Altsasuko auziko bost preso bigarren graduan sailkatu dituzte

Espainiako Espetxe Zuzendaritzak bigarren graduan sailkatu ditu Altsasuko auzian zigortutako zazpi gazteetatik bost, eta, horrenbestez, unean uneko baimenak eskatzeko eskubidea izango dute. Oihan Arnanzek (bederatzi urte eta erdiko zigorra), Jokin Unamunok, Adur Ramirez de Aldak (zortzi urte eta erdiko zigorra), Jon Ander Cobek eta Julen Goikoetxeak (zazpi urte eta erdiko zigorra) jaso dute Espetxe Zaintzaren jakinarazpena. Zigorraren laurdena betea duten honetan sailkatu dituzte bigarren graduan.

Bost gazteek unean uneko baimenak eska ditzakete Zaballako (Araba) espetxetik ateratzeko, asteburuetan edo jaiegunetan. Era berean, bigarren graduan egonik, hirugarren gradura pasatzea eskatzeko aukera edukiko lukete. Oihan Arnanzek, Jokin Unamunok eta Adur Ramirez de Aldak 1.151 egun daramatzate kartzelan, eta Jon Ander Cobek eta Julen Goikoetxeak, berriz, 619 egun.

Altsasuko auzian zigortutako beste bi gazteak, Iñaki Abad eta Aratz Urrizola, berriz, hirugarren gradura aldatu zituzten iazko urte amaieran, eta ordutik egunero atera ahal dira kartzelatik lana egiteko edo trebatzeko, eta gaua barruan pasatu behar dute; asteburuak ere kanpoan igarotzen dituzte.