Albistea entzun

'Antzezmetraia' eta 'Espazioa' proiektuak hautatu ditu TopArabak

Hainbat kultur diziplina nahasten dituzte bi egitasmoek. Egileek urtebeteko epea eta diru laguntza izango dute beren lanak garatzeko
Gasteizen, Oihaneder Euskararen Etxean aurkeztu zituzten bi proiektu irabazleak, atzo.
Gasteizen, Oihaneder Euskararen Etxean aurkeztu zituzten bi proiektu irabazleak, atzo. RAUL BOGAJO / FOKU Tamaina handiagoan ikusi

Unai Etxenausia -

2022ko maiatzak 27 - Gasteiz

Antzezmetraia eta Espazioa izan dira TopAraba egitasmoaren bi proiektu irabazleak, eta, hortaz, sortze prozesurako diru laguntza jasoko dutenak. Hainbat kultur diziplinatako sortzaile arabarrei begirako programa da TopAraba, eta euskarazko kultur sormena sustatzea, berrikuntza suspertzea eta sortzaileen artean sareak sortzea du xede. Bigarren urtez antolatu dute egitasmoa Gasteizko Oihaneder Euskararen Etxeak eta Vital fundazioak.

Antzezmetraia diziplinarteko metodologian oinarritutako ikus-entzunezko lan bat sortzeko proiektu kolektiboa da, eta zinema eta antzerkia nahastea du helburu. Xede hori lortze aldera, sorkuntzaren munduko hainbat esparrutako jendea batu da: Beñat Fontanedak, Ainhoa Imazek, Aitor Vinagretek eta Josune Velez de Mendizabalek osatzen dute taldea. Imazek azaldu duenez, jabetu dira proiektuak sortzeko eta esperimentatzeko «aukera infinituak» eskainiko dizkiela; izan ere, eszena batzuk grabatu dituzte dagoeneko: «Film bat sortzeko prozesuan gabiltza lanean, baina metodologia honek edozein diziplinarekin jolasteko eta beste batzuekin nahasteko aukera ematen digu».

Produzitzeko «arau propioak» sortu dituzte, gainera. Vinagret aktoreak esplikatu duenez, Velez de Mendizabalek eta berak «inprobisatzeko aukera paregabea» izango dute, ez baitute gidoirik izango: «Antzezpenaren, gidoiaren eta grabaketaren mugak hautsi nahi ditugu, eta modu horizontalean ekoitzi. Askatasun horrekin sortzea plazer hutsa da».

Ez hori bakarrik, batak bestearengandik ikasteko ere balioko die proiektuak. Partaide bakoitza esparru jakin batetik dator, eta, beraz, ekarpenak eta lan egiteko erak askotarikoak izango dira. Horregatik, prozesua nolakoa izan den erakutsiko duen making of bat grabatzea erabaki dute. Imazek gehitu duenez, emaitza inportantea izan arren, bideaz gozatzea ere garrantzitsutzat dute, eta «irrikaz» daude sortu ahala gozatzeko.

Bestalde, Eneko Etxebarrietak eta Miyuki Okaberenek Espazioa proiektua onduko dute. Lehen Hezkuntzako haurrei begirako obra eszeniko bat izango da, non antzerkiak, zinemak, magiak eta musikak topo egingo duten.

Antzezlaneko protagonista astronauta bat da, eta espaziontzia Lur planetaren parean aparkatu du. Etxebarrietak azaldu ditu tramaren nondik norakoak: «Belaunaldi berriei hausnarketak eta tresna interesgarriak eskainiko dizkie obrak, gure Lur planetak gaur egun aurre egin behar dien egoera konplexuak ulertzen eta gainditzen laguntzeko».

Sortzaile talde bakoitzak gehienez ere urtebeteko epea izango du proiektua garatzeko, eta, horretarako, Vital fundazioak emandako laguntza izango dute: lehenak, 4.500 euro, eta bigarrenak, 3.000 euro.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

'Oteiza Argentinan' erakusketa Donostiako D'Museoan. ©Andoni Canellada/FOKU

D'Museoak berretsi du Oteizaren lanak benetakoak direla

Miren Mujika Telleria

Oteiza fundazioak faltsutzat jo ditu aste honetan ‘Oteiza Argentinan’ erakusketako lanak, eta Poliziaren aurrean deklaratzen izan da D’museoko zuzendaria

Hasi da EHZ Festibala

Abiatu da EHZ festibala Irisarrin

Joanes Etxeberria - Ipar Euskal Herriko Hitza

Lau gunetan hedatuko da programazioa. Musika talde anitzek azken lana aurkeztuko dute

Aner Peritzek irabazi du aurtengo Basarri bertsopaper saria. ©Zarauzko Udala

Aner Peritzek irabazi du aurtengo Basarri bertsopaper saria

Jone Bastida Alzuru

Epaimahaiak bertsolari zarauztarrak erabilitako forma berritzailea nabarmendu du.

 ©JON URBE / FOKU

«Hiri osoak etorri behar du, erakusketak balio dezan»

Andoni Imaz

Tabakalera zinemaz betetzear da: 'Imajinatu Zinemaldia' eta 'Vive le cinéma!' erakusketak irekiko dituzte datorren astean. Eragileen arteko elkarlanarekin pozik daude Rebordinos eta Ormazabal.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...