Espainiako Gorteetarako hauteskundeak. Bizkaia

EAJ nagusitu da Bizkaian, eta PSEk buelta eman die aurreko galerei

Elkarrekin Podemosek 60.000 boto galdu ditu, eta, horrekin batera, diputatu bat. EH Bilduk eutsi egin dio bere diputatuari. Espainiako eskuina ordezkaririk gabe gelditu da

PSE-EEko Patxi Lopez, botoa ematen, Portugaleten.
PSE-EEko Patxi Lopez, botoa ematen, Portugaleten. MARISOL RAMIREZ / FOKU

Gotzon Hermosilla -

2019ko apirilak 29

EAJ izan da Espainiako Gorteetarako hauteskundeetako garailea Bizkaian. Historikoki herrialdean izan duen nagusitasuna batzuetan lausoturik gelditu da bozak Espainiakoak izan direnean eta Espainiako logikak eta joerak gailendu direnean —2016ko hauteskundeetan, esaterako, Elkarrekin Podemos izan zen lehenengo indarra Bizkaian—. Oraingoan, baina, horrek ez dio eragin EAJri: boto kopuruan zein ehunekoan asko hazi da —botoen 99,53 zenbatuta, 234.338 boto, %34,38—, hiru diputatu lortu ditu —aurrekoan baino bat gehiago—, eta argiro eutsi dio lehen postuari.

PSE-EE izan da bigarren indarra, 135.442 boto eta bi diputatu lortuta —aurrekoan baino bat gehiago—. Ziklo negatibo luze batetik zetorren PSE-EE, eta oso emaitza eskasak izan zituen Eusko Legebiltzarrerako hauteskundeetan, udaletakoetan —Bizkaian zituen alkatetza garrantzitsu ia guztiak galdu zituen— eta Espainiakoetan. Orain, baina, esan daiteke Espainiatik datorren logikak funtzionatu egin duela: eskuinari gobernuaren presidentetza kentzeko lehia horretan, PSE-EE asko hazi da Bizkaian, batez ere Bilbon eta inguruko herrietan. Ezkerraldean, esaterako, historikoki izan duen nagusitasuna berreskuratu du, eta lehen indarra da Barakaldon, Portugaleten eta Sestaon: horrek esan nahi du udal hauteskundeetan lehia bizia egongo dela herri horietan alkatetza lortzeko.



Dudarik gabe, Bizkaian Elkarrekin Podemos izan da galtzaile nagusia, PPrekin batera. 120.599 boto eta bi diputatu lortu ditu —diputatu bat galdu du—, eta horrek erakusten du baduela oinarri finko bat eta gutxieneko hautesle kopuru bat, baina, orobat, argi gelditu da duela hiru urteko emaitzak aski puztuta zeudela; asko jaitsi da, are lehenengo indarra izan zen herrietan ere.

EH Bilduk eutsi egin dio bere diputatutari, eta, gainera, hazi egin da; botoetan —23.300 boto gehiago— eta, garrantzitsuagoa dena, ehunekoan —%10,89tik %13,36ra—. Horrek erakusten du hazkundea ez dela soilki parte hartze handiagoaren ondorio, eta gorantz datorren indar bat dela.

PP, ordezkaririk gabe

PPrentzat erabateko porrota izan da atzoko hauteskunde eguna Bizkaian. Zeukan diputatua galdu du, eta, horrekin batera, ia botoen erdiak ere bai; ia 80.000 boto izatetik (%12,71) 50.000 botoen langara ez iristera igaro da (%7,27). Adibidez, Getxon, PPren indarguneetako batean, ia 3.700 boto galdu ditu, oraindik bigarren indarra bada ere —%24,56 lehen, %15,28 orain—.

Bitxia bada ere, eta Espainian ez bezala, ez dirudi Bizkaian C's-ek botorik kendu dionik PPri, duela hiru urteko emaitzak errepikatu baititu: 20.685 boto lortu zituen 2016an, eta 21.133 orain. Voxek, berriz, 15.740 boto izan ditu Bizkaian. Bi indarrak guztiz bazterrekoak dira orain ere Bizkaian.

Hego Euskal Herriko emaitzak

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna