«Datozen hilabeteetan» abortua konstituzioan sartzeko lege proiektu bat aurkeztuko dutela iragarri zuen atzo Emmanuel Macron Frantziako gobernuburuak. Emakumearen Nazioarteko Eguna zela medio, Gisele Halimi abokatuaren aldeko omenaldi batean eman zuen albistea, Halimi abortatzeko eskubidearen aldeko borrokaren ikurra izan zela baliatuta. Erran zuen garrantzitsua dela «emakumeek haurdunaldia borondatez eteteko duten askatasuna» konstituzioan egotea, modu horretan inork ezinen baitu eskubide hori ukatu, «atzeraezina» izanen baita.
Ameriketako Estatu Batuetako Auzitegi Gorenak abortuaren babes konstituzionala bertan behera utzi zuenean, Frantziako Gobernuak zenbait neurri zabaldu zituen, eta oposizioak, berriz, horien kontra egin zuen. Konstituzioan abortua eskubide gisa sartzea onartu zuten diputatuek azaroan; senatuak, ordea, askatasun gisa sartzea onartu zuen otsailean: 166 boz izan ziren neurriaren alde, eta 152 aurka. Ezkerreko oposizioak, baina, Macroni eskatu zion lege proiektu propio bat aurkezteko, prozesu guztia azkarrago joan zedin.
Frantziako Asanblea Nazionalaren oniritzia beharrezkoa da oraindik, eta, onespen horiek lortu eta gero, erreferendum bat ere egin beharko litzateke. Gobernuak prozesua bere gain hartzen badu, ez da erreferendumik egin beharko: nahikoa litzakete parlamentuan bost kidetik hiruk Macronek egindako proposamena onartzearekin.
Abortua Frantzian
Frantzian 1975. urtean despenalizatu zuten abortua, Simone Veilek sustatutako lege batengatik.Azkeneko zuzenketa 2022an izan zen —epeak hamalaugarren astera arte luzatzen ditu—. Bobigny izeneko epaiak ireki zion bidea Veilen proposamenari. 1972an 16 urteko neska bat absolbitu zuen auzitegi horrek: bortxatua izan eta gero abortatzeagatik akusatuta zegoen adingabea. Gisele Hamili zen haren abokatua.
Macronek abortua konstituzioan sartzearen alde eginen du
Iruzkinak
Ez dago iruzkinik
Ordenatu
