Albistea entzun

LARREPETIT

Gorrotoa

Goizalde Landabaso -

2020ko urriak 20

Zur eta lur geratu da lagun bat sare sozialetan gorroto mezuak jaso ostean. Ezagutzen ez duen gizon batek bota dizkio botatzekoak, merke eta bizkor, amorruak zipriztinduak. Hau ez da ezer berria, are gehiago, esango nuke eguneroko gauza dela. Nolabaiteko anonimotasunean ezkutatu eta zure frustrazio eta ezintasun oro ustezko adierazpen askatasunean askatu.

Nire lagun honek ezezagun batengandik irainak doan jaso izan dituen egunean esan du Macron Frantziako presidentearen gobernu bozeramaileak, Gabriel Attalek, sare sozialetan gorrotoa barreiatzen dutenen kontrako neurriak hartuko dituztela. Zaila ikusten dut, ez neurriak ezartzea, noski, gorrotoa mugarritzea baizik. 2019an Asanblada Nazionalak ebatzi zuen gorrotozko mezua bidali eta hogeita lau orduren bueltan sare sozialetatik kendu ezean zigortu egingo zutela. 1,25 milioi euroko isunak ere jaso zitzakeen eraso egileak, onartutakoaren arabera. Baina, egia esan, ez dakit zertan geratu zen hori guzti hori. Eta denetan ere, mugak ezartzeko horretan daukat nik zalantza, izan ere, zuk muga jarriko zenukeen leku horretan, agian beste batek ez luke jarriko; eta baliteke gero beste batzuek berregitea gorrotozko mugarriak, eta horrela infinituraino. Beharbada errazagoa litzateke beteko diren joko- arau batzuk ezartzea, baina honetan ere zalantza-malantza sortzen zait.

Duela egun batzuk, Yanis Varoufakis-ek zioen Ara egunkariko artikuluan, eta Greziako Epaitegi Nagusiak Egunsenti Urrekara elkarte faxista talde kriminaltzat hartu ostean, Egunsenti Urrekara taldea desagertu dela, baina ez bere gorrotoa. Hau gogoratu dut lagunari laidoka aritutakoa greziar elkartearen jarraitzailea delako. Gizarteko kide diren batzuen barrenetan dagoen gorrotoaren zuztarra aise aurki liteke, beste gauza bat da zelan konpondu hori. Irudipena daukat arau eta isun sortatik harago dagoela.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...