EAJk eta PSE-EEk uko egin diote osasun mentalaren arreta indartzeari

COVID-19aren pandemiak herritarren osasun mentalean eragin dituen ondorioei buruz eztabaidatu zuen atzo Eusko Legebiltzarrak. Bi proposamen izan zituzten hizpide osoko bilkuran: Elkarrekin Podemos-IUk aurkeztutako legez besteko proposamen bat eta EH Bilduren mozio bat. Biek ala biek eskatzen zuten osasun mentala agenda politikoaren erdigunean jartzeko, eta Osakidetzan baliabide gehiago bideratzeko buruko osasuna artatzeko. Haatik, EAJk eta PSE-EEk proposamenen aurka bozkatu zuten, eta haien osoko zuzenketak egin zuen aurrera.

Jeltzaleek eta sozialistek argudiatu zuten ez dela neurri berririk eta baliabide gehiagorik behar buruko osasuna artatzeko, eta eskaera bakarra jaso zuten beren testuan: Osakidetzako osasun mentaleko zerbitzuek «arreta berezia» jar dezatela pandemiak herritarrengan eragin ditzakeen ondorio mentalen gainean, eta, horretarako, erabil dezatela osasun mentalaren arloan lan egiten duten «eragileen eta elkarteen esperientzia eta ezagutza».

Oposizioko taldeen irudiko, ordea, Osakidetzak berariaz aztertu beharko luke izurriak buruko osasunean izan duen inpaktua. EH Bilduk, Elkarrekin Podemos-IUk eta PPk nabarmendu zuten buruko gaitzak prebenitzeko eta osasun mentala artatzeko baliabide eta zerbitzu gehiago behar direla.

Elkarrekin Podemos-IUko Jon Hernandezek ohartarazi zuenez, koronabirusaren izurriaren ondorioz osasun mentalarekin lotutako arazoak «nabarmen areagotu» diren arren, zerbitzuak ez dira neurri eta aldi berean indartu. Hala, proposatu zuen, besteak beste, osasun mentaleko inbertsioak handitzeko eta programa espezifiko bat onartzeko lehen mailako arretan. EH Bilduko Maria Gardek Osasun Sailari eskatu zion diagnostiko «sakon» bat egiteko, jakiteko COVID-19aren pandemiak zer-nolako eragina izan duen herritarren osasun mentalean. Halaber, ezinbestekotzat jo zuen osasun mentaleko estrategia «garai berrietara» egokitzea. Gainera, PPko Laura Garridok Jaurlaritzari eskatu zion plaza kopurua handitzeko gastu soziosanitariorako hitzarmenetan.

Irakurketa «apokaliptikoa»

EAJko Jon Aiartzak, berriz, herritarren osasun mentalari buruzko interpretazio «apokaliptikoa» egitea egotzi zion EH Bilduri, eta azpimarratu gaur egun sare publikoak «babesa» ematen diola herritarren osasun mentalari. Sozialistekin bat egin zuen esatean herritarren buruko osasunaz azterlan ugari daudela eginda, eta ez dela beharrezkoa Osakidetzak diagnostiko berri bat egitea. «Osasun sistemak tresna eta baliabide nahikoa ditu».