Albistea entzun

LARREPETIT

Ospa dezagun

Ander Perez Argote -

2023ko martxoak 24

Plan bezala ez dago gaizki, ados. Ez nuke asteburuero egingo, baina, tarteka hedonismoari bide ematearren tira, zergatik ez. Bazkari eder bat lagunartean, Labriten pilota partida, eta gintonic batzuk Alde Zaharreko tabernatan, nekeen mende erori arte. Aspalditxoan pakete errepikakorra bihurtu da gurean. Ez hainbeste bertakoentzat —baita ere—, baizik eta inguruetatik —esan nahi baita, erkidegotik— gurera datozen (batez ere mutil) kuadrillentzat. Eta ojo, ongi etorriak denak.

Beti despedidan etorri behar izatea da zer pentsa ematen didana. Agur zeri esaten zaion sekula ongi ez ulertu izanaz aparte, gizarte bezala lagunarteko ospakizunak ze kasuetarako gordeta dauzkagun egiten baitzait bitxi. Eta e, ospa dezala nahi duenak nahi duena. Baina aldi berean, galde diezaiogun gure buruari zergatik ez dugun ezer ospatzen depresioaren zulo sakonetik atera den lagunarekin, zergatik ez goazen beste hiri batera nazka-nazka eginda lana uzteko pausoa eman duen adiskidearekin, ezer ospatzen ari ote garen bere burua ispiluan egoki ikustea lortu duen kidearekin, denboran aitortu gabekoak esatera ausartu denarekin, kanta berri bat idazteko inspirazioa bildu duenarekin, sukaldaritza tailer batean izena eman eta bokazioa aurkitu berri duenarekin.

Bizitzaren mugarri sozialetan, ados, ez du kategoria bera ezkontzeak edota arratsalde osoz eguzkia sartzen den alokairuko etxe eroso bat topatu izanak. Baina barne sentimenduen orekan, jakin badakigu, ze kapritxoso jokatzen duen sarri zoriontasunak, ze gauza ezdeusak jarri gaitzakeen pozik, ze gauza hutsalak hondoratu.

Horiek denak lagunartean ospatzearen aldekoa da alegatu hau. Ahal bada zintarik eta txinatarren dendako koroarik gabe. Nabarmendu behar ez izateak ematen duen benetakotasunarekin. Inor belarria jatera etorriko ez zaizunaren ziurtasunarekin. Inor zure poza zoriontzera etorriko ez dela asumituta. Zurea dela bakarrik, ez beste inorena. Eta edozer egin dezakezula harekin, ospatu, ala madarikatu.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.