2021ean ere Bruselak ez die eskatuko EBko kideei kontuak orekatzeko

Europako Batzordeak alde batera utzi ditu aurten defizit eta zor mugak, eta aukera eman die estatu kideei ahal beste gastatzeko eta zorpetzeko
Valdis Dombrovskis Europako Batzordeko lehendakariordea.
Valdis Dombrovskis Europako Batzordeko lehendakariordea. FRANCISCO SECO / EFE Tamaina handiagoan ikusi

Iker Aranburu -

2020ko abuztuak 11

Datorren urtean ere defizitaz eta zorraz ahazteko esan die Europako Batzordeak EBko estatu kideei. Asteburuan Financial Times egunkariari eskainitako elkarrizketan, Valdis Dombrovskis batzordeko lehendakariordeak iradoki zuen kontu publikoak kontrolpean izateko arauak ez direla berriro indarrean jarriko gutxienez 2022ra arte. Bruselaren baimenarekin, EBko kide guztiak gastu publikoa handituta ari dira aurre egiten koronabirusaren krisiak sortutako arazoei, eta orain gastu horiek murriztu nahi izateak egoera are gehiago okertuko lukeela uste du Bruselak.

Hainbat urtez ehuneko batek baldintzatu du estatu kideen diru politika: defizit publikoa gehienez %3koa izatea. Betetzeko kopuru zaila izan da hainbatentzat, tartean Espainia eta Frantzia. Espainiak muga hori gainditu zuen 2008tik 2017ra, eta azken bietan soilik lortu du behetik geratzea, ozta-ozta bada ere: %2,5 2018an, eta %2,8 iaz. Frantzia ez dago askoz hobeto: 2008-2016ko epean urtero gainditu zuen muga, eta 2019an %3an geratu zen, Emmanuel Macron presidenteak Jaka Horien mugimendua baretzeko gastu soziala handitu zuelako eta zerga emendatzeak bertan behera utzi zituelako.

%8,5eko defizita, oraingoz

Koronabirusaren krisiaren bat-batekotasunak eta gogortasunak, ordea, txiki utziko ditu azken urteetako defizitak, eta euroaren eremuan %8,5ekoa izango dela kalkulatu zuen Bruselak udaberrian —%10,1 Espainiarentzat, eta %9,9 Frantziarentzat—. 2021erako ere defizit handiak espero ditu: %3,5 eurogunean, %4,4 Frantzian eta %6,7 Espainian. Baliteke udazkenean kopuru horiek okertzea, eta agian orduan iragarriko du ofizialki EBk 2021ean ere ez diela defizitari eta zorrari asko erreparatuko. Udazkenean berrikusiko du egoera, «baina nahiko ziurra da» malgu jokatuko duela, «krisiak jarraitu egiten duelako, ziurgabetasunak jarraitzen duelako».

Are gehiago, ikusita konfinamenduaren amaierak COVID-19 kasuen ugaritzea ekarri duela, eta horiei aurre egiteko kontsumoa mugatzen duten hainbat neurri hartzen ari direla estatu kideak: maskarak derrigorrez erabili behar izatea, ostatuen irekiera orduak mugatzea, turisten joan-etorriak zailtzea, berrogeialdi partzialak ezartzea...

Uztailean, bere hazkunde iragarpenak txikitu zituen Bruselak. Eurogunean, 2020an BPGaren bilakaera puntu bat okertu zuen —-%7,7tik -%8,7ra—, eta bi hamarren txikitu zuen 2021eko errebotearen neurria —%6,3tik %6,1e-ra—. Ez da baztertu behar udazkenean aurreikuspen horiek gehiago okertzea, egin zituenetik, uztailaren 8tik, asko handitu baitira COVID-19aren kasu ofizialak praktikoki herrialde guztietan.

Financial Times-ek argitaratutako elkarrizketan, Dombrovskisek aitortu du iragarpen horiek pandemiaren nolabaiteko kontrolean zeudela oinarrituta. «Oraingo egoera ez da ziurra. ikusi beharko dugu egoera epidemiologikoa nola doan».

Halaber, esan du estatu kideen finantza egoera aztertzeko prozedurak aldatzeko prozesua aurrera doala, eta arau sinpleagoak nahi dituztela, krisi egoeretara egokituak.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Lehen Hezkuntzako bi ikasle, etxean konfinatuta. ©KAI FOSTERLING / EFE

«Badaezpada, denak etxera»

Ion Orzaiz

Ikasturtea hasi zenetik, ehunka ikasgela itxi dituzte Euskal Herrian. Kontziliaziorako zailtasunak eta informaziorik eza salatu dituzte konfinatutako ikasleen gurasoek.

Ikastolen jaiak omendu dituzte gaur Agurainen. ©Ikastolen Elkartea

Ikastolek baliabideak eskatu dituzte pandemiaren ikasturteari heldu ahal izateko

Edurne Begiristain

Ikastolen ikasturte hasiera ekitaldia egin dute Agurainen (Araba). Jokin Bildarratz Hezkuntza sailburuak eskua luzatu die akordioak lortzeko.

PCR probak egiten Donostiako ospitalean ©Idoia Zabaleta/ Foku

Positiboen kopuruak gora egin du Hegoaldean: 750 kasu

Edurne Begiristain

Bezperako datuekin alderatuta, 53 kasu gehiago atzeman dituzte.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna