ere ezin duzula ezagutu.

Eta non zaude zehazki?

Mulomulo Nadin. Nik berez lana aurkitzen bidaiatzen dut. Hau da, lana eginez, ostatuaren eta janariaren truke. Hemen, ordea, ezin izan dut, koronabirusaren ondorioz lotuta neukan familiak atzera egin duelako. Hala ere, beste familia batek gela bat alokatzea lortu nuen, eta hilabete eta erdi daramat haiekin bizitzen, parke natural baten alboan. Hori bai, online egiten ari nintzen masterra amaituta, zer eginik gabe geratu naiz, mugak noiz irekiko esperoan.

Nola heldu zara zu horraino?

Zeelanda Berrian bederatzi hilabete eman ostean, bisa amaitu egin zitzaidan. Horregatik alde egin behar nuen. Bi aste egin nituen Vanuatun, Fijin bi egingo nituen, eta, ondoren, hegazkina neukan hartuta Australiara joateko. Nire ideia pixkanaka Euskal Herrira itzultzea zen, abuztu aldera Bilbon egoteko.

Zertara joan zinen Zeelanda Berrira?

Ingelesa ikastera joan nintzen; hasieran hiru hilabete egotea zen asmoa, baina birritan luzatu dut bisa. Nire aurrekontuak ez zuen ematen urte osoko ikastaro bat ordaintzeko: beraz, zer egin nezakeen hizkuntza ondo ikasteko? Era horretan bidaiatu. Nik uste hori dela ikasteko modurik onena: bidaiatu, familiak ezagutu, haiekin bizi eta bertako bizimodura moldatu. Horrela eginda, gainera, askoz merkeagoa da.

Bederatzi hilabetetan denetarik egiteko aukera izango zenuen...

Heldu eta berehala, furgoneta bat erosi genuen, hemen oso erraza eta merkea delako. Orduan, lehenengo hilabetea erdi turismoa egiten pasatu genuen. Aldi berean, bizimodua ordaintzeko, kiwiak batzen ibili ginen. Gero, ordea, furgoneta matxuratu eta plana aldatu behar izan genuen. Beste auto bat erosi eta lau hilabete igaro genituen familien etxeetan, esan bezala, lan eginez ostatuaren truke.

Nola topatu zenituzten familia horiek?

Badaude aplikazio batzuk; guk workaway izeneko aplikazio baten bidez egin genuen. Zuk zure profila osatu eta nahi duzunaren arabera, hainbat aukera agertzen zaizkizu. Gerora, familiarekin egonaldia hitzartu, eta listo. Esate baterako, guk bi hilabete pasatu genituen baserritar familia batekin, ia 3.000 ardiren artean.

Zergatik aukeratu zenuten Zeelanda Berria?

Alde batetik, Ozeania ez genuelako ezagutzen, eta Pazifikoko irletako bizimodua ezagutu nahi genuelako. Australia eta Zeelanda Berriaren artean geunden, baina azken horri buruz oso ondo hitz egin zigutenez, hori aukeratzea erabaki genuen. Eta, egia esan, oso pozik gaude egindako erabakiaz. Hemengo bizimodua benetan lasaia da, oso jende gutxi bizi delako. Hiri bakarra dago, Auckland; beste guztia herri handiak dira. Gainera, bi irlak osorik ikusteko denbora eman zigun, eta izugarriak dira. Paisaiak liluragarriak dira. Eta, oso txikia izan arren, denetarik dute: hondartzak, sumendiak, fiordoak, geiserrak, glaziarrak... Kanpatzeko ere leku ezin hobea da Zeelanda Berria. Doako kanpin ugari daude, eta egunero leku zoragarri batean esna zaitezke: hondartzan, mendian...

Bizi izandako esperientziatik zer da gehien gustatu zaizuna?

Era horretan bidaiatzeak, hainbeste denboraz gainera, zeure burua ezagutzeko aukera paregabea ematen dizula esango nuke. Denbora asko ematen duzu bakarrik, eta, nolabait esateko, zu zara momentu oro zure bizitzaren jabe. Zuk zeuk erabaki behar duzu dena: zer egin, nora jo, zertaz bizi... Asko ikasten da. Horrekin batera jende asko ezagutzeko aukera ematen dizu, baita beste bizimodu batzuk ikasteko ere.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Larry King telebista aurkezle eta irrati esataria ©

Larry King irrati esatari eta telebista aurkezlea hil da

Uxue Gutierrez Lorenzo

Los Angeleseko Cedar Sinai Medical Center ospitalean zendu da, 87 urterekin. 'Larry King Night' gaueko irrati saioak egin zuen ezagun.

Lanaren aurkezpen ekitaldia. ©@bizipoza_org

'Mundu berri bat guztiontzat' lana aurkeztu du Bizipozak

Berria

Hamabi abestiz eta 11 ikus-entzunekoz osatutako lan bat da, eta Bizipoza osatzen duten elkarteen errealitatea erakustea du helburu.

Angel Azkorbebeitia artzaina, bere Abadiñoko baserrian, Gorbeiako euskal artzain txakurra ondoan duela. ©ANDONI CANELLADA / FOKU

Euskal arraza, galzorian

Jone Arruabarrena

Euskal Artzain Txakurraren Adiskideak elkarteak bultzatuta, EHUko Biomics ikerketa taldeak egin duen azterlanean ondorioztatu dute euskal artzain txakurra egoera larrian dagoela. Endogamia handia dauka arraza horrek, eta gaur egun 470 banako daude erregistratuta. Nazioartera jauzi egin du ikerketak orain.

 ©JAGOBA MANTEROLA / FOKU

«Denek gaizki pasatuko genuke zortzikoa jo eta ezin dantzatuta»

Iker Tubia

Irakaslea eta abeslaria da Onsalo, eta musika beti du erdigunean. Erromeria taldea izanik, egoerara moldatu behar izan dute, baina ez da hain txarra izan 2020a: «Urtea gazi hasi zen, baina goxo akitu da».

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Peru Azpillaga Diez

Informazio osagarria