Albistea entzun

LARREPETIT

Txantxa argigarriak

Goizalde Landabaso -

2021eko uztailak 6

Indiako ezkontzen %90 gurasoek edota familiek adosten dituzte. Gauza asko izaten dira aintzat, bat, horoskopo zeinu berbera izatea, hortxe ikusten baitituzte bateragarritasunak. Maiz, ezkongaiek ezkontzan bertan ezagutzen dute elkar. Kastak kasta, emakumeari dagokionez azal zuriduna bada, hobe; eta aintzat hartzen dira sukaldaritzan duen ezagutza eta etxea atontzen baliagarria den edo ez. Honek azal dezake Indiako iparraldeko dozena bat egunkaritan agertutako iragarkiak eragindako zalaparta. Emakume bakan batzuek egunkarietan iragarkiak ordaintzen ei dituzte senar eskean, baina hau ezberdina zen:

«Feminista setatia. 30etik gora urte, ondo hezia, ile laburra eta piercing-a. Kapitalismoaren kontrako gizarte lanetan aritzen da lanean. Mutil guapoa bilatzen ari da, 25-28 urte bitartekoa, negozioak dituena, aberatsa, etxetzarra daukana. Sukaldaritzan moldatu beharko litzateke. Korroskadak eta puzkerrak botatzen ez dituena». E-maila ere agertzen zuen iragarkiak. Aipagai duten emakumeari txantxa egin zioten nebak eta lagun min batek, urtebetetze egunerako. COVID-19a dela eta, ezin dutenez ganoraz ospatu, horretara bideratuko zituzketen rupiak iragarkian inbertitzea erabaki zuten: ia 150 euro (13.000 errupia indiar). Feministak ez dituzte maite Indian ere, egin ezazu kontu esan dizkiotenak; gorriak, beltzak eta zuriak. Hipokritatzat hartu dute (beste lore sorta ederren artean) bera baino gazteagoa eta aberatsagoa den gizona eskatu duelako, eta guapoa. Berak, 30 urteko feministak, umorez hartu du, baina irri eta mirri artean nabarmen utzi du bere herrian dagoen hipokrisia. Izan ere, gizonezko batek emakume eder, zuri eta argala eska dezake; emakumeek, berriz, ez. Zeharo suminduta agertu diren horiek dira, hain zuzen ere, emazte bati horrelako eskakizunak egiten dizkiotenak. Txantxa batzuk errealitatea baino gordinagoak dira, sarri.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.