Albistea entzun

Datorren asteko estreinaldiak

'Dardararen bat' bihotzean

Berri Txarrak taldearen Ikusi Arte birako irudiak biltzen dituen dokumentala egin du Marina Lameiro zinemagileak: 'Dardara'. Ostiralean estreinatuko dute Hegoaldean
Berri Txarrak taldeak mundu osoan emandako kontzertuetako irudiekin eta haien zaleen testigantzekin grabatuta dago <em>Dardara</em> dokumentala.
Berri Txarrak taldeak mundu osoan emandako kontzertuetako irudiekin eta haien zaleen testigantzekin grabatuta dago Dardara dokumentala. DARDARA Tamaina handiagoan ikusi

Nagore Arin -

2021eko martxoak 13

Dar-dar, Gorka Urbizuren gitarra eta ahotsa sinergia betean. Dar-dar, Galder Izagirreren bateriak eragindako uhinen anabasa. Dar-dar, David Gonzalezen baxuaren dantzaldiak sortutako astrapala. Dar-dar, jarraitzaileen oihu ozen eta desentonatuen danbada. Dar-dar, Dardara. Horrela du izena Marina Lameiro zinemagileak Berri Txarrak taldeari buruz ondu duen ikus-entzunezkoak. Ikusi Arte biraren askotariko irudiak jasotzen ditu dokumentalak, eta astelehenean estreinatuko dute Ikuspuntu Nafarroako Zinema Dokumentalaren Nazioarteko Jaialdian, Iruñean. Ostiralean, berriz, zinema aretoetan izango da ikusgai.

Duela hamasei hilabete igo zen azkenekoz Berri Txarrak agertoki batera. Iruñean izan zen azkena, Nafarroa Arena pabiloian, eta 11.000 jarraitzaileren babespean esan zioten «ikusi arte» ibilbideari. Kontzertu horrekin egindako bira da Lameiroren bigarren lan luzearen gertaleku nagusia, baina hori baino askoz gehiago ere bada Dardara. Gorka Urbizuren hitz eta gogoeta ugarietatik abiatuta antolatu du ekoizpena Lameiro zuzendariak, eta sortzailearen, obraren eta hartzailearen arteko triangeluan kabitzen den guztiaz hausnartzera gonbidatzen du. Eta hiru helduleku horietatik, zaleei dagokienak du pisurik handiena; izan ere, jarraitzaileengan eta haien aniztasunean jarri du arreta zinemagileak.

Begirada askotarikoak

Dokumentazio lan hutsean eta kontzertuetako irudietan soilik ardaztu zitekeen dokumentala, baina, irudi ikusgarri horiek alde batera utzita, detaile txikietan eta, aldi berean, berezietan jarri du arreta dokumentalaren zuzendariak. Urbizuren gertuko planoak, zaleen plano geldoak, entseguak, abestiak zehazteko momentuak, urduritasuna... Une horiek guztiak ere bildu ditu, eta, horrela, mimoz eta sentimenduz beteriko dokumentala sortu du.

Berri Txarrak lehen aldiz ikusi duten haur estatubatuar batzuk; taldeak bere herrialdean ematen dituen kontzertu guztietara joan ohi den alemaniar bat; pasioak talde bat sortzera eraman duen euskal herritar bat... Protagonista ugari ageri dira filmean, jatorri askotarikoak, eta ikuspuntu zinez bereizgarriak, baina guztiek dute ezaugarri bat komunean: Berri Txarrak taldearekiko grina eta hirukoak sortzen dituen dardara askotarikoekiko sentitzen duten maitasuna. Eta, hala eta guztiz ere, ekoizpen erakargarria da Berri Txarrak ezagutzen ez duten ikus-entzuleentzat ere.

Agertokiak alde batera utzi eta hamasei hilabeteren ondoren estreinatuko dute Lameiroren Dardara ekoizpena Ikuspuntu Jaialdiko Sail Ofiziala irekiko du, baina lehiatik kanpo egongo da. Lau egun geroago, martxoaren 19an, Hegoaldeko zinemetan izango da ikusgai. Infrasoinuak du izena taldearen azken diskoak, eta, abesti baten tituluak esaten duen modura, Dardararen bat edo askoz gehiago sentiaraziko ditu ikus-entzunezkoak.

'DARDARA'
Zuzendaria. Marina Lameiro.
Aktoreak. Dokumentala denez, ez dago antzezlerik, baina Gorka Urbizuren hitzartze ugari daude.
Urtea. 2021.
Iraupena. 98 minutu.
Generoa. Dokumentala.

Ostiralean estreinatuko dute Hegoaldeko zinema aretoetan.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Alaitz Saizar eta Emory. ©ALAITZ SAIZAR

«Homosexuala izatea immorala da Malawin»

Jone Arruabarrena

Malawin zegoela, Emory 23 urteko gaztearen kasuaren berri izan zuen Saizarrek. Lesbiana izateagatik kale gorrian geratu zen Emory, eta kanpaina bat abiatu dute orain biek, LGTBIQ+ kolektiboaren alde.
Formigalgo estazioa urtarrilean, hutsik. Egoeraren ondorioz, ezin izan dute ireki. ©EFE

Larra-Belagua, pozik; gainerakoak, ez

Zihara Jainaga Larrinaga

Pandemiaren ondorioz ezarritako neurriek erabat baldintzatu dute eski denboraldia. Bisitarien faltan, estazio askok ezin izan dituzte ateak ireki. Larra-Belaguan txanponaren beste aldea ezagutu dute: inoiz baino nafar gehiago ibili dira.

Aurtengo itzuliaren une bat. ©Jon Urbe / FOKU

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.