TXAPELA BURUAN. Jox Oiz. Eskozian bizi den eltzaburutarra

«Nazionalistek aise irabazten dute, baina ez plebiszituan»

Soinu ingeniaria da Oiz, eta bere bizitzak eskoziar doinua du. Esan duenez, COVID-19 dela-eta, zalantzak dira nagusi Glasgowko musika eszena «ikaragarrian». Erreferendum gogoa sumatu du.
BERRIA Tamaina handiagoan ikusi

Iker Tubia -

2020ko ekainak 26

Herri txikian sortu arren, beti nahiago izan ditu hiriak Jox Oizek (Eltzaburu, Nafarroa, 1991). Sei urte daramatza Eskoziako Glasgow hirian bizitzen, eta soinu ingeniaria da. Ekoiztetxean jasotzen dituzten telebista saioen soinuaz arduratzen da bera. Azken hilabeteetan lanik gabe dago, COVID-19ren ondorioz.

Zerk eraman zintuen Glasgowra?

Urte sabatikoa hartu nuen 2014an, eta Londresen egon nintzen McDonald's batean lanean. Telebista eta irratia gustuko nituen, eta soinuarekin zer ikusia zuen zerbait egin nahi nuen. Beraz, Glasgowra etorri nintzen, deus jakin gabe eta inor ezagutu gabe. Oso ongi hasi zen dena: 07:00etan ailegatu nintzen, unibertsitateko informazio gune bat ikusi nuen aireportuan, eta autobusa jarri zidaten hirira joateko.

Eltzaburutik Glasgowra; aldea handia da. Zer itxura hartu zenion?

Eltzaburun jaio izanak eragin izan du beti nahi izan dudala hiri handietara joan, saltsa hori gustatzen zaidalako. Hiri industriala da Glasgow, beraz, ez da polita turistarentzat. Eraikin oso politak dauzka, baina utziak daude, klimagatik fatxadak belzten dira. Baina jendea oso jatorra da; lehenbizikotik lagundu ninduten.

Erreferendumaren garaian iritsi zinen. Nola izan zen?

Erreferendumaren egunean George Squarera joan nintzen, independentziaren aldekoen plazara: banderak zeuden, besta giroa zegoen. Besta giroa zen, eskoziarrek duten umore arraro horren ospakizuna. Eguna pasatu ahala, ikustean independentzia ez zela aterako, jendearen aldartea asko aldatu zen.

Bigarren erreferenduma nahi dutela dirudi. Zer giro dago kalean?

Manifestazio oso handiak ikusi ditut, batez ere iaz eta aurten. Ingalaterrak erabaki zuenetik Europako Batasuna uztea, mugimendu independentistari su pixka bat eman dio. Baina pixka bat kontraesanezkoa da egoera, EAEn bezala EAJrekin. Hemengo nazionalistek oso aise irabazten dute, baina erreferendumean galdetuta ezetz ateratzen da, nahiz eta aldea txikia izan. Ez dut ulertzen.

Euskal Herrian baino erosoago zaude Glasgown?

Egia erran, ahaztu dut pixka bat zer bizitza neukan Euskal Herrian. Azkenean, hemen bizitza bat egin dut, lagunak, lana... errutina bat dut. Euskal Herriko lagunak ikusi nahi ditudanean hara joaten naiz oporretan.

Lan aukera gehiago duzu?

Etorri nintzenean, ez nekien telebista industria txiki bat zegoenik. Euskal Herrian baino lan gehiago dago, bai. Duela bi urte saiatu nintzen Euskal Herrian eta Espainian, eta gaizki. Segidan ikusi nuen ez zidatela nahi nuena inoiz eskainiko: gutxienez urte beterako kontratua.

Eskozian musika kultura handia dago, eta zuzenekoak garrantzia du. Nola bizi duzu hori?

Gainera, Unescoren City of Music programaren barruan dago. Hemengo musika eszena ikaragarria da: ia taberna bakoitzak badu bere musikaria. Nahiz eta batzuetan gitarra eta ahotsa bakarrik izan, oso onak dira, eta jendeari asko gustatzen zaio. Koronabirusarekin, jende asko dabil beldurtuta, ez dakitelako zer gertatuko den taberna txiki hauekin.

Duela zenbait urte, Euskalerria irratian sukaldaritza saioa egiten zenuen. Izan du segidarik horrek?

Irratia hainbertze gustatzen zait... Garai ona izan zen: Txari Eletarekin aritu nintzen, eta oso ongi pasatzen nuen. Telebistan baino gauza ugariagoez hitz egin daiteke irratian. Sukaldean jarraitzen dut, nire kasa, eta gainontzekoentzat prestatzen. Labean ibiltzea gustatzen zait.

Zer moduz jaten da Eskozian?

Gaizki. Badaude tokiko janariak, adibidez, haggisa. Baina orokorrean janaria nahiko txarra da, eta barazki eta fruta ona aurkitzea zaila da. Alkohola aurkitzea bertze kontu bat da, askoz ere errazagoa da hori.

Zerbaiten faltarik sumatzen duzu? Edo dagoeneko ez?

Oraintxe bertan, familia, duela gutxi osaba izan naizelako. Janaria, lagunak, bizimodua... lehenbiziko hiru-lau urteetan horien falta sumatzen duzu, baina hori pasatzen da onartzean itzulita ere ez litzatekeela lehengo bizitza izango.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

18 kasatzeman dituzt azken ordueta Zangozan. ©Iñigo Uriz/FOKU

Beste neurri batzuk hartuko dituzte Zangozan

Berria

Azken orduetan, 18 positibo atzeman dituzte han. Hego Euskal Herrian, 234 positibo izan dira.

Kaltzda Zahar eguneko zenroa, Bizkaian. ©Marisol Ramirez/FOKU

Eguneko zentroak irekiko dituzte gaur Araban

Berria

Zahar etxeetako murrizketek abuztuaren 9ra arte jarraituko dute indarrean.

Basurtuko erietxearen kanpo aldean ostiralean hasi ziren PCR probak egiten. ©JAVIER ZORRILLA / EFE

Berriro ere berrehun positibo baino gehiago egun bakarrean: 255

Mikel P. Ansa

Bezperan baino 39 kasu gutxiago detektatu dituzte azkeneko 24 orduetan, baina berrehuneko langatik gora jarraitzen dute eguneko kasu berriek. Nafarroak osasun arreta indartuko du.

Emakume bat Zisjordaniako Bani Naim herrian maskarak saltzen, hil hasierako irudi batean. ©ABED AL HASHLAMOUN / EFE

Palestinako kasuek gora jarraitzen dute, neurriak gogortu arren

Ander Perez Zala

PANek 11.000 positibo baino gehiago baieztatu ditu, eta haren diru sarrerak %80 txikitu dira

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna