Albistea entzun

«Bizigaitzago» den mundu bati jarritako musika elektronikoa

Gaurtik larunbatera bitarte egingo dute musika elektronikoaren Dantz jaialdia, Donostian. Berrerabilpena izango dute ardatz aurten
Jaialdiaren arduradunak eta erakundeetako ordezkariak jaialdiaren aurkezpenean, Donostian.
Jaialdiaren arduradunak eta erakundeetako ordezkariak jaialdiaren aurkezpenean, Donostian. BERRIA Tamaina handiagoan ikusi

Aitor Biain -

2022ko irailak 8

Jatorrizko formatua berreskuratuta dator musika garaikide eta elektronikoaren Dantz jaialdia aurten. Seigarren urtez egingo dute, eta, antolatzaileek azaldu dutenez, inoizko jendetsuena eta «anbiziotsuena» izatea espero dute. Izan ere, pandemia aldikoekin alderatuta, ibilbide, edukiera eta esperientzia handiagoa izango baitu aurtengoak. Gaur hasi eta larunbata bitarte, alor horretako Euskal Herriko nahiz nazioarteko musikariek beteko dituzte Donostiako bazterrak.

Jaialdiaren egitarauak musika elektronikoaren aldaera ugari biltzen ditu, baita formatuak ere. Nina Kraviz DJ errusiarra, Red Axes bikote israeldarra eta FJAAk bikote alemaniarra izango dira jaialdian parte hartuko duten artista ezagunenak, baina guztira hogei artista baino gehiago ariko dira. Horien artean dago, esaterako, Aitor Etxebarria musikari gernikarra; musika elektronikoaren munduan El_Txef_A ezizenarekin aritzen da, eta Euskal Herriko DJrik ezagunetariko bat da.

Dantz Point ekitaldia izango da jaialdiaren abiapuntua gaur arratsaldean. Emanaldi bana eskainiko dute Loreak, Miravalles eta Orphidal DJ-ek Kursaaleko terrazan. Bihar goizean, berriz, DJ eta musika ekoizpen ikastaroak eskainiko dituzte Tabakaleran, eta herri bazkaria egingo dute eguerdian (izena eman behar da info@dantz.eu helbidean).

Arratsaldean, ostera, doako DJ saioak izango dira Nestor Basterretxea plazan eta Kutxa Kultur Klubean. Iluntzean, The Two Mamarrachos eta FJAAKren kontzertuak izango dira, eta Modulor, Dans eta Neskaren emanaldiek itxiko dute eguna.

Balioen transmisioa

Miramongo anfiteatroan izango dira larunbateko ekitaldi nagusiak, edukiera mugarik gabe aurten. 17:00etan hasiko dira kontzertuak, eta gauerdira bitarte musika elektronikoa lantzen duten artistarik ezagunenak ariko dira bertan. Antolatzaileek jakinarazi dutenez, autobus zerbitzu berezia jarriko dute Tabakaleratik Miramonera joateko.

Jaialdia 2017an sortu zuten, eta, harrezkero, «kultur marka» eta «proiektuen laborategi» ere bihurtu da Dantz, antolatzaileen hitzetan. Gizarte ikuspegia eta balioen transmisioa dira, hain zuzen ere, jaialdia bereizgarri egiten duten ezaugarrietako bi, eta horren erakusgarri dira ondare artistikoari lotutako Dantz Point ekitaldia, Dantz Academy egitasmo hezitzailea eta ehunen jasangarritasuna sustatzea helburu duen Dantz Wear proiektua.

Bada, aurtengo egitarauak ere ideia horietan sakonduko du. Gero eta gehiago sortu eta xahutzen den garaiotan, hondakinak berrerabiltzeak duen balio gehigarrian egingo dute azpimarra, baina kasu honetan, musikara ekarrita. Hori baita musika elektronikoaren funtsa, «gero eta bizigaitzagoa» den munduan doinu zaharretatik berriak sortzea.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Oier Guillan, Agurtzane Solaberrieta eta Haritz Azurmendi ©Jakin

Idoia Beratarbide eta Oier Guillan dira Joan Mari Torrealdai ikerketa bekaren irabazleak

Isabel Jaurena

'Artxibo biluzia' proiektua izan da saritua, zeinak Torrealdairen artxiboen lapurreta duen abiapuntu.

Ikasleak, goizean, sartzeko zain. / ©Iñigo Astiz

Martxan da Durangoko 57. Azoka

Paulo Ostolaza

Ireki ditu ateak Landako guneak. Ikasleak izango dira goizeko protagonistak, eta 14:30ean hasiko dira Ahotseneako ekitaldiak.

Langileak Durangoko Landako guneko salamahaietako bat prestatzen, atzo. ©MARISOL RAMIREZ / FOKU

Eztanda baten esperantzan

Iñigo Astiz

Gaur hasiko da Durangoko 57. Azoka, eta, azken bi urteetako gorabeheren ondoren, pandemia aurreko itxura berreskuratzeko erronka izango du aurrez aurre igandera bitarte. Musikaren euskarri fisikoen krisiak eta prezioen igoerak eragindako ziurgabetasunari ere erantzun beharko dio.

 ©Aritz Loiola, FOKU

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Aitor Biain

Informazio osagarria

Iruzkinak kargatzen...